Bibliaga galaycunanlapita parlamun Diospa Gobiernunpita. Chay Gobiernuwanmi lapan aunicushgancunata Tayta Jehová cumplichimunga. Pero rasun cajchoga, ¿imataj chay Gobierno? ¿Maynachuraj gobernaycämun canan wichan? ¿Ali cawaytapis apamungachuraj? Caycho y gatejnin cajchomi chay lapanpita yachacushun.

1. ¿Imataj Diospa Gobiernun, y pitaj acrashga Rey caycan?

Chay Gobiernutaga quiquin Jehovami camacächishga. Rey cananpäga Jesustami acrashga cielupita gobernamunanpaj (Mateo 4:17; Juan 18:36). Jesuspaj parlarmi Biblia cayno nin: “Pay mandashanga imaypis manami ushacangachu” (Lucas 1:32, 33). Chauraga Rey captin, runacunata ali cawachir, entero Pachata gobernamunga.

2. ¿Japalanchuraj Jesús gobernaycämun?

Jesusga mana japalanchu gobernaycämun. “May trïbu runacunatapis, ima rimayta rimaj runacunatapis, may marca runacunatapis” acrashga paywan gobernamunanpaj (Apocalipsis 5:9, 10). ¿Aycajtaj Jesuswan gobernapäcamunga? Cay Pachacho Jesús cashgan wichanpitanami mana atipaypaj chaychica runacuna Jesusta gatir cristianuman ticrapäcush. Pero 144.000 cristianucunalami cielupaj aywapäcun Jesuswan gobernamunanpaj (leiriy Apocalipsis 14:1-4). Waquincunaga cay Pachachomi cushi cushila cawapäcunga chay Gobiernupa maquinchona caycar (Salmo 37:29).

3. ¿Diospa Gobiernunga igualchuraj canga runacunapa cajwan?

Runacunapa Gobiernun alicunata rurayta munaptinpis manami podernincuna canchu lapan problemacunata alchapäcunanpaj. Wata wata juccuna juccuna yaycamuptinpis jinala problemacunaga caycan. Ichanga Jesús “mandaycashganga manami imaypis ushacangachu” (Daniel 2:44). Jesús gobernamushgan wichanga lapan casta runacunata ali nawilanwan ricanga. Amatar cuyapämashpanchimi imano cawacunapaj yachachimäshun, chaynopa jucninchi jucninchipis cuyanacuypa y respetanacuypa cawanapaj (leiriy Isaías 11:9).

4. Jesús lapan Pachata gobernamushgan wichan

Pï maypitapis más yachaj y poderniyojmi Jesusga; ¡mayraj cushicurculäshun gobernamuptenga! Leipäcuy Mateo 28:18 y caypita parlapacäriy:

• ¿Imanirtaj Jesuspa gobiernunga pï maypitapis más ali caycan?

Cay Pachacho runacuna gobernashganga juc tiempulachomi ushacan. ¿Diospa Gobiernunpis juc tiempulapächuraj canga? Leipäcuy Daniel 7:14 y caycunapita parlapacäriy:

• ¿Imanoraj yanapämäshun Diospa Gobiernun mana ushacajla captin?

• ¿Imanoraj yanapämäshun cay Pachacho juc Gobiernula captin?

5. Runacunapa gobiernunga ali cawayta apamushgachu

¿Imanirtaj runacunapa gobiernunga, Diospa Gobiernunwan trucachishga canman? VIDEUTA ricapäcuy y caypita parlapacäriy:

VIDEO: ¿Imataj Diospa Gobiernun? (waquilanla) (1:41)

• ¿Ima nacaycunapataj pasaycanchi runacunapa gobiernuncho?

Leipäcuy Eclesiastés 8:9 y caypita parlapacäriy:

• ¿Diospa Gobiernunga maynachuraj galaycamunman? ¿Imanir?

6. Jesuswan gobernamojcunaga cuyapaycalämäshunmi

Reyninchi Jesusga runanomi cay Pachacho cawash, payga “rejsiycämanchi; cuyapämanchi” (Hebreos 4:15). Jehová acrashganchoga caycan warmicunapis olgucunapis; 144.000 gobernamojcunata acrashga, “may trïbu runacunatapis, ima rimayta rimaj runacunatapis, may marca runacunatapis” (Apocalipsis 5:9).

