¿Imanirtaj pipis Dioslatana sirvinanpaj aunicunman y bautizacunman?

Pipis bautizacunanpäna caycaptenga Jehovatarämi mañacun, y chaychomi aunicun Paylata adurananpaj y paylata cäsucunanpaj lapan cawaynincho (Salmo 40:8). Nircur bautizacunanpaj junaj chayamuptenga musyacanna Dioslapäna cawananpaj mayna aunicushganta. Manaraj bautizacur Jehovalata sirvinapaj aunicushganchega imapitapis más ali ruraymi. ¡Cushicuypämi! Gampis Dioslapäna cawayta munarga, ¿imataraj ruranquiman?

1. ¿Imataj yanapämanchi ‘Jehovalata sirviyta munä’ ninapaj?

Diosta cuyashpanchimi Paylapaj cawayta munanchi (1 Juan 4:10, 19). Biblia cayno nin: “Tayta Diosta cuyanqui lapan shonguyquiwan, lapan voluntäniquiwan, lapan yarpayniquiwan y lapan calpayquiwan” (Marcos 12:30). Jehovata rasunpa cuyashganchega parlashganchicho y rurashganchichomi ricacämunga. Imanomi juc jipashwan mozupis cuyanacärishpan casacärin, chaynolami Diosta rasunpa cuyarga Paylata aduranapaj jucla aunicunchi.

2. ¿Ima bendiciuncunataj caycan bautizado Testigucunapaj?

Bautizacurga, Jehovaga familian rurinchonami chasquicalämanchi. Cawayninchichoga ricäshunmi Pay amatar cuyamashganchita. ‘Paypitaga imapis raquichimangachu’ nishunrämi (leiriy Malaquías 3:16-18). Diosta cuyaj hermanucunawan caycarpis shacyächinacurmi cushi cushila goyäcushun (leiriy Marcos 10:29, 30). Cayta ichanga gonganquimanchu: manaraj bautizacurga gamga mayna Jehovata reguinquiman, cuyanquiman y Churin Jesusmanpis yäracunquiman. Nircur bauzacuptiquega, maquiyquichonami canga mana ushacaj cawayta tarinayquipaj. “Chaynöpami salbashana caycanqui”, ninmi Bibliapis (1 Pedro 3:21).

SHUMAJ YACHACURCUNAPAJ

3. Dioslata sirvinapaj o manapis quiquinchipita caycan

Unay Israel naciuncho waquin runacunaga ‘Jehovatapis Baaltapis adurashun’ nirshi cawapäcoj. Pantarcaycarganmi. Baalga juc luta diosmi cargan. Chaymi Jehovaga profetan Eliasta mandargan correginanpaj. Leipäcuy 1 Reyes 18:21 y caypita parlapacäriy:

• ¿Imatataj israelitacuna rurapäcunan cargan?

Israelitacunano noganchipis acrananchi pitaj caycan Diosninchi. Leipäcuy Lucas 16:13 y caycunapita parlapacäriy:

• ¿Alichuraj canman ‘Jehovalata adurä’ niycarpis, imacunapis juc diosninchino caycaptin?

• ¿Imataraj ruranquiman ‘payga nogalatami sirviman’ nir Tayta Jehová gampita ninanpaj?

4. Jehová cuyashushgayquiman yarpachacuy

Jehová imaycatapis goycalämaptinchega, ¿imatataj noganchipis Payta goshwan? VIDEUTA ricapäcuy.

VIDEO: ¿Imatataj rurashwan cuyacoj Diosninchiraycur? (3:04)

¿Imanopataj Diosninchega alapa cuyaycalämanchi? Leipäcuy Salmo 104:14, 15 y 1 Juan 4:9, 10 y caycunapita parlapacäriy:

• Lapan Jehová goycalämashganchipita, ¿maygancunapitataj mana uticaypa ‘graciaslä’ niycanqui?

• Lapan chasquishgayquiman yarparga, ¿masrächu cuyayta munanqui Jehovata?

Pipis ima regalulatapis gomaptinchega agradecicunchimi. Leipäcuy Deuteronomio 16:17 y caypita parlapacäriy:

• Chasquishgayqui bendiciuncunaman yarparga, ¿ima mastataj Jehovaraycur rurayta munanqui? ¿Imataraj gonquiman?

5. Diosta sirviptinchiraj bendiciuncunata tarinchi

VIDEO: Pelotata puclacularmi cacoj cä (5:45)

• Pelotalata jaytar cacuycarpis, ¿imanirtaj tiempuwanga chayta jaguirergan?

• Payga decidergan Jehovalapäna cawaynin cananpaj. ¿Alitachuraj rurargan? ¿Imanir?

Apóstol Pablupis cristiano manaraj car, cay munducho yachaj runaman ticraycargan. Profesurninga leycunapita musyaj runash cargan. Pero estudiaycashgantaga jaguirerganmi. ¿Tiempuwan arrepenticurganchuraj? Leipäcuy Filipenses 3:8 (TNM) y caycunapita parlapacäriy:

• ¿Imanirtaj Pabluga “basura” jinata ricargan lapan jaguishgancunata?

• ¿Ima bendiciuncunatataj tarergan?

• ¿Más alichuraj cawayniqui canga Jehovalatana sirviptiquega? ¿Imanirtaj chayno yarpanqui?

ICHIC YACHACUY

Jehovata rasunpa cuyarga listumi caycäshun paylata sirvinapaj, aunicunapaj y nircur bautizacunapaj.

Yarpänapaj

• ¿Imanirtaj Taytalanchi Jehovataga alapa cuyar paylata adurashwan?

• ¿Ima bendiciuncunatataj Jehová goycun bautizacushga cajcunata?

• ¿Dioslata sirvinayquipaj aunicuyta munanquimanchuraj?

MASLATA YACHACUNAYQUIPAJ

Yachacuy imatataj juc warmipis juc runapis jaguergan, chaynopa Jehovalata sirvir galaycärinanpaj.

Mozo-jipashcuna tapucärin... ¿Imanoraj cawacöman? Guepa vidäman yarpar... (6:54)

Maslata yachacuy imanir Jehovalata sirvinapaj.

“¿Imanirtaj Jehovalata sirvinapaj aunicushwan?” (Wilacamoj, 15 enero quilla, 2010)

Cay videucho ricacämun imanotaj alistacärin bautizacuyta munajcuna.

Cuyarmi Gamlata sirvishaj (4:30)

Yachacuy imata rurarnataj juc warmi galaycurgan. Leinapäga caymi: “Caway vidäman yarpachacuycarlami cawacurgä”.

“Biblia yanapargan cambiananpaj” (Wilacamoj, 1 noviembre quilla, 2012)