¿Mayashcanquichu?

¿Imanirtaj israelitacuna casaracunanpaj novianpa taytancunata pagajraj?

UNAYCHOGA casaracunanpaj cajcunaga runa cajmi novianpa taytancunata pagaj. ¿Imacunawantaj chayta ruraj? Valuryoj cosascunawan, uywacunawan o guellaywanpis. Öraga waquincuna novianpa taytanpämi aroj pagananpaj; chaynomi rurargan Biblia wilacushgan Jacob runa. Suedrunpäshi ganchis watacuna arurgan Raquelwan casaracunanpaj (Gén. 29:17, 18, 20). ¿Imanirtaj chayno rurapäcoj?

Juc yachaj warmi Carol Meyers nin: “Runa caj casaracunanpaj pagashganga cargan, novian taytancunawan arushgannola manana arunanpaj captinmi”. Chay pagashganga casaracushgacunapaj familiancuna juc familianola cananpaj y mayganpis sasacunapa pasaptenga yanapacärinanpämi cargan. Jina, pagashganga musyachicoj warmi cajta taytancuna mana ricänanpäna, paycunapa trucan runanna ricänanpaj.

Warmipaj pagashganga manami ninanchu imatapis rantishganno o ranticuycashganno cashganta. Instituciones del Antiguo Testamento librumi cayno nin: “Noviapa familianta imaycanopapis imalawanpis pagashganga warmita rantiycajnomi ricächicoj. Pero […] manami chaynochu cargan, mas bienga cargan novia cajpa familianta imalachopis yanapänanpämi”.a

Canan wichanpis, waquin naciuncunachoga jinalami noviapaj pagapäcun. Cristiano cajcunaga warmi wamran casaracunanpaj permitinanpäga alapa mana exigicuptenga, ali runa cashgantami ricächicunga (1 Cor. 10:32, 33; Filip. 4:5). Jina, guellaylapaj mana cashgantami ricächicunga (2 Tim. 3:2). Chaymanpis alapa chaninta noviapaj mana mañacuptenga, novio cajga manami ningachu ‘guellayta shuntanäpaj shuyarcushäraj casaracunäpaj’. Jina novio caj precursor captenga lapan tiempunwanraj arunanpaj, precursorno yanapacur caycashganta manami cachaycungachu.

Waquin marcacunachoga leycunatami camacächergan noviapaj imano pagapäcunanpaj. Y cristiano cajcunaga chay leycunata respetapäcunmi. ¿Imanirtaj cäsucärin? Jehovami Palabrancho mandacamun autoridäcuna camacächishgan leycuna contrancho mana caycaptenga cäsucärinapaj (Hech. 5:29; Rom. 13:1).