Congregaciunchoga jaucala piwanpis caycashwan

Hermanulanchicunawan caycarga unay rey Davidnolami noganchipis ricacunchi. Paymi nergan: “Ricay, cuyay-munaypämi caycan wauguinwan pañinwan cuyanacur goyashanga” (Salmo 133:1). Ali goyäcushganchega jucninchi jucninchi rasunpa cuyanacushganchipitami caycan.

1. ¿Imataj gampäga almiracuypaj caycan Diospa marcancho?

Juc naciunpa aywacurga ichanga chaycho parlashgan rimaytaga tantianquichu, pero mayraj cushicurcunqui reuniunman aywar. Chaycho Testigucunaga charashgayqui publicaciuncunalapitami yachacäriycan. Y mana chaylachu, jina maypa aywarpis jucninchi jucninchi cuyanacushganchitami ricanchi. Ima naciuncho caycarpis lapanchimi Jehová Diosninchilata aduranchi, quiquinmi nergan “juc shongula sirvipäcamanga” (Sofonías 3:9).

2. ¿Imata rurashwan hermanunchicunawan jaucala caycänapaj?

“Lapan shonguyquiwan jucniqui jucniquipis cuyanacur cawapäcuy” (1 Pedro 1:22). Chayno Biblia nishgantaga cäsucunchi ‘payga cayno wacnomi’ nir hermanunchicunawan mana jamurpänacurmi. Ima marcapita captinpis ali reguinacurmi paycunawan juntacashwan. Pitapis shongulanchicho chiquipar despreciativo cashwanchu (leiriy 1 Pedro 2:17).a

3. ¿Imataraj ruranqui juc hermanuwan jagayächinacurga?

Jucninchi jucninchi cuyapänacurpis öraga juchasapa cashganchiraycurga pilawanpis ofendinacushwanchi. Chaymi Diospa Palabran cayno nimanchi: “Juchanchita Tayta Diosninchi mayna jungasha [gongashga]. Chay-jina nuwanchipis irmänunchipa juchanta ama yarparäshunchu” (leiriy Colosenses 3:13, Panao Biblia). Cutin cutin Jehovapa shongunta nanaycächiptinchipis payga perdunaycalämanchimi. Chauraga noganchipis ¡manachuraj hermanunchicunata perdunaycushwan! Pilatapis ofendishga carga amistanayquipaj jucla ayway (leiriy  Mateo 5:23, 24).b

SHUMAJ YACHACURCUNAPAJ

4. Juc marcapita captinpis jamurpashwanchu

Lapan hermanunchicunatami cuyayculanchi, ima casta captinpis o ima marcapita captinpis. Pero pilapis niptin ‘chayga nogapäga sasanomi’, ¿ima ninraj Diospa Palabran? Leipäcuy Hechos 10:34, 35 y caycunapita parlapacäriy:

• May chay runacunatapis Jehová chasquinmi Testiguncuna cananpaj. Gampis, ¿imanotaj ricanquiman lapan clase runacunata?

• Tiyashgayqui marcacho, ¿imataj nipäcun juc casta runacunapita? ¿Imataraj ruranquiman paycunano yarpar mana galaycunayquipaj?

Leipäcuy 2 Corintios 6:11-13 y caypita parlapacäriy:

• ¿Imataraj rurashwan cristiano masinchicunawan masraj cuyanacunapaj?

5. Ayca cutipis perdunanacuycäshun

Jehovaga perdunaycalämanchimi. Leipäcuy Salmo 86:5 y caycunapita parlapacäriy:

• Cay texto nishganno, ¿imano Diostaj Jehovaga?

• ¿Ima ninquimantaj perdunacoj Dios Jehová cashganpita?

• ¿Ima pasaptintaj öraga sasa canman hermanunchicunawan ali apanacunanchipaj?

Hermanunchicunawan cuyanacuycarla caycänapaj, ¿imata rurartaj Jehovano cashwan? Leipäcuy Proverbios 19:11 y caypita parlapacäriy:

• Pipis ofendishuptiqui o rabiachishuptiqui, ¿imatataj gam ruranquiman jaucala goyäcunayquipaj?

Öraga quiquinchipis waquincunataga ofendinchimi. ¿Chay pasaptin imata rurashwan? VIDEUTA ricapäcuy y caypita parlapacäriy:

VIDEO: Ima bendiciuncunata chasquinchi perdunacoj captinchi (6:01)

• Videucho hermana, ¿imatataj rurargan cristiana masinwan perdunanacunanpaj?

6. Ali rurashgancunalaman yarpay

Hermanunchicunawan reguinacuycarga ali rurashgancunapis o pantashgancunapis ricacämunmi. ¿Imanotaj ali rurashgancunalaman yarpashwan? VIDEUTA ricapäcuy y caypita parlapacäriy:

VIDEO: Ali runa canayquipäga calpachacunayquiraj (5:10)

• ¿Imaraj yanapäshunqui hermanucuna pantashgancunalaman mana yarparänayquipaj?

Jehovaga ali runa canapaj imano calpachacushganchitami rican. Leipäcuy 2 Crónicas 16:9a y caypita parlapacäriy:

• Ali cajlata rurashgayquilamanmi Jehová más yarparan, ¿imanotaj ricacunqui chayta musyar?

ICHIC YACHACUY

Perdunacoj captiquega y lapan hermanucunawan cuyacoj captiquega congregaciunchoga juc shongula caycar jaucala goyäcushun.

Yarpänapaj

• ¿Imanirtaj cuyacoj cashwan juc casta o juc marca hermanucunawanpis?

• ¿Imataraj ruranquiman juc cristianuwan jagayächinacushga carga?

• ¿Jehová perdunacoj cashgannolachuraj gampis waquincunata perdunanquiman? ¿Imanir?

MASLATA YACHACUNAYQUIPAJ

Jesusga yachachicurganmi waquincunata imanir mana juzganapaj. Chaypita yachacuy.

¡Nawiquipita guerutaraj jorguy! (6:56)

¿‘Disculpaycalämay’ nishunchuraj culpayoj mana caycarpis?

“Disculpacuptinchiraj piwanpis ali goyäcunchi” (Wilacamoj, 1 noviembre quilla, 2002)

¿Imanotaj waquin runacuna yachacush juc casta runacunata igualpa ricayta?

Pitapis juzgaychu shumaj manaraj reguirga (5:06)

Yachacuy imatataj pipis ruranman jagayächinacushga carga, congregaciuncho ali goyäcunapaj.

“Jagayächinacushga carpis cuyanacäriyla” (Wilacamoj, mayo 2016)