48 CAJ YACHACUY
Ali amigucunata acray
Ali amiguyoj captinchirämi öraga ima laquicuypis aywacun. Ali amigucunata tarinapäga calpachacunanchirämi. Bibliapis ninmi pajta mana ali amigucunawan juntacaycashwan. Chauraga, ¿imanopataj ali amigucunata acrashwan? Mä chaypita yachacushun.
1. ¿Charashgayqui amiguyquicuna yanapäshunquichu?
Amigunchicunaga ali runaman o mana ali runamanpis ticrachimashwanmi. Internetlapapis waquincunaga amigucunata ashin. Biblia cayno nin: “Yachaj runacunawan goturarga yachaj caytami yachacunqui. Mana tantiyaj upacunawan goturarmi ichanga pirdicar mana allimanna chayanqui” (Proverbios 13:20). Jehovata cuyaj y aduraj amigucunaga yanapäshunquimi Diospita mana raquicänayquipaj y vidayquicho ali caminuta acranayquipaj. Mana ali amigucuna ichanga perdiciunmanpis apashunquimanchi. Bibliaga yanapämäshunmi ali yarpachacurcur amigunchicunata acranapaj. Noganchino paycunapis Jehovata cuyapäcuptenga cushi cushila goyäcurmi Diospa Palabran cayno nishganta cäsucuycäshun: “Imaypis shacyächinacushgayquinöla jucniqui jucniquipis tantiyachinacur shacyächinacäriy” (1 Tesalonicenses 5:11).
2. ¿Ima ninraj Jehová amiguyquicunata imano acrashgayquipita?
Quiquin Jehovapis mana cäsucojcunataga acranchu amigun cananpaj, “ali shongu runacunatami ichanga cuyan” (Proverbios 3:32). Taytalanchi Diostaga laquichishwanchi payta mana cäsucoj pï runacunatapis ‘yanasämi pay’ nir goturäcurga (leiriy Santiago 4:4). Pero mayraj cushicunga Payta cuyaj runacunawan cushi cushila juntacarga. Noganchipis cushiculäshunmi amiguntano Jehová chasquimaptinchi (Salmo 15:1-4).
SHUMAJ YACHACURCUNAPAJ
Yachacushun imanotaj ali amigucunata acrashwan y chay amigucuna imanotaj yanapämäshun Jehovata cuyanapaj.
3. Mana ali amigucunawan juntacaychu
Mana ali amigucunaga caycan Diosta mana cuyaj y mana respetajcunami. VIDEUTA ricapäcuy y caycunapita parlapacäriy:
¿Imanopataj ichicla ichiclapa mana ali amigucunawan juntacaycashwan?
Leipäcuy 1 Corintios 15:33 y caypita parlapacäriy:
Gampäga, ¿pïcunataj mana ali amigo canman? ¿Imanir?
Leipäcuy Salmo 119:63 y caypita parlapacäriy:
¿Pipis imano runa captinrätaj ‘amigö’ ninquiman?
Imanomi juc ismush manzana alicaj manzanacunata ismuchinman, chaynolami mana ali amigucunaga mana ali cajcunaman chayachimashwan.
4. Ali amiguyquicunaga ima castapis, ima edäyojpis canmanmi
Bibliaga parlamunmi David y Jonatán runacunapita. Unay Israel marcacho cawapäcurgan. Jucnin caj achca watacunapa más mayornin captinpis ali amigo cashpan alapa cuyanacärergan. Leipäcuy 1 Samuel 18:1 y caypita parlapacäriy:
¿Amigunchicunaga guellaytarächuraj charanman y edäninchipitarächuraj canman?
Leipäcuy Romanos 1:11, 12 y caypita parlapacäriy:
¿Imanotaj shacyächinacur yanapanacärin Diosta cuyaj amigucunaga?
¿Maychotaj juc mozo ali amigucunata tarergan? VIDEUTA ricapäcuy y caycunapita parlapacäriy:
¿Imanotaj cay taytacunaga ricacärergan wamran Akil pïcunawan juntacaycashganta musyar?
¿Imanirtaj galananlachoga Akil mozo cushicoj mana ali amigucunawan caycar?
¿Imatataj rurargan japalanla mana ricacunanpaj?
5. ¿Maychotaj tarishwan ali amigucunata?
Yachacuy maychotaj rasunpa amigucunata tarinquiman y gampis imanotaj ali amigo canquiman. VIDEUTA ricapäcuy
Leipäcuy Proverbios 18:24 y 27:17 y caycunapita parlapacäriy:
¿Imanotaj rasunpa amigucunaga yanapanacärin?
¿Biblia niycashgannochu caycan amiguyquicuna? Chayno mana captenga, ¿imanoparaj ali amigucunata tarinquiman?
Leipäcuy Filipenses 2:4 y caypita parlapacäriy:
Ali amigucunata tarinayquipäga, quiquiquirämi ali amigo canquiman. ¿Imata rurar-raj ali amigo canquiman?
Ali amiguyoj canapäga, quiquiquirämi ali amigo canayqui.
WAQUINCUNA NIPÄCUN: “Amiguero captëmi nogaläga pï maywanpis amiguta rurä”.
¿Ima ninquitaj gam?
ICHIC YACHACUY
Ali amigucunata acrarga alimi goyäcushun y Jehovapis amiguntano chasquimäshun.
Yarpänapaj
¿Imanirtaj Jehovaga nimanchi ali amigucunata acranapaj?
¿Pïcunawantaj amiguta rurashwanchu?
¿Imata rurartaj ali amigucunawanga shacyächinacur ali cawapäcunquiman?
MASLATA YACHACUNAYQUIPAJ
Yachacuy imanotaj rasunpa amigucunaga yanapämashwan ima sasacunapapis pasaptinchi.
“Cananmi tiempo caycan ali amigucunata ruranapaj” (Wilacamoj, noviembre 2019)
Yachacuy imatataj ruranquiman ali amigucunata tarinayquipaj.
¿Imamanrätaj yarpachacunquiman internetlapa amigucunata rurayta munarga?
Cayta leiy: “Taytayoj caytami munargä”, chaycho yachacunqui imanirtaj juc runa mana ali amigucunawan juntacargannachu.
“Biblia yanapargan cambiananpaj” (Wilacamoj, 1 abril quilla, 2012)