Jehová gamta alapa cuyashunqui

1. ¿Imanirtaj aunicushgayqui Jehovata imaypis sirvinayquipaj? (Fotucunatapis ricay).

MANARAJ bautizacur, ¿yarpanquicu mañacushgayqui hora Jehovata sirvinayquipaj nishgayquita? Chaytaga rurashcanqui Jehovata cuyar y reguirmi. Chaymi aunicushcanqui paylata imaypis sirvinayquipaj y cuyanayquipaj ‘lapan shonquykiwan, lapan voluntänikiwan, lapan yarpaynikiwan y lapan kalpaykiwanpis’ (Mar. 12:30). Chay junajpita canancama Jehovata masraj cuyanqui. Chaymi pipis tapushuptiqui “¿Rasunpacu Jehovata cuyanqui?” nir. “Aumi, imapitapis más Jehovalatami cuyä” nirinquiman.

2, 3. 1) ¿Imatataj Jehová munan? (Jeremías 31:3). 2) ¿Imata yachacushun?

² Ichanga pilapis tapushuptiqui “¿Seguruchu caycanqui Jehová cuyashushgayquita?” ¿Ima ninquimanraj? Capazchi shonguyquicho yarpanqui ‘nogataga Jehová cuyamänanta manami merecëchu’ nir. Chaymi imalatapis niyta puedinquimanchu. Juc hermana wamrala cashganpita mana pipis cuyashganta sienticurgan. Pay nin: “Jehovata cuyä lapan shongöwanmi y chaypitaga segurumi caycä, pero öraga yarpä nogata Jehová cuyamanchuraj” nir. Chauraga, ¿imaraj yanapäshunquiman Jehová cuyashushgayquita seguro caycänayquipaj?

³ Jehová munan cuyashushgayquita seguro caycänayquipaj (leiriy Jeremías 31:3). Chaymi paypa amigun canayquipaj munar yachachishushgayqui payta sirvinayquipaj. Y Jehovalata sirvinayquipaj aunicushgayquipita y bautizacushgayquipita payga masrajmi cuyashunqui. Aumi Jehovaga imaypis manami jaguishunquichu. Paypäga alapa valuryojmi caycanqui (Mal. 3:17). Chaymi apóstol Pablo seguro caycargan Jehová payta alapa cuyashganta y Jehová munan gampis Pabluno yarpänayquipaj. Pablo cayno nin: “Tayta Dios kuyamantsimi kawaptintsipis, wanuptintsipis, ima pasamaptintsipis y ima pasamänantsipaq kaptinpis. Tsaymi angilkunapis, ni supaykunapis, ni ima munayniyuq kaqkunapis, ni jana patsacho kaqkunapis, ni patsa rurincho kaqkunapis, ni Tayta Dios ima kamashqankunapis paypa kuyakuyninpita mana rakimäshuntsu.” (Rom. 8:38, 39). Canan, yachacushun imanirtaj seguro caycänanchi Jehová cuyamashganchita y imata rurananchi cuyamashganchipita masraj seguro caycänanchipaj.

IMANIRTAJ JEHOVÁ CUYASHUSHGAYQUITA SEGURO CAYCÄNAYQUI

4. ¿Imamantaj yarpänanchipaj Satanás munan, y imatataj rurashwan trampancunaman mana ishquinanchipaj?

⁴ Jehová cuyamashganchita seguro caycaptinchi, Satanaspa trampancunata mana cäsupäshunchu (Efes. 6:11). Satanás munan Jehová mana cuyamashganchita yarpänanchipaj, chaynopa Jehovata manana sirvinanchipaj. Pero Satanás nishganga manami rasunchu. Bibliaga nin Satanás engañacoj y fiyu cashganta, chaymi micanashga leonno caycashganta tincuchin (1 Ped. 5:8, 9). Leoncunaga defendiyta mana puedej uywacunata atacan. Chaynolami imayca problemapa pasaptinchi y shamoj tiempucho imano cawacunanchipaj yarpaptinchi, uticashga, laquishga unay mana ali pasamashganpita calpaynaj ricacuptinchi Satanás más atacämänanchipaj munaycan (Prov. 24:10). Chauraga Satanás trampancunaman mana ishquinanchipaj seguro caycänanchi Jehová cuyamashganchita (Sant. 4:7).

