¿Mayashcanquichu?

¿Ima impuestucunatataj Jesuspa tiempuncho runacuna pagapäcoj?

UNAYPITANA israelitacunaga Diospaj apapäcamoj guellayninta. Pero Jesús cawashgan wichanga nacaytaräshi judiucunaga imapäpis impuestucunataraj pagapäcoj.

Mayor runa judiucunaga ishcay dracma nishgancunata apapäcamoj tabernaculupaj y nircur templupäpis. Chay guellayga Herodes sharcachishgan templupäpis carganmi, chaycho sacrificiucunata ruranapäpis o mascunapäpis. Pedrutapis tapupäcurganmi chay impuestupaj Jesús ima nishganta; y Jesusga ali cashgantami nergan, y Pedruta mandargan juc monedata ashircur impuestuta pagananpaj (Mat. 17:24-27).

Chay wichanpis israelitacunaga diezmuncunata pagapäcojmi, chaytaga raquipäcoj cosechancunapita o ganashgancunapita (Lev. 27:30-32; Núm. 18:26-28). Pushacoj religiosucunaga chacrayoj runacuna lapanpitaraj diezmuta pagananpaj munapäcoj, “irbabuynapita, anispita, cominuspita” lapanta. Escribacuna fariseucuna imano ishcay cara cashgantami Jesusga nergan, pasaypa mana ali runa cashganta nergan (Mat. 23:23).

Judiucunaga Roma naciunpa maquinchomi carcaycargan, chaymi impuestuncunata Romapaj apachicärej. Chacrayojcajcunaga guellaywanpis o cosechashga cashganwanpis pagayta puedejmi. Chusco sacocunatano cosechashga carga, jucnin cajga impuestupäshi aywaj. Judiucunaga jucnin jucninmi impuestuta pagapäcoj. Chaychi fariseucunaga Jesusta tapurgan chay impuestuta paganapaj ali o mana ali cashganta, jinan hora Jesús cayno nergan: “Cesarpa cajtaga Cesarta goycuy. Tayta Diospa cajtaga Tayta Diosta goycuy” (Mat. 22:15-22).

Pipis imatapis rantipacunanpaj maymanpis apananpäga impuestutaraj paycunapis pagapäcoj. Chaytaga cobrapäcoj lamar cuchuncunacho, puenticunacho, tincoj caminucunacho, marcacunapa yaycunancunacho y mercaducunachopis.

Lapanta Roma naciunpaj paganapaj impuestucunaga achcami cargan, runacunapäga sasa pagaymi cargan. Tiberio mandacushganpaj parlarmi, Tácito jutiyoj runa wilacun ‘Siria y Judea sitiucunacho cawaj runacuna, impuestuta pagananpaj sasa captin, imano ruwacärishganta’.

Judiucunataga mana perdunaypami mastaraj impuestuncunata mañacärej, laquesapaj cawaynincuna cargan. Runacunaga yalinacärejrämi impuestuta cobranapaj carguta chasquinanpaj, pacapaylapa guellayta goj cajshi chay carguta chasquej. Mana chaylachu, cay carguyojcunaga yargaj runacuna carmi waquincunatapis contrataj impuestuta cobrananpaj, chayno paycunapis quiquincunapaj guellayta shuntacunanpaj. Chaychi Bibliapis nin Zaqueupa mandatuncho impuestuta cobraj runacuna cashganta (Luc. 19:1, 2). Chaymi runacunaga alapa chiquej impuestuta cobrajcunata.