¿Mayashcanquichu?

¿Totora niraj papiropita unay tiempucho ruracämojchu barcucuna?

UNAY wichan maychicaj Egipto runacunaga ututu niraj papiro jananmanmi escribipäcoj; chaytashi Greciapita y Romapita runacunapis rurapäcoj.a Guelganalapächu manami cargan, barcucunaga chay plantacunapitash ruracaj.

2.500 watacunanona pasash, Isaías profetaga wilacurgan mayucuna cashgan ladupita ‘Etiopía runakunaqa ututupita rurashqa büquikunawan Nilo mayupa kachata’ mandashganta (Is. 18:1, 2).

Bibliaga Diospitami shamun, chaymi totora niraj papiro plantapita parlarga rasunpa cajta wilacun, unay yachaj runacunapis Biblia nishgannola wilacamun unay barcucuna imapita rurashga cashganta (2 Tim. 3:16). Unay Egipto naciuncho cay plantacunawan barcucuna imano ruracashganta canan ricarishun.

¿IMANOTAJ UTUTUNO PLANTAPITA BARCUCUNA RURACAJ?

Egipto marcacunacho cashgan panteuncunachoga taripäcushgami dibujo nirajcunata, chaychoshi ricacämoj totorano plantacuna imano shuntacashganta y chaywan barcucunata rurapäcushganta. Runacunaga shuntarcur shuntarcurmi wancuypa watapäcoj. Juclachacaptin jucnin jucnin shumaj camacaptenga manami wascapis pascacajchu. Juc libro wilacun chay rurashgan barcucuna 17 metrocunamanno chayashganta; ishcan laduncunapaj yacuta cumanapaj guerucunaga chuncapis, chunca ishcaypis carganmi (A Companion to Ancient Egypt).

¿IMANIRTAJ UTUTU NIRAJ PAPIROPITA BARCUCUNA RURACAJ?

Cay plantataga achcatami jorgupäcoj Egipto Nilo jutiyoj mayupita. Caycunawan barcucunata ruranapäga manami sasachu cargan. Tiempuwan waquincunaga barcuncunata maderapitana ruracarcärirgan, chayno captinpis waquin pescaj runacuna y waquincunapis rurapäcuycashgaraj jatun y ichic barcuncunata.

Papiropita rurashga barcucunataga achca watapami rurapäcurgan. Plutarco jutiyoj runapis wilacurganmi tiempuncho runacuna chay balsacunata utilizapäcuycashgantaraj, chay runaga cawargan unay cristianucuna cawashgan wichanmi.