5. Jehová cuyamashganchita musyar, ¿payta masraj cuyashunchuraj?

⁵ Jehová cuyamashganchipita seguro caycar, paywan más amigo cashun. Jehová camamashganchi waquincunata cuyananchipaj y noganchitapis waquincuna cuyamänanchipaj. Pilapis cuyamaptinchega noganchipis paycunata cuyar galaycunchi. Chaymi Jehová cuyamashganchita y valoramashganchita musyar payta masraj cuyashun (1 Juan 4:19). Y Jehovata más cuyaptinchi paypis noganchita más cuyamäshun, chaymi Biblia nimanchi Jehovaman guelicuptinchi paypis noganchiman guelicamunga (Sant. 4:8). Canan yachacushun imata rurananchi Jehová cuyamashganchita seguro caycänanchipaj.

¿IMATARAJ RURANQUIMAN SEGURO CAYCANAYQUIPAJ JEHOVÁ CUYASHUSHGAYQUITA?

6. Jehová cuyashushgayquita mana seguro caycarga, ¿imataraj ruranquiman?

⁶ Jehovata imaypis mañacuy tantianayquipaj imanir gamta cuyashushgayquita (Luc. 18:1; Rom. 12:12). Capazchi cutin cutin Jehovata mañacunquiman cuyashushgayquita tantianayquipaj. Ayvecisga shonguyquicho yarpar galaycunquiman Jehová mana cuyashushgayquita, chay hora yarpanquiman Jehová alapa reguishushgayquita (1 Juan 3:19, 20). ‘Nogaga manami imapajpis valëchu’ nir yarparpis pay musyan lapan ali cajcunata rurashgayquita (1 Sam. 16:7; 2 Crón. 6:30). Chaymi Jehovata wilapay imano sienticushgayquita y mañacuy cuyashushgayquita convencido caycänayquipaj (Sal. 62:8). Canan ricärishun mañacushgayquino imacunata ruranayquipaj.

7, 8. ¿Imata nimanchi Salmos textucunacho Jehová cuyamashganchita seguro caycänanchipaj?

⁷ Jehová Palabranwan nishushgayquiman yäracuy. Jehová santo espiritunwan Biblia escribejcunata yanapargan pay imano cashganta escribinanpaj. Rey David Jehovapita cayno escribergan: “Lakikuqkunataqa TAYTA DIOS kuyapanmi. Ima ruraytapis mana kamäpakuqkunata paymi yanapan” (Sal. 34:18). Laquishga caycashgayqui hora capazchi yarpashcanqui ‘manami pipis tantiämanchu ni yanapämanchu’ nir. Ichanga Jehová aunishunqui laquishga caycaptiqui yanapäshunayquipaj listo caycashganta. Chaymi rey David Jehovapita caynopis escribergan: “Ayka kuti waqashqätapis musyaykankimi” nir (Sal. 56:8). Jehová alapa laquicun nacashgayquita y laquishga caycashgayquita ricar, pay gamta cuyashunquimi. Jehovapäga alapa valuryojmi caycanqui chaymi hasta wagashgayquipitapis musyan. Rey David Jehovata caynopis nergan: “Maypa aywaptïpis rikaykämankimi” (Sal. 139:3). Jehová lapan rurashgayquicunata rican, pero masraj rican ali rurashgayquicunata (Heb. 6:10). Pay munashganno lapanta ruraptiqui payga valuranmi.

⁸ Cay shumaj textucunawan Jehová niycäshunqui: “Gamta alapa cuyacö, gampaj alapa yarpachacö”. Ichanga, Satanás munan Jehová mana cuyashushgayquita yarpänayquipaj. Chauraga Jehová cuyashushgayquita mana seguro caycaptiquega cayman yarpanquiman: “¿Pïmantaj criyëman Satanasmancu o Jehovamancu?” (Juan 8:44; Sal. 31:5).

9. ¿Imata Jehová aunicun Payta cuyajcunata? (Éxodo 20:6).

⁹ Yarpay imano Jehová rican payta cuyajcunata. Jehová Moisesta y israelitacunata nishganman yarpay (leiriy Éxodo 20:6). Jehová cuyacoj cashganraycu cuyashga sirvejnincunata aunicun imaypis cuyananpaj (Neh. 1:5). Öraga yarpanquichi Jehová gamta mana cuyashushgayquita, chay horacho yarpay ‘noga Jehovata cuyä’ nir. Jehovata cuyashgayquiraycu calpachacunqui payta cushichinayquipaj, chaymi seguro caycanquiman Jehová alapa cuyashushgayquita (Dan. 9:4; 1 Cor. 8:3). Chauraga gam Jehovata cuyarga seguro caycay Jehová gamta cuyashushgayquita y payga manami imaypis jaguishunquichu.

10, 11. ¿Imataj Jehová munan Jesús wanushganpita yarpanayquipaj? (Gálatas 2:20).

¹⁰ Jesús wanushganman yarpay. Jehová churin Jesusta cachamurgan noganchiraycur wanunanpaj, chayga juc regalo japuynomi caycan (Juan 3:16). Aumi, gamraycurpis Jesús wanurgan. Mä yarparcushun apóstol Pablo imacunapa pasashganman. Pay manaraj cristiano car imayca mana alicunata rurargan, bautizacushganpitapis juchayoj cashganraycur imaycacunawan luchaycargan (Rom. 7:24, 25; 1 Tim. 1:12-14). Chayno captinpis Pabluga seguro caycargan payraycur Jesús wanushgantapis (leiriy Gálatas 2:20). Jehová santo espiritunwanmi Pabluta yanapargan chaycunapita guelgananpaj chaynopa noganchita yachachimänanchipaj (Rom. 15:4). Chaymi Jehová munan Jesús wanushganta gampaj juc regalo japuyno caycashganta ricanayquipaj. Chayno ricaptiqui seguro caycanqui Jehová alapa cuyashushgayquita.

¹¹ Jehová cay pachaman Jesusta cachamurgan noganchiraycur wanunanpaj, chaypita alapa agradecicunchi. Jina Jesús cay pachaman shamurgan Jehovapita rasunpa cajta yachachicunanpaj y imano Jehová wamrancunata cuyashganta yachachinanpäpis, chaypita canan yachacushun (Juan 18:37).

JEHOVÁ CUYASHUSHGAYQUIPITA JESÚS YACHACHICURGAN

12. ¿Imanirtaj seguro caycanchi Jesús Jehovapita rasunpa cajta parlashganpita?

¹² Jesús cay pachacho caycar Jehová imano cashganpita yachachicur cushish caycargan (Luc. 10:22). Jesús cay pachaman manaraj shamur cielucho taytanwan achca watapa caycargan y taytan imano cashganta shumaj reguirgan. Chaymi seguro caycanchi Jesús Jehovapita rasunpa cajta yachachicushganta. Jesús ricargan Jehová cuyashganta jana pachacho angelcunata y cay pachacho runacunatapis. Canan yachacushun Jesús nishganpita, Jehová cuyamashganchita seguro caycänanchipaj (Col. 1:15).

13. ¿Imanotaj Jehovata ricänanchipaj Jesús munan?

¹³ Jesús munan cuyacoj Taytanchitano Jehovata ricänanchipaj. Chaymi Jesús Jehovapita parlar Mateo, Marcos, Lucas y Juan librucunacho “Taytä” nergan 160 más cutichomi. Jina discipuluncunawan parlarpis nergan paycunapaj Taytan cashganta (Mat. 5:16; 6:26). Jesús cay pachaman manaraj shamur unay Diospa sirvejnincuna Jehovata nergan ‘Camacoj’, ‘Janacho caycaj Dios’, ‘Lapanpaj munayniyoj cashganta’ y jucnopapis gayapäcoj. Ichanga Jesús Jehovapita parlar cutin cutin Taytälanchi nergan, chauraga Jehová munan sirvejnincuna cuyacoj taytantano ricananchipaj. Canan yachacushun imanirtaj Jesús Jehovapita parlar “Taytä” nergan.

14. ¿Ima tincuchicuywan Jesús yachachergan Jehovapaj alapa valuryojmi cashganchita? (Mateo 10:29-31; dibujutapis ricay).

¹⁴ Puntataga yachacushun Jesús nishganpita Mateo 10:29-31 (leiriy) textucho. Cay texto wilamanchi juc pishgolapis wanushganta Jehová musyanmi. Pishgocuna Jehovata mana adurapäcuptinpis payga pishgocunata micuynin camaripan. Y noganchicunaga Jehovata cuyanchi chaymi pay alapa valuranmi, hasta ajchanchipis yupashgalami caycan. Aumi Jesús munan cada ununchita Jehová cuyamashganchita seguro caycänanchipaj.

15. Juan 6:44 textucho, ¿imata yachacunqui Jehovapita?

¹⁵ Canan yachacushun imata Jesús nergan Taytalanchi Jehovapita Juan 6:44 (leiriy) textucho. Cay texto tantiachicun Taytayqui Jehová ali shonguyoj caycashgayquita ricashga, chaymi yanapäshushcanqui payta reguinayquipaj y sirvinayquipaj (Hech. 13:48). Juan 6:44 textucho Jesús parlashganga capazchi cargan Jehová wilacushganta Jeremías 31:3 textupita. Chaycho Jehová cayno nergan marcanta: “Gamta alapa cuyar, nogaman witimunayquipaj pushamushcä” (Jer. 31:3; Oseas 11:4). Capaz yarpanqui ‘noga alita manami rurächu’ nir. Pero Jehová gamta alapa cuyashunqui, ali cajta rurashgayquicunata ricaycan.

16. 1) ¿Imata yachachicurgan Jesús, y imanirtaj payman yäracunquiman? 2) Jehovala ali tayta cashganta seguro caycänayquipaj, ¿imata ruranquiman? (“Jehovalami ali tayta caycan” recuadrutapis ricay).

¹⁶ Jesús yachachergan Jehová paylapa Taytalan mana cashganta, sinoga gampa Taytayquipis cashganta. Jesús munan Jehová cuyashushgayquita seguro caycänayquipaj. Chaymi Jehová mana cuyashushgayquita yarparga Jesús nishganman yarpay. Jesús rasunpa cajta parlargan y taytanta shumajmi reguirgan, chayraycu pay nishganman yäracunanchi (1 Ped. 2:22).

JEHOVÁ CUYASHUSHGAYQUITA SEGURO CAYCAY

17. ¿Imano yarpänanchita Satanás munan?

¹⁷ Jehová cuyamashganchipita seguro caycänanchi. Satanás imaycacunata ruran Jehovata manana sirvinanchipaj, payga munan Jehová mana cuyamashganchita yarpänanchipaj. Pero noganchega Satanastaga manami cäsupäshunchu (Job 27:5).

18. Jehová cuyashushgayquita seguro caycänayquipaj, ¿imatataj ruranquiman?

¹⁸ Yachacushgayquino Jehová gamta cuyashushgayquita, alapa valurashushgayquita convencido caycänayquipaj Payta mañacuy. Y Bibliapa textuncunata leircur shumaj yarpachacuy Jehová gamta alapa cuyashushgayquita. Ama gongaychu Jehovata cuyaptiqui payga imaypis cuyashunquimi. Gamta cuyashushpayquimi churinta cachamurgan wanunanpaj y Jesús nishganno Jehová gampa taytayquipis caycan. Chauraga pilapis tapushuptiqui: “¿Seguruchu caycanqui Jehová cuyashushgayquita?” Chay hora cayno ninquiman: “Aumi, Jehová cuyamanmi. Chayraycu cada junaj calpachacö Pay munashganno cawanäpaj”.