05 CAJ YACHACUY
Diosga Bibliawanmi parlapämanchi
Bibliaga 66 librucunayojmi, cuyamashpanchimi Jehová goycalämashcanchi. Öraga pilapis tapucunman: “¿Pipitataj Biblia shamun? ¿Pitaj escribichergan?”. Chay tapucuycunata contestarcunapaj, ricarcushun imanotaj Diospa Palabran maquinchicunaman chayamushga.
1. Runacuna Bibliata escribishga carpis, ¿imanirtaj ninchi Diospa Palabran cashganta?
40 runacunanomi Bibliata escribipäcurgan. 1513 watachomi Jesús manaraj shamuptin escribiyta galaycurgan y 98 watacho ushargan, Jesús shamushganchona. Galaycushganpita ushanancama 1600 watacunano pasargan. Chayno captinpis, lapan wilacuynincunaga yäracuypämi. Bibliaga Diospitami shamun (leiriy 1 Tesalonicenses 2:13). Escribejcunaga manami quiquinpa yarpayninlapitachu escribergan, ‘sinoga espíritu santu tantiachiptinmi Tayta Diospa yarpayninta guelgapäcurgan’ (2 Pedro 1:21).a Aumi, Diosga espíritu santunwan runacunata pushargan Palabranta escribichinanpaj (2 Timoteo 3:16).
2. ¿Pïcunataj Bibliapita yachacärinman?
Lapan runacuna “may marcapita captinpis, ima casta captinpis, juc-niraj rimayta rimaptinpis” Bibliapita yachacärinmanmi (leiriy Apocalipsis 14:6, Panao Biblia). Canan wichanpäga chaychicaj idiumacunacho Biblia traducicämushga, maygan librucunawanpis manami tincunchu. May chaychomi runacuna Biblianta charan y quiquinpa idiumancunachomi leipäcun.
3. ¿Imataj Jehová rurargan Palabranta pipis mana ilgächinanpaj?
Bibliataga escribipäcurgan garachacunacho y totora niraj plantapa tallunpita rollucunacho (chaycunaga tiempuwan ismucäcojmi). Nircur Bibliata cuyaj runacuna achca copiacunata rurapäcurgan y mana pantananpäga lapan letracunatapis yupapäcojmi. Mandaj runacuna Bibliata ushacächiyta munaptinpis, defendej runacunaga hasta wanupäcurgan. Jehovaga manami permitirganchu pipis Palabranta ilgächinanpaj. Biblia nin: “Tayta Diosninchipa palabranmi [...] imayyajpis caycanga” (Isaías 40:8).
SHUMAJ YACHACURCUNAPAJ
Yachacushun imanotaj runacunata Dios yanapash Palabranta escribichinanpaj. Nircurpis yachacushun imanotaj Bibliata Dios chapashga canancama caycänanpaj.
4. Bibliaga Diospitami shamun
VIDEUTA ricapäcuy. Nircur leipäcuy 2 Timoteo 3:16 y caycunapita parlapacäriy:
Runacuna Bibliata escribishga carpis, ¿imanirtaj ninchi Diospa Palabran cashganta?
¿Rasunpachuraj Diosga runacunata yarpayninta wilapargan?
Patrun dictashgantami secretariunga escribin, chaymi ninchi chay cartaga patrunpita cashganta. Chaynolami Bibliata escribejcunapis Diospa yarpaynintami escribergan.
5. Bibliaga imaycacunapapis pasashgami
Bibliaga quiquin Diospitami shamun, chaymi payga imaycacunapitapis chapashga. Unay mandaj runacunaga Bibliatami ushacächiyta munargan, pushacoj religiosucunapis michäcurgan waquin runacuna leicunanta. Chayno captinpis waquin ali shonguyoj runacunaga cawaynintapis peligruman churarmi Bibliata traducipäcush. Juc runa chayta rurashganta ricärishun. VIDEUTA ricapäcuy y caypita parlapacäriy:
Biblia imaycacunapa pasashganta musyarga, ¿manachuraj más ganas ganasla leirinquiman? ¿Imanirtaj chayta ruranquiman?
Leipäcuy Salmo 119:97 y caypita parlapacäriy:
¿Imanirtaj waquin runacunaga wanunan captinpis Bibliata traducipäcush?
6. Bibliaga may chaycho cawaj runacunapämi
Bibliaga chaychicaj idiumacunacho yargaycämun, pï maypäpis caycan. Leipäcuy Hechos 10:34, 35 y caycunapita parlapacäriy:
¿Imanirtaj runacunata Dios yanapashga Palabran chaychicaj rimaycho traducicänanpaj y nircur aypucänanpaj?
¿Chauraga ima ninquitaj Bibliapita?
Casi
LAPAN
runacunami, may chaychopis
quiquinpa rimaynincho Bibliata leipäcun
3.000
rimaycunapitapis mascho
traducicämushga,
lapan caj o pulanlapis
5.000 milloniscunano
Biblia imprimicämushga.
Maygan librucunapitapis más aypushgami cashga
WAQUINCUNA NIPÄCUN: “Bibliaga unay librulami, runacunapa yarpayninlami chaycho caycan”.
¿Ima ninquitaj gam?
¿Imanirtaj ninchi Bibliaga Diospa Palabran cashganta?
ICHIC YACHACUY
Bibliaga Diospa Palabranmi. Diosninchega munan Palabran lapan runacunaman chayananpaj cajtami.
Yarpänapaj
¿Imanotaj Diosga runacunata yanapashga Palabranta escribinanpaj?
¿Bibliaga imaycacunapa pasarpis manami ilgashgachu?, ¿ima ninquitaj chaypita? Y nircurpis ¿ima ninquitaj achca idiumacunaman traducicashganpita y aypucashganpita?
¿Imanotaj ricacunqui Diospa Palabranta charashgayquipita?
MASLATA YACHACUNAYQUIPAJ
Yachacuy imano unaycho Bibliata escribergan y chaypita imano traducicämushgantapis.
“Canancamami Bibliaga jinala caycan” (¡Ricchayna!, noviembre 2007)
Leircuy imanir Biblia imaycacunapa pasarpis manami ushacashgachu.
¿Bibliata escribejcuna imacunapa pasargan? Videuta ricäriy.
Achca copiacuna y traducciuncuna Bibliapita ruracashga. ¿Imanirtaj seguro caycanquiman lapan wilacamushgancuna mana trucacashganta?
“¿Bibliaga trucachishgacu cashga?” (jw.org paginapita yachachicuy)
a Espíritu santuga Diospa calpanmi o poderninmi. 07 caj yachacuycho chaypita tantiarcushun.