¿Imacunata rurar cushicunanchitataj Jehovaga munan?

Jehovaga “cushishgala cawacoj Diosmi” (1 Timoteo 1:11, TNM). Payga munan cawayninchicho imalata rurarpis cushicunanchita. Arurpis tiempunchitaga camacächishwan jamapänapaj. Mä yachacushun imacunatataj rurashwan jamapashganchi hora cushi cushila pasarcunapaj.

1. Cushicunapaj imalatapis rurayta munaycarga, ¿imamantaj yarpachacushwan?

Jamapashgan hora waquincunaga imalatapis rurayta munapäcun ‘canansï puclapacushaj, musicatapis wiyashaj, televisiunta ricashaj o amigücunawan pasiapacoj aywashaj’ nir. Imata rurayta munarpis “Dios munashganno” cananpaj yarpachacushwan (Efesios 5:10). ¿Imanirtaj chayta rurashwan? Canan wichanga imayca puclacunacho mana alicunalata ricanchi: wanuchinacuylata, chiquinacuylata, y televisiunchopis majanta engañacojcunala yargamun. Chay lapancunaga Jehovapa ricayninpaj mana alimi caycan (leiriy Salmo 11:5). ¿Imaraj yanapämäshun cushicunapaj horacho ali cajcunalata acranapaj?

Diosta cuyaj ali amigunchicunaga yanapämäshunmi jamapashganchi hora ali cajlata acrar cushi cushila pasarcunapaj. 48 caj yachacuycho parlashganchino “yachaj runacunawan goturarga yachaj caytami” yachacushun. Ichanga mana tantiacoj cashpanchega mana ali amigucunawan juntacar ‘pirdicar mana alliman’ chayashun (Proverbios 13:20).

2. ¿Imanirtaj yarpachacunanchiraj puclacunalacho mana jatiräcunapaj?

Acrashganchi puclacuna ali captinpis, pajta chaylacho cacuycashwan. Tiempunchitaga camacächishwan Diosta sirvir imaycata ruranapaj. Diospa Palabranpis cayno nimanchi: “Gamcunaga alilata imaypis rurapäcuy” (leiriy Efesios 5:15, 16).

SHUMAJ YACHACURCUNAPAJ

Yachacushun imaraj yanapämäshun cushicunapaj horacho ali cajcunalata acranapaj.

3. Mana ali puclaycunapita cuidacushun

¿Imanirtaj ali caj puclaycunata acrananchi? VIDEUTA ricapäcuy y caycunapita parlapacäriy:

VIDEO: ¿Imacunawantaj pucläman? (4:39)

• Unay Romacho runacuna cushicunanpaj peliacunata ricaj, ¿chaynolachuraj canan wichanpis puclacunacho yargaycämun?

• ¿Imataj yachacush mozo Danny celularcho puclaycunapita?

Leipäcuy Romanos 12:9 y caypita parlapacäriy:

• Biblia nishganno, ¿imanotaj yanapämanchi puclashganchicunata ali acrananchipaj?

¿Imacunatataj Dios chiquin? Leipäcuy Proverbios 6:16, 17 y Gálatas 5:19-21. Nircur caypita parlapacäriy:

• Biblia nishganno canan wichanpis runacuna, ¿imacunawantaj jamapashgan hora pasaypa cushicärin?

Jamapashganchi hora imano ali ruraycunata acranapaj

Quiquiqui tapucuy:

• ¿Imapitaraj canga? ¿Jehová chiquishgancunachuraj caycan?

• ¿Imay horaraj canga? ¿Tiempo aypangachu Diosta sirvinapaj?

• ¿Pïcunataj caycanga? ¿Jehovata mana sirvejcunachuraj chaycho carcaycanga?

Imano ima peligrupitapis cuidacunchi, chaynola puclashganchicuna mana ali cashganta cuentata gocurga jucla witicushwan.

4. Tiempuyquita ali yarpachacur camacächiy

VIDEO: ¿Imacunachotaj tiempuyqui aywacun? (2:45)

• Videucho yargamoj hermano mana alicunata mana ruraycarpis, ¿imacunalachotaj tiempun aywacoj y chayraycur imanotaj caycargan?

Leipäcuy Filipenses 1:10 (TNM) y caypita parlapacäriy:

• ¿Imanotaj cay texto yanapämashwan ayca tiemputa ima ruraycunapäpis camacächinapaj?

5. Ali cajlata acray

Cushicunapaj ima ruraycunapis mana ali captenga Jehová chiquinmi, ichanga cushicunmi jamapashganchi hora ali cajcunata acrarcur cushi cushila pasaptinchi. Leipäcuy Eclesiastés 8:15 y Filipenses 4:8 y caypita parlapacäriy:

• ¿Ima ruraycunataj gustashunqui cushi cushila pasarcunayquipaj?

ICHIC YACHACUY

Jehovaga munan cushicunapaj ali ruraycunata acrananchitami y waquincunawan caycarpis cushi cushila pasananchitami.

Yarpänapaj

• Cushicunapäno caycaptinpis, ¿ima ruraycunataj cristianucunapäga mana ali caycanman?

• ¿Ima ruraycunapäpis imanirtaj tiempunchitaga ali yarpachacur-raj camacächishwan?

• Diosta mana laquichiyta munarga, ¿jamapashgayqui hora ima ruraytaraj acrarinquiman? ¿Imanir?

MASLATA YACHACUNAYQUIPAJ

Mä yachacuy imacunawanpis cushicunapäga, ¿pipitataj caycan?

“¿Jehovapa testiguncunaga ninchuraj ima canciuncuna, peliculacuna o librucunapis prohibido cashganta?” (jw.org paginapita yachachicuy)

Yachacuy imanoraj jamapashgayqui hora ali cajta acranquiman imacunawan cushicunayquipäpis.

“¿Ali cajcunalawanchu cushicuycanchi?” (Wilacamoj, 15 octubre quilla, 2011)

Yachacuy imanirtaj juc runa mana ali cajcunawan cushicushgancunata jaguirergan “Mana alitaga yarpargänachu” nir wilacushgancho.

“Biblia yanapargan cambiananpaj” (Wilacamoj, 1 febrero quilla, 2010)

Ricay imanotaj juc warmi cuentata gocurgan demoniucunata gustashgancunata televisiuncho mana ricananpaj.

Demoniucunapa rurashgancunawanga ama cushicuychu (1:59)