• Jesuswan gobernamojcuna musyanmi runa car imano nacashganchita, ¿cushicuypächuraj chayga? ¿Imanir?

7. Diospa leynincunaga imaypis ali cawacunapämi

Runacuna camacächishga leycunaga yanapämanchimi. Diospa Gobiernunpa leynincunata cäsucuptinchi ichanga más jaucalami goyächimanchi. Leipäcuy 1 Corintios 6:9-11 y caycunapita parlapacäriy:

• ¿Imanoraj caway canga pï maypis Diospa mandätuncunata cäsucuptin?a

• ¿Ganas ganasla cäsucunapächuraj caycan Diospa mandätuncuna? ¿Imanirtaj chayta ninqui?

• Pasaypa mana alita ruraj runacunapis, ¿cambianmanchuraj? (11 caj versiculuta ricapäcuy).

ICHIC YACHACUY

Diospa Gobiernunpa parlarga manami yangalachu. Cielupitami cay Pachata gobernamunga.

Yarpänapaj

• ¿Pïcunataj Jesuswan gobernapäcamunga?

• ¿Imanirtaj Diospa Gobiernunga runacunapita más ali caycan?

• Gobiernunpa maquincho caycajcuna, ¿ima ruranantataj Jehová munan?

MASLATA YACHACUNAYQUIPAJ

Leiriy imatataj Jesús nergan Gobiernun maycho cashganpita.

“¿Diospa Gobiernunga shongulanchichochuraj caycan?” (jw.org paginapita yachachicuy)

¿Imanirtaj Jehovapa testiguncunaga Diospa Gobiernunlata yanapänapaj yarpachacunchi?

Diospa Gobiernunlata yanapanchi (1:44)

Bibliacho yachacuy 144.000 runacunata Jehová acrashganta, Jesuswan gobernamunanpaj.

“¿Picunataj cielupa aywan?” (jw.org paginapita yachachicuy)

Diosla imayca problemacunata alchananpaj musyarga, ¿imanotaj yanapash juc carcelarashga warmita?

“Yachacushcä Diospa Gobiernunla ali cawayta apamunanpaj” (¡Ricchayna!, noviembre 2011)

Diospa Gobiernunga cieluchomi camacash y 1914 watachomi galaycamush. Chay watapitami runacunapa gobiernuncunaga ushacänanpäna caycan. ¿Imanirtaj chayta ninchi? Caycho yachacushun imatataj Biblia puntalapitana wilacurgan; imataj cay munducho pasaycan y runacunapis imanotaj cawarcaycan.

1. ¿Imatataj Biblia puntalapitana wilacush?

Bibliacho Daniel libruga wilacurgan Diospa Gobiernun galaycunanpaj ‘ganchis watacunaraj’ pasaptin (Daniel 4:16, 17). Naciuncunapa “tiempun cumplingancama”, chaytapis quiquin Jesús nergan y tantiachicurgan tiempuncho chay ganchis watacuna manaraj ushacashganta (Lucas 21:24). Ichanga 1914 watapäga ushacarganmi.

2. ¿Imacunatataj cay munducho ricashcanchi 1914 watapita?

Jesustami gatejnincuna cayno tapurgan: “Cutimunayquipaj y cay patsa ushacänanpaj ¿ima señaltaj canga?” (Mateo 24:3). Jesusnami nergan cay Pachacho imacuna pasananpaj, cielucho gobernar galaycuptin. Parlamurgan guerracunapita, muchuypita y terremotocunapita (leiriy Mateo 24:7). Bibliapis wilacurgan “ultimu tiempucho” runacuna pasaypa mana ali capäcunapaj y culpancunaraycur cawaypis más sasamanraj ticracurinanpaj cajta (2 Timoteo 3:1-5). 1914 watapitami chay lapancuna may chaycho ricacämun.

3. ¿Imanirtaj imacunapis más sasamanraj ticracurish Jesús gobernar galaycushgan wichanpita?

Cielucho Jesús gobernar galaycuptenga, Satanaswan demoniucunaga chaychorämi carcaycargan. Bibliami nin guerra galacuycushganta y Jesús vencishganta, “Satanasta llapan gatirajnincunatawan janaj pachapita gargamuran” chay guerracho (Apocalipsis 12:9, 10, 12). Satanasga pasaypa rabiash caycan; y ichiclachona ushacänanpaj cashganta musyar imayca mana alicunata may chaycho ruraycan. ¡Piraj ninman cay caway vidachoga imacunapis ali cashganta! Lapanpis alchacänanpäga Diospa Gobiernunlata shuraycanchi.

SHUMAJ YACHACURCUNAPAJ

4. Unay profeciacunaga 1914 wataman chayachimanchi

VIDEO: Diospa Gobiernunga 1914 watacho galaycamush (5:02)

Unay Babiloniapa reynin Nabucodonosorpa sueñuyninchomi Jehová wilargan ima pasananpaj cajta. Chay sueñupis y Daniel ima cashganta wilacushganpis tincunmi chay reypa gobiernunwan y quiquin Diospa Gobiernunwanpis (leipäcuy Daniel 4:17).a

Leipäcuy Daniel 4:20-26. Nircur dibujucunata ricapärir, cay tapucuycunapita yachacäriy:

• A) ¿Imatataj sueñushgancho Nabucodonosor ricash? (20 y 21 versiculucunata ricapäcuy).

• B) ¿Imataj pasanan cargan chay arbulwan? (23 caj versiculuta ricapäcuy).

• C) ¿Imataj canman cargan “ganchis watacuna” pasarcuptin? (26 caj versiculuta ricapäcuy).

Sueñushgancho yurimoj árbol y Diospa Gobiernun

IMA PASANANPA CAJ (Daniel 4:20-36)

Mandacushgan

A) Juc jatuncaray árbol

Mandacushgan ilacäcun

B) “Chay yörata muturir” “ganchis wata” pasachun

Mandacushgan yapay yurimun

C) “Yapaymi ray cayman cutichishunquipaj”

Jucnin caj cumplimiento:

• D) ¿Pitaj chay árbol caycan? (22 caj versiculuta ricapäcuy).

• E) ¿Imaytaj manana gobernargannachu? (Leipäcuy Daniel 4:29-33).

• F) ¿Imataj pasargan mandaj cashganwan ‘ganchis watacuna’ pasarcuptin? (Leipäcuy Daniel 4:34-36).

JUCNIN CAJ CUMPLIMIENTO

Mandacushgan

D) Nabucodonosor, Babiloniapa reynin

Mandacushgan ilacäcun

E) Nabucodonosor juiciunta ogran 606 J.m.sh.b watapita y chayraycur ganchis watapa gobernannachu

Mandacushgan yapay yurimun

F) Nabucodonosor juiciunman cutircur yapay gobernayta galaycun

Ishcay caj cumplimiento:

• G) ¿Arbulpa parlarga pïcunapätaj parlaycanchi? (Leipäcuy 1 Crónicas 29:23).

• H) ¿Imaytaj gobernapäcamurgannachu? ¿Imanirtaj ninchi cay Pachacho Jesús caycaptin mana gobernarcaycashganta? (Leipäcuy Lucas 21:24).

• I) ¿Maychotaj y imaytaj camacashga cay Gobierno yapay galaycunanpaj?

ISHCAY CAJ CUMPLIMIENTO

Mandacushgan

G) Unay Israelcho Diospa jutincho mandacoj reycuna

Mandacushgan ilacäcun

H) Jerusalenta ushachipäcush 607 wata  J.m.sh.; y 2.520 watacunapa, Diospa jutincho, Israelpita ima reylapis yaycushgachu

Mandacushgan yapay yurimun

I) 1914 watacho Dios acrashgan Rey captin, Jesús gobernayta galaycun

5. 1914 watapita masraj mana alicuna galaycamush

VIDEUTA ricapäcuy.

VIDEO: 1914 watapita masraj mana alicuna galaycamush (1:10)

Jesús mayna wilacurgan gobernar galaycuptin imacuna cay Pachacho pasananpaj. Leipäcuy Lucas 21:9-11 y caypita parlapacäriy:

• Caycho wilacushganpita, ¿maygantataj ricashcanqui o mayashcanquipis?

