58 CAJ YACHACUY
Jehovapitaga imapis raquichimashwanchu
Rasunpa cristianucunaga yarpaylapis yarpanchichu Jehovapita raquicäcunapaj. Taytalanchi Jehovaga mayraj cushicun paylata aduranayquipaj gampis calpachacuptiqui (leiriy 1 Crónicas 28:9). Pero Diosta sirviycashgayquicho ima pruebalapis captenga, ¿imataraj ruranqui?
1. ¿Imatataj waquincuna rurapäcun Jehovapita raquicäcunapaj?
Öraga imaycatami waquincuna nimäshun Jehovapita raquicäcunanchipaj. Diospa marcanpita lutanta parlarmi engañarpis engañaramashwan. Chay runacunatami ninchi: Diospita raquicar contranchicho ticrajcuna. Pajta paycunata cäsupar rasunpa caj caminupita yargucushwan. Pushacoj religiosucunapis pasaypa lulacur contranchicho imaycata parlapäcun, paycunapitapis cuidacushwan. Pantarachimashwanchi libruncunata leiptinchi o internetchopis videuncunata ricaptinchi. Juc cristianupäga veneno cuentami chaycuna canman. Chay pantachicojcunapaj parlarmi Jesús cayno nergan: “Paycunata ama cäsupaychu. Paycunaga gaprapura pushanacujnömi carcaycan. Gaprapura pushanacurga ishcanmi pözuman jeganga” (Mateo 15:14).
2. ¿Pipitataj canga Jehovapita mana raquicäcunapaj?
Quiquinchipitami caycan Diosta sirvinapaj o manapis. Alimi ricänanchi maycho o ima trabajutapis chasquinapaj, pajta cuentata mana gocur luta religiuncunapaj aruycashwan. Palabranchomi Jehová noganchipaj cayta guelgachimush: “Babiloniapita aywacäriy”; caywanga niycämanchi lapan luta religiuncunata imanolapapis mana yanapänapaj (Apocalipsis 18:2, 4).
SHUMAJ YACHACURCUNAPAJ
Yachacuy imata ruranquiman Jehovapita imapis mana raquichishunayquipaj. Y luta religiuncuna rurashgancunata watgaylapis mana watgapänapaj.
3. Luta yachachicojcunataga ama wiyapaychu
¿Imataraj rurashwan Jehovapa marcanpita mana cajcunata pipis wilapämaptinchi? Leipäcuy Proverbios 14:15 y caypita parlapacäriy:
¿Pipis imata nimaptinchipis imanirtaj shumajraj tantiacushwan?
Leipäcuy 2 Juan 9-11 y caycunapita parlapacäriy:
Diospita raquicar contranchicho ticrajcunawanga, ¿parlashwanchuraj?, ¿imanir?
Paycunawan mana parlarpis, ¿imanopataj Jehovapita jucnopa yarpächimashwan?
Jehovapa contrancho churacajcunata ichiclatapis wiyapaptinchega, ¿ima ningaraj Jehová?
4. Juc hermano juchata ruraptin, Jehovapitaga raquicäshunchu
Maygan hermanulanchipis jatun jucha rurashganta musyarerga, ¿imataj rurashwan? Unay israelitacunata Jehová ima nishganman yarpachacuy. Leipäcuy Levítico 5:1.
Cay versículo nishganno, maygan hermanulapis jatun jucha rurashganpita mayarga, ancianucunata wilapashwan. Pero puntataga chay jucha rurajta nishwan juchanpita ancianucunata wilapänanpaj; chayta mana ruraptenga quiquinchinachi ancianucunata wilapäshun. ¿Imanotaj chaycho ricacämunga...
... Jehovata cuyashganchi?
... juchayoj cajta cuyashganchi?
... congregaciuncho hermanunchicunata cuyashganchi?
Maygan hermanulatapis yanapänapaj captenga, yanaparcuy.
5. Jatuncaray Babiloniapita witicuy
Leipäcuy Lucas 4:8 y Apocalipsis 18:4, 5 y cay tapucuycunapita yachacäriy:
Juc religiuncho cashga carga y chaycho anotacushga carga, ¿jutiquita borrachishcanquinachu?
Imanolapapis, ¿juntacaycanquichu luta religiunwan?
¿Ima trabajulawanpis yanapaycanquichu luta religiuncunata?
Luta religiuncunawan ichiclapis mana talucänayquipaj, ¿ima mastataj cawayniquicho ruranquiman?
Imalachopis pantaycashga carga, ¿imata rurartaj jucla galaycunquiman?
Ali valurcharcur jucla alicunata rurar galaycuy, Jehovapitaga imapis raquichishunquimanchu.
¿Luta religiuncuna rurashgancunata yanapanquimanchuraj?
WAQUINCUNA NIPÄCUN: “Contranchicho ticrajcunawan o chay apóstata nishgancunawan mana parlarga, ¿imanotaj musyashaj imacho pantarcaycashganta?”.
¿Alichu chayno yarpayga? ¿Imanir?
ICHIC YACHACUY
Jehová Diosninchita mana jaguinapäga, imaraycurlapis juntacashwanchu Diospita raquicar contranchicho ticrajcunawan.
Yarpänapaj
Diospita raquicar contranchicho ticrajcuna, ¿ima nimashganchicunataga wiyapashwanchuraj?
Juc hermano jatun juchata rurashganta musyarga, ¿imatataj rurashwan?
¿Imanotaj Biblia mandacushganta cäsucunchi luta religiuncunawan imalachopis mana juntacänapaj?
MASLATA YACHACUNAYQUIPAJ
¿Imataraj rurashwan Jehovapa testiguncunapita lutanta parlapäcuptin?
“¿Lapantachu musyapacaramushcanqui?” (Wilacamoj, agosto 2018)
¿Imanotaj musyanquiman cay munducho ima ruraycunapis luta religiuncunawan talucashga caycashganta?
¿Imatataj contranchicho ticrajcuna rurapäcushga noganchipis Diospita raquicäcunapaj?
Cayta leiy: “Wamrala cashgäpita Diosta ashergä”, chaycho yachacunqui imanotaj juc sacerdote luta religiunta jaguirergan.
“Biblia yanapargan cambiananpaj” (Wilacamoj, 1 julio quilla, 2011)