22 CAJ YACHACUY
¿Imanotaj Diospita yachachicunquiman?
‘¡Lapan runacunami cayta yachacunman!’ ninquichi Bibliacho rasunpa cajcunata tarerga. Ichanga ninqui ‘yachacushgäta waquincunata parlapänäpaj manchacömi’ nir. Mä yachacushun Diospita wilacur imanotaj valurcharcunquiman y chayta rurar cushishgala imano ricacunayquipäpis.
1. ¿Imanotaj reguishgayquicunata Diospita wilapanquiman?
Jesuspa gatejnincuna cayno nergan: “Ricashätaga wiyashätaga pï-maytapis willapäshämi. Manami upällacushächu” (Hechos 4:20). Paycunaga alapami valurargan yachacushgancunata. ¿Paycunanolachu gampis pï mayta Diospita yachachiyta munanqui? Familiayquicunata amiguyquicunata Bibliapita parlapayta galaycuy (leiriy Colosenses 4:6).
Parlar imano galaycunayquipaj
Maygan castayquilawanpis parlarga, cayno ninquiman: “Cay semanaga Bibliacho caytami yachacurcushcä”.
Pï yanasayquilapis gueshyaycaptenga, Bibliapita ima textulatapis leiparcuy shacyarcunanpaj.
Aroj masiquicunawan tincurga alichi canman, Bibliacho o reuniuncho yachacushgayquita paycunatapis wilapaptiqui.
Amiguyquicunata ricarcachiy cay paginanchita: jw.org.
Pilatapis nircuy ‘yanagämay Bibliapita yachacunanchipaj’ o yachachiy jw.org paginacho quiquin mañacunanpaj Biblia yachacuyta.
2. ¿Imanirtaj hermanucunawan predicar galaycunquiman?
Jesuspa discipuluncunaga jäpa runacunatapis predicapäcurganmi. “Ishcay ishcay” aywapäcurgan Jesús mandacushgannola (Lucas 10:1). Chaynoparaj más runacuna ali wilacuycunata mayapäcurgan. Jina yanagänacur-raj predicarga gatejnincunaga cushi cushilami maypapis aywapäcoj (Lucas 10:17). ¿Chauraga gampis predicaciunman yarguyta munanquina?
SHUMAJ YACHACURCUNAPAJ
Mä ricärishun imataj yanapäshunquiman mana manchacuylapa y cushi cushila Diospita yachachicunayquipaj.
3. Jehovaga manami jaguishunquichu
Waquincunaga imano yachachicunanpaj cajman yarparmi ‘imataraj runacuna nimanga’ nir manchacärin.
Y gampis Diospita pilatapis parlapänayquipäna caycarga, ¿manchacunquichu? ¿Imanir?
VIDEUTA ricapäcuy y caypita parlapacäriy:
¿Manchacuycarlachu cacärergan videucho jovincuna?
Leipäcuy Isaías 41:10 y caypita parlapacäriy:
¿Imanirtaj Diosta mañacunquiman predicanayquipaj manchacurga?
¿Mayashcanquichu?
Achca hermanucuna wilacamun galananlacho predicananpaj sasa cashganta. Sergey runapita parlarcushun. Testigo manaraj carshi piwanpis parlananpäga sasa cargan. Chaypita Bibliapita yachacur galaycurgan y cayno wilacun: “Pasaypa manchacuycaptëpis, valurcharcurgämi yachacushgäta waquincunata parlapänäpaj. Chayta rurarga alina ricacurgä, y yapay yapay parlaptëga masraj Bibliapita yachacurgä”.
4. Respetulawan parlarcunquiman
Manami imata predicanalapächu yarpashwan, sino ali shimilawan parlapänapaj cajmanpis yarpachacushwanmi. Leipäcuy 2 Timoteo 2:24 y 1 Pedro 3:15 y caycunapita paralapacäriy:
Bibliapita yachachicuycar, ¿imanotaj chay textucunaman yarpashgayqui yanapäshunquiman?
Öraga yachachicushgayquita pilapis jucla chasquicungachu, ¿imatataj chay hora ruranquiman? ¿Rabiaparchuraj galaycunquiman?
‘Cayta wacta creinquiman’ ninayquipaj trucanga, ¿imanirtaj paycuna yarpashganta respetanquiman?
5. Ali wilacuycunapita parlarga cushichimanchimi
Jehovami Jesusta mandargan ali wilacuyninpita yachachicunanpaj. ¿Y chaytachu rurargan Jesús? Leipäcuy Juan 4:34 y caycunapita parlapacäriy:
Ali micuycunata acrarcur sacsashganchicama micucurcurga, cushi cushilami caycanchi. ¿Imanirtaj Jesús nergan Papäninpa voluntäninta ruraycashgan, ali micuyta micushgan japuy cashganta?
¿Gampis imanotaj ricacunqui ali wilacuycunapita parlarga?
Imata ruranayquipaj
Pulan semana reuniuncho demostraciuncunapita yachacuy.
Bibliapita yachachishojniquita tapuy imata ruranquiman demostraciuncunacho gampis yargunayquipaj. Demostraciuncunata rurarga listuna caycanqui waquincunawan Bibliapita parlanayquipaj.
Lapan yachacuycunacho yurimun “Waquincuna nipäcun” nishgan, chaypita yachacunquiman runacuna imatapis nishuptiqui imano contestanayquipaj.
WAQUINCUNA NIPÄCUN: “¿Imanolataj? ¿Lapayquicunapis alilachu?”.
Chayno pilapis tapushuptiqui, ¿imanotaj Bibliapita yachacushgayquita wilapanquiman?
ICHIC YACHACUY
Predicayta galaycuyga cushicuypämi, ¡gampis puedinquimi!
Yarpänapaj
¿Imataj yanapäshunquiman gampis yachachicunayquipaj?
¿Imanotaj respetulawan parlar galaycunquiman?
¿Imataj yanapacunman mana manchacuylapa predicanapaj?
MASLATA YACHACUNAYQUIPAJ
Tarjeta de contacto de jw.org nishganwan imano predicanayquipaj chusculata ricäriy.
Imano predicanayquipaj: tarjeta de contacto de jw.org nishganwan (1:43)
Caycho yachacushgayqui yanapäshunqui Diospita ali yachachicoj canayquipaj.
“¿Listuchu caycanqui runacunata ashircur predicanayquipaj?” (Wilacamoj, setiembre 2020)
Caycho yachacunqui Biblia wilacushganta, imanotaj wamrala caycarpis valurcharcur predicanapaj.
Caycho leircuy imanotaj waquin familiayquita Bibliapita parlar galaycunquiman.
“Imanotaj mana Testigo familiayquipa shongunman chayanquiman” (Wilacamoj, 15 marzo quilla, 2014)