Apóstol Pablupis wilacurganmi runacuna imano cawarcaycänanpaj cay último tiempucho. Leipäcuy 2 Timoteo 3:1-5 y caypita parlapacäriy:

• Biblia nishganno, ¿imanoshi runacuna canman cargan y gampis ricashcanquichu chayta?

6. Diospa Gobiernun galaycushgantana musyarga yarpachacächimashwan imano cawaycashganchiman

Leipäcuy Mateo 24:3, 14 y caycunapita parlapacäriy:

• Dios gobernaycashgan ricacämunanpaj, ¿imataj may chaycho ruracaycämun?

• ¿Imanotaj gampis yanapacunquiman?

Diospa Gobiernunga mayna galaycamush y ichiclachona cay Pachapis Jesuspa maquincho caycanga. Leipäcuy Hebreos 10:24, 25 (TNM) y caypita parlapacäriy:

• ¿Imatataj rurashun cay mana ali tiempo ushacänanpäna caycaptenga?

ICHIC YACHACUY

Bibliacho profeciacuna y cay munducho imacunapis pasaycashganga musyachimanchi Diospa Gobiernun mayna galaycushganta. Chaypita seguro cashganchiraycurmi runacunata predicanchi y reuniuncunamanpis aywanchi.

Yarpänapaj

• ¿Imataj pasash Daniel wilacushgan ganchis watacuna pasarcuptin?

• ¿Imanirtaj seguro caycanqui 1914 watacho Diospa Gobiernun galaycushganta?

• ¿Imano cawacurtaj seguro caycanqui Diospa Gobiernun mayna galaycushganta?

MASLATA YACHACUNAYQUIPAJ

Yachacuy imatataj waquin runacuna nipäcush 1914 wata wichanpita cay mundo cambiashganpita.

“Ima watacunapitataj respetulapis mana cannachu” (¡Ricchayna!, abril 2007)

Ricarcuy imanotaj juc runata yanapash, Mateo 24:14 textupita yachacushgan.

“Puclacunäpaj cajlacho jatiräcoj cä” (Wilacamoj, núm. 3 2017)

¿Imanirtaj nishwan Daniel librupa chuscu caj capitulun Diospa Gobiernunpita parlaycämushganta?

“¿Imaytaj Diospa Gobiernun galaycamush? (Juc caj)” (Wilacamoj, 1 octubre quilla, 2014)

Daniel librupa chuscu caj capitulun ganchis watacunapita parlan, ¿imacunataj tantiachimanchi 1914 watacama cashganta?

“¿Imaytaj Diospa Gobiernun galaycamush? (Ishcay caj)” (Wilacamoj, 1 noviembre quilla, 2014)

Diospa Gobiernunga mayna galaycamush y cay Pachacho ali cawayta galaycachinanpäna caycan. Canan yachacushun chay wichan ima bendiciuncunata chasquinapaj.

1. ¿Imataraj puntata Diospa Gobiernun ruranga cay Pachacho ali caway cananpaj?

Armagedón guerrarämi canga ali caway cananpaj, chaychoga lapan mana ali runacunata y mandacojcunatami Jesús ushacächenga (Apocalipsis 16:14, 16). Chay wichanpäga Biblia cayno aunicushganmi cumplicämunga: “Manapis aycajlatanami fiyu runacunaga ushacangapaj” (Salmo 37:10). Cay Pachata gobernamuptinmi Jesusga ali cawayta tarichimäshun, may chaychopis jaucala goyächimäshun (leiriy Isaías 11:4).

2. ¿Imanoraj caway vidanchi canga Jesús gobernamuptin?

Chay wichanga “alli runacunami ichanga alli pachacho tiyanga. Chayllachömi imaycamapis goyäconga” (Salmo 37:29). Yarparcuy: ¡imanoraj caway canga pï maypis alilata rurar cuyanacäriptin y Jehovalata adurapäcuptin! Amatar cushicunchi chayman yarpar. Pipis gueshyanganachu ni wanunganachu.

3. Lapan mana alicuna ilgaptenga, ¿imataj nircur galaycunga?

Jesusmi 1.000 watacunapa Gobernar galaycamunga, jina paywan caycanga 144.000 gobernäshejcuna. Paycunami yanapämäshun juchaynaj runaman ichiclapa ichiclapa ticranapaj. 1000 watacuna ushaptenga, cay Pachaga cuchun cuchunmi cuyaylapaj canga, runacunapis Jehovalata cäsucur cushishga cawarcaycanga. Chaypitana Jesuspis Papaninta cutichenga chay gobiernunta. Chay wichanga imapitapis masga Diosninchipa jutinmi respetashga cayculanga (Mateo 6:9, 10). Pï maypis musyapäcunga Jehovala ali gobernaj y marcanta cuidaj Dios cashganta. Nircurna Jehovaga ushacächenga Satanastawan demoniucunata, y chaynola paypa contrancho ticrajcunatapis (Apocalipsis 20:7-10). Ali caway galaycamushganga manami imaypis ushacangachu.

SHUMAJ YACHACURCUNAPAJ

4. Runacunapa gobiernuntami Diospa Gobiernun ilgächenga

“Runaga runa-masinta mana allita rurananpaj munayniyojmi caycan” (Eclesiastés 8:9). Diospa Gobiernun wichanga, mana alicunata rurajcunataga manami maychopis ricashunnachu.

Leipäcuy Daniel 2:44 y 2 Tesalonicenses 1:6-8 y caycunapita parlapacäriy:

• ¿Imatataj Jehovawan Jesús ruranga cay munducho gobiernucunawan y lapan gatirajnincunawanpis?

• Jehovapita y Jesuspita yachacushganchega, ¿imanotaj tantiachimanchi paycunaga alicunalata imaypis rurashganta?

5. Jesuslami acrashga Rey caycan

Reyninchi Jesusga imayca alicunatami ruranga cay Pachacho lapan cawajcunapaj. VIDEUTA ricapäcuy y parlapacäriy imanotaj Jesusga runacunata yanapash, y chaynola imatataj ruranga Dios goshgan poderwanpis.

VIDEO: Jesús gobernamuptenga ima aycata ruranga (1:13)

Pachacho caycar Jesús lapan rurashganta musyarmi cuentata gocunchi gobernamuptin imacunata rurananpaj. Chaymi gatejnin cajpita, ¿maygantataj mayna cumplicänanta munanqui? Yurimoj textucunata lapanta leipäcuy.

6. Mana ushacaj cawaytaga tariyculäshun Diospa Gobiernunraycurlami

VIDEO: Ali cawayta shuyaycälanchi (4:38)

Leipäcuy Salmo 145:16 y caypita parlapacäriy:

• “Alli cashpayquimi sacsananyaj tarichinqui”, chayno Biblia niptenga, ¿imanotaj ricacunqui?

ICHIC YACHACUY

Diospa Gobiernun ali cawayta apamunantaga imapis michangachu. Ali runacunalami paraisuchoga Dioslata adurar imaycamapis cawapäcunga.

Yarpänapaj

• ¿Imatataj Diospa Gobiernun ruranga Jehovapa jutin más respetashgaraj cayculänanpaj?

• ¿Imanirtaj seguro caycanchi Diospa Gobiernun, Biblia lapan aunicushganta cumplichinanpaj?

• Paraisuchona ricacurga, ¿imacuna cumplicänantataj mayna ricayta munanqui?

MASLATA YACHACUNAYQUIPAJ

Yachacuy imataj Armagedón nishgan.

“¿Imataj Armagedón?” (jw.org paginapita yachachicuy)

Yachacuy Jesús wilacushgan ’fiyupa nacay’ wichan imata pasananpaj cajta. (Mateo 24:21)

“¿Imataj ‘fiyupa nacay’ wichan?” (jw.org paginapita yachachicuy)

¿Imanotaj familiacuna ricacärinman Mushoj Pachachona caycashganno.

Mushoj Pachachona ricacuy (1:50)

Cayta leiy: “Achca tapucuycunata ruracoj cä”, chaychomi yachacunqui imanotaj juc político tarergan ima ashiycashganta.

“Biblia yanapargan cambiananpaj” (Wilacamoj, 1 enero quilla, 2012)