PREGUNTA 3
¿Jas kinbʼano rech kintzijon kukʼ ri nunan nutat?
¿AT JAS KABʼANO?
Chachomaj wajun jastaq: jun miércoles bʼenaq qʼij. Geoffrey, che kʼo 17 ujunabʼ, ya xukʼis ri uchak re tijobʼal are chi tiempo che kuxlanik. ¡Qas taqal che! Xutzij ri televisor xuqujeʼ xtʼuyiʼ pa ri utem che qas utz krilo.
Tekʼuriʼ, xaq kʼateʼ xok bʼi ri utat pa ri uchiʼja petinaq royowal.
«¡Geoffrey!» ¿Jas tajin kabʼano xaq tajin kasach atiempo che rilik televisión? Rajawaxik che katoʼ ri achaqʼ che ri uchak re tijobʼal. «¡Kʼo ta jumul kabʼan ri kbʼix chawe!».
«Xamaj chi jumul», kchaʼ Geoffrey rukʼ wichʼwitem.
Ri utat xqebʼ rukʼ xuqujeʼ xutaʼ che «¿Jas xabʼij?».
«Kʼo taj, tat», xchaʼ Geoffrey petinaq royowal.
Ri utat sibʼalaj petinaq royowal. «¡Kabʼij ta wariʼ chwe!», xchaʼ che.
Wet at, at Geoffrey, ¿jas kabʼan riʼ rech katopan ta pa wajun jastaq riʼ?
QAS CHACHOMAJ
We tajin kabʼinisaj jun chʼichʼ tekʼuriʼ katopan pa jun lugar che tzʼapim ri bʼe, katzukuj chi jun bʼe. Junam rukʼ wariʼ, katkunik katzukuj chi nikʼaj ubʼanik rech kattzijon kukʼ ri anan atat.
JUN KʼUTBʼAL:
«Kinkun taj kintzijon rukʼ ri nutat —kchaʼ Leah—. Jujun mul, qʼaxinaq chi jubʼiqʼ tiempo che tajin kintzijon rukʼ, tekʼuriʼ kutaʼ chwe: ‹Chasachaʼ numak ¿la kʼo kabʼij chwe?›».
LEAH KʼO OXIBʼ JASTAQ CHE KKUNIK KUBʼANO
Kuraq uchiʼ chrij ri utat.
Leah kubʼij: «¡Chinatatabʼej! ¡Rajawaxik ri kinbʼij chawe!».
Kchʼaw ta chi chrij ri xkʼulmatajik.
Leah kraj ta chik kchʼaw rukʼ ri utat chrij ri xkʼulmatajik.
Kutzukuj chi jun tiempo rech ketzijonik.
Leah ktzijon rukʼ ri utat chrij ri xkʼulmatajik are chiʼ qʼaxinaq chi jubʼiqʼ tiempo o kutzʼibʼaj pa jun wuj ri kuchomaj.
¿Jas kabʼij at che kubʼan Leah?
CHACHOMAJ WARIʼ: Ri utat ri Leah tajin kuchomaj jun chi jastaq xuchʼobʼ ta ri xkʼulmatajik. Wet Leah xuchaʼ ri opción A che kuraq uchiʼ chrij ri utat, ri utat kuchʼobʼ ta riʼ jasche jelaʼ kubʼano. Qastzij riʼ, che ktatabʼex ta ri Leah. Xuqujeʼ, kukʼut riʼ che nim ta kril wi ri utat (Efesios 6:2). Wajun jastaq riʼ ktobʼan ta chke ri e kebʼ.
Pa neʼ kʼo kʼi kʼax kariq pa ri bʼe, katkunik katzukuj ri kabʼano rech kattzijon kukʼ ri anan atat xuqujeʼ rech kichʼobʼ iwibʼ.
Pa neʼ ri opción B are ri kʼax ta ubʼanik, are ta ri más utz. ¿Jasche? Rumal che we kraj kusukʼumaj ri xkʼulmatajik, Leah rajawaxik ktzijon rukʼ ri utat. Xuqujeʼ ri utat rajawaxik kretaʼmaj ri kubʼan che utoʼik. We ketzijon taj kʼo ta keʼutoʼ wi.
Are kʼu rukʼ ri opción C, Leah kuya taj che kʼo kqʼaten ri tzijonem. Are kukoj uchuqʼabʼ rech kechʼaw chrij ri xkʼulmatajik are chi qʼaxinaq chi jubʼiqʼ tiempo. Xuqujeʼ kuchomaj kutzʼibʼaj jun wuj che ri utat, wariʼ weneʼ kubʼano che kunaʼ ta chi más kʼax.
Utzʼibʼaxik jun wuj kkunik kutoʼ ri Leah che ubʼixik che ri utat ri kraj kretaʼmaj. Are chiʼ ri utat ri Leah kusikʼij uwach ri wuj qas kuchʼobʼ riʼ ri tajin kukʼulmaj. Ri opción C are utz che ri Leah xuqujeʼ che ri utat. Weneʼ ketzijonik e kebʼ o kutzʼibʼaj jun carta, wariʼ utz junam rukʼ ri kubʼij ri pixabʼ re ri Biblia che kubʼij «chqabʼanaʼ bʼaʼ ri jastaq ri kakiyaʼ jamaril chqaxoʼl» (Romanos 14:19).
¿Jas nikʼaj chik jastaq kkun ri Leah kubʼano?
Chachomaj we kʼo jun jastaq kpe pa ajolom. Tekʼuriʼ, chachomaj ri utzilal che weneʼ kuya chawe.
QAS UTZ UBʼIXIK CHABʼANAʼ
Chnaʼtaj chawe: ri xabʼij at amaqʼel taj xaq junam rukʼ ri kkichʼobʼ e areʼ.
JUN KʼUTBʼAL:
Ri anan atat kkitaʼ chawe jasche kawaj taj katchʼawik. At kabʼij chke: «Kwaj taj kitaʼ wariʼ chwe».
Weneʼ e areʼ kkichomaj che: «Kinkubʼsaj ta chi nukʼuʼx chkij ri nunan nutat. Xaq xiw chke ri e awachiʼl kinbʼij wi ri kʼax kinriqo».
Chachomaj che kariq jun nimalaj kʼax tekʼuriʼ jun chke ri anan atat kraj katutoʼ, are kʼu at kabʼij che: «Kinatoʼ taj, kinkunik kinsukʼumaj nutukel».
¿Jas weneʼ kkita ri anan atat?
¿Jas riʼ ri qas utz kabʼij?