Liejcuna tapucärishgan

Jehovapa testiguncuna pilawanpis casacuyta munarga, ¿internetlapa ashinmanchuraj chay warmita o runata?

Jehovaga munan pipis casacurir cushishgala y mana raquicaypa cawacunantami (Mat. 19:4-6). Gampis casacuyta munarga, ¿imanotaj ali majata taririnquiman? Chaylaraj piwanpis reguinacuycar o casacushgana carpis, Jehovami Camacojninchi car yanapämäshun ali cawacunapaj. Lapanchoga Bibliapa consejuncunami pushamäshun. Mä juc ishcaylatapis ricärishun.

Shongunchipaj parlarmi Biblia cayno nin: “¿Piraj tantiyanman llullapar engañaycashanta?” (Jer. 17:9). Warmi olgupis manaraj casacur ishcalan caycarga ichanga traicionero shongunraycur ima mana alicunata rurananpaj yarpachacur galaycunman. Y manaraj shumaj yarpachacur casacäriptenga tiempuwanga mana alimanpis chayaripäcunmanmi (Prov. 28:26). Chaymi casacunanpaj manaraj parlar shumajraj reguinacärinman.

Proverbios 22:3 cayno nin: “Alli tantiyacoj runaga mana alliman chayananpaj cashanta musyar witicunmi. Mana tantiyacoj runami ichanga mana cäsupaypa aywar fiyupa ñacayman chayan”. Internetlapa majanta ashishganraycurmi waquincuna laquesacho ushashga. Internetcho jäpa runacunaga engañacurmi guellaytapis suwacärish. Y cay runacunaga ¿pipa jutinchotaj parlapäcush? ‘Jehovapa testigun cä’ nirmi engañacärish.

Jinamanpis cay jäpa runacunaga imaycatami internetcho camacächishga ‘majayquita tarinayquipaj’ nir. Pero ima rurashgancunaga envanulami cashga. ¿Pïraj ali juiciunwanga juc maquinalata niycanga majanta ashipänanpaj? Biblia tantiachicushgan ichanga lapanchopis yanaparcamäshun ali nanilapa aywanapaj (Prov. 1:7; 3:5-7).

Proverbios 14:15 cayno nin: “Mana tantiyacojcunaga imatapis wiyashanta llapantami riguicurcun. Yarpaysapacunami ichanga imatapis manaraj rurar sumaj yarpachacunraj”. Juclaga manami ninchichu pipitapis ali warmi o ali runa cananpaj, reguishganchipitarämi canga. ¿Chauras internetlapachi paycunata reguishwan? Ichanga pipis ninman ‘aumi, mayna wilamash pï canganta, mayna fotuncunatapis apachicamash’; ¿pero chaylawannachuraj nishwan reguiycäna payta? Rasunpa cajchoga, manami. Waquincunaga manchacärishgaraj pï cashganta ricaycurga.

Salmuta escribejpis caynomi nergan: “Llullacunawanga imaypis manami goturashcächu. Janan shongu parlajcunawanpis manami goturashcächu” (Sal. 26:4). Aumi, maychicajmi internetlapaga rasunpa cajta wilacunchu. Imano cashgantapis pacapäcunmanmi, imano parlashganpis jucnomi canman. ‘Jehovapa testigunmi cä’ nirpis ichanga bautizacärishgarächu. O Testiguna carpis, ¿pogushga cristianunachuraj? ¿Jehovapa nawinpaj alichuraj caycan? ¿Hermanucunapis respetanchuraj y ali amigutanochuraj rican? (1 Cor. 15:33; 2 Tim. 2:20, 21). ¿Casacunanpäpis librichuraj caycan? Casacuyta munarga cay lapantarämi musyananchi, ichanga maypita cashganlatapis mana musyarga engañarpis engañaycamashwanmi (Prov. 15:22). Imanomi “pipis yügunchu ishcay casta uywataga”, chaynolami juc cristianuga yarpaylapis yarpanmanchu mana Testigo cajwan casacuytaga (2 Cor. 6:14; 1 Cor. 7:39).

¿Chauras imanotaj pipis ali majanta tariycunman? Reuniuncho o asambleachopis yapayna juntacarga alapa alimi canga waquincunawan reguinacunapaj.

Canan ichanga COVID-19 gueshyaraycur wichgapacushgaraj caycarga, internetlapa reuniuncho ricanacuycanchi. Chaychoga pipis reguinacunmanmi waquin soltero Testigucunawan, comentamushganta wiyar y Diosta imano adurashganta ricarpis (1 Tim. 6:11, 12). Waquincunapis tiempunta camacächinmi reuniunta usharir parlapäcunanpaj, o juc junajcunachopis juntacärinmi cushi cushila pasaripäcunanpaj. Caycunata rurar imarga, casacuyta munajcunaga shumajmi reguipäcunga waquin solterucunata (1 Ped. 3:4). Y reguinacuycarnaga ricacämungami imano jucnin jucninpis cashgan, Diosta imano sirviyta munapäcushganpis.

Aumi, galaycunanlapita Diospa Palabranta casucurga y tiempuwan casacushgana carpis cushi cushilami imaypis cawacärenga. Chaymi Bibliapis cayno nin: “Warmiyuq runaqa kushishqami kawan. Ali warmita [o ali runata] tarishqanqa Tayta Diospa bendicionninmi kaykan” (Prov. 18:22).