Xwetaʼmaj che ri Jehová sibʼalaj utz y kkuy qamak

RI OJER NUKʼASLEMAL:

Xinalax pa Montreal pa jun barrio che are sibʼalaj mebʼaʼ. In ri kʼisbʼal chkixoʼl ri ocho wachalal. Are chiʼ kʼateʼ seis ikʼ in kʼolinaq, ri nutat xkamik y ri nunan xaq utukel xkanaj kan che qilik.

Ri ubʼanik ri nukʼaslemal chi kʼa in nitzʼ na are ri utijik drogas, etzʼanem chrij pwaq y ri chʼayanik. Xeʼenwachilaj itzel taq winaq. Chiʼ 10 nujunabʼ, kinbʼan chi ri kitaqkil ri prostitutas y ri kkijal pwaq. Utz xinwilo che keʼensubʼ ri winaq. Chwe in wariʼ are junam rukʼ ri droga.

Are chiʼ 14 chi nujunabʼ qas kinkun chi che kisubʼik ri winaq. Jun kʼutbʼal, xinloqʼ kiʼ taq mulqʼabʼ, relojes y pulseras che tzʼajom che oro, y xintzʼibʼaj chrij che are 14 quilates, wariʼ kinkʼayij pa taq ri bʼe y pa taq ri estacionamientos kech ri carros pa ri centros comerciales. ¡Kʼax ta xinbʼan che uchʼakik rajil! Kʼo jumul xinchʼak 10,000 dólares canadienses pa jun qʼij.

Chiʼ 15 chi nujunabʼ, xinesax lo pa ri ja jachiʼ in kʼo wi, rumal che kʼo ta chi wachoch. Xinwar pa taq ri bʼe, pa ri parques o cho kachoch ri e wachiʼl.

Kʼi taq mul ri policía xinkikʼam bʼik rumal che keʼensubʼ ri winaq. Are kʼu rumal che xa ta welaqʼam ri kinkʼayij, rumal laʼ kinkanaj ta kan pa ri cárcel. Paneʼ xintoj numultas rumal che kʼo ta nulicencia che ri nukʼayij y che keʼensubʼ ri winaq. Kʼo ta chi chuwach kinxeʼj wi wibʼ; xinchakun kukʼ ri kkijal pwaq. Wajun chak riʼ xibʼibʼal ubʼanik, rumal laʼ jujun taq mul xinkʼam bʼi pistola. Xuqujeʼ xinchakun kukʼ itzel taq winaq.

RI BIBLIA XUKʼEX RI NUKʼASLEMAL:

Kʼo 17 nujunabʼ are chiʼ nabʼe mul xinta chrij ri Biblia. Junam ja oj kʼo wi rukʼ ri nunovia, ri areʼ xumajij retaʼmaxik chrij ri Biblia kukʼ ri testigos rech Jehová. Are kʼu rumal che utz ta kinta ri kubʼij ri Biblia, xinya kan ri nunovia y xinbʼe rukʼ jun chik che xuqujeʼ tajin kinchʼabʼej.

Are kʼu ri jun chi ali xuqujeʼ xumaj jun etaʼmanik kukʼ ri testigos rech Jehová. Sibʼalaj xinmayo rumal che xukʼex ri ubʼantajik: xux jun utzalaj winaq. Jun qʼij xinkisikʼij rech kinbʼe pa ri kiriqbʼal ibʼ, chi xinbʼek xewil winaq che jalajoj kibʼantajik: sibʼalaj utz xkibʼan che nukʼulaxik y che e utz taq winaq. Are chiʼ kʼa inakʼal na xkʼut ta loqʼoqʼebʼal chwe, ri nufamilia nim ta xinkil wi. Are kʼu qas utz xwil ri loqʼoqʼebʼal che xkikʼut ri testigos rech Jehová chwe. Are chiʼ xkitzujuj jun etaʼmanik re ri Biblia chwe, aninaq xinkʼamo.

Ri xinwetaʼmaj pa ri Biblia xukol ri nukʼaslemal. Nuchomam ubʼanik jun elaqʼ kukʼ nikʼaj chi alabʼom, rumal che kajwataj 50,000 dólares chwe rech kintoj ri nukʼas rech ri etzʼanem. ¡Are kʼu xinbʼan ta chik! Ri e kebʼ xebʼe pa ri elaqʼ, jun chke xkamisaxik y ri jun chik xkʼam bʼi pa cárcel.

Ri etaʼmanik re ri Biblia xukʼut chnuwach che rajawaxik kinkʼex ri nukʼaslemal. Jun kʼutbʼal pa 1 Corintios 6:10, ri Biblia kubʼij: «Mawi ri elaqʼomabʼ, mawi ri kkirayij ri jastaq ke nikʼaj winaq chik, mawi ri keqʼabʼarik, mawi ri keyoqʼonik, mawi ri kkimaj jastaq ke nikʼaj winaq chik, konojel waʼ man kkechbʼej ta ri rajawbʼal ri Dios». Are chi xinsikʼij wajun versículo riʼ, xinoqʼik. Xwilo che rajawaxik kinkʼex ri nukʼaslemal (Romanos 12:2). Rumal che sibʼalaj kinkʼanarik y utz ta in bʼenaq pa ri nukʼaslemal.

Are kʼu xwetaʼmaj che ri Jehová sibʼalaj utz y kkuy qamak (Isaías 1:18). Xinbʼan nuchʼawem che rukʼ ronojel wanimaʼ, xintaʼ che rech kinutoʼ chuwach ri nuvicios y kinkʼex ri nukʼaslemal. Rukʼ ri utobʼanik xinkunik xinya kan ri nuvicios. y ri más nim ubʼanik are che xojkʼuliʼ rukʼ ri nunovia.

Pa tiempo riʼ kʼo chi 24 nujunabʼ, y kʼo chi oxibʼ walkʼwal. Rumal laʼ xwaj xinriq jun utz nuchak rech kinya chke ri kajwatajik. Are kʼu rumal che xinbʼe ta pa ri tijobʼal kʼo ta wetaʼmabʼal chrij jun chak. Jumul chik xintaʼ tobʼanik che ri Jehová rech kinriq nuchak y xinbʼe che utzukuxik. Pa ri entrevistas, xinbʼij chke ri winaq che kwaj taj kinbʼan elaqʼ y che kwaj kinkʼex ri nukʼaslemal. Jujun taq mul, xinbʼij chke che tajin kyaʼ etaʼmanik re ri Biblia chwe rech kinux jun utz winaq. Are kʼu konojel xinkixutuj. Pa ri kʼisbʼal entrevista ri achi xubʼij chwe: «Wetaʼm taj jasche, are kʼu kinchomaj che utz we kinya achak». Qas wetaʼm che are waʼ ri xubʼan ri Jehová che nutoʼik. Majaʼ naj, xojux testigos rech Jehová rukʼ ri wixoqil.

RI TEWCHIBʼAL CHE NURIQOM:

Inkʼaslik rumal che tajin kinbʼan pa ri nukʼaslemal ri kubʼij ri Biblia y tajin kinwesaj uwach ri Cristo. Kʼo jun jeʼlalaj nufamilia y kʼo jun utz retaʼmabʼal nukʼuʼx, rumal che wetaʼm che Jehová xukuy ri numak.

Catorce junabʼ chik tajin kinpatanij ri Jehová pa tiempo completo: tajin keʼintoʼ ri winaq rech kkichʼobʼ ri kubʼij ri Biblia. Y majaʼ naj, ri wixoqil xuqujeʼ xumaj ri tiempo completo. Pa ri kʼisbʼal treinta junabʼ e nutoʼm 22 wachiʼl pa ri nuchak rech keʼux testigos rech Jehová. Kimik tajin kinbʼe na pa ri centros comerciales, are kʼu xa ta elaqʼ kinbʼanaʼ. Y jujun taq mul kinbʼij chke ri winaq ri utzalaj tzujunik che uyaʼom ri Dios chqe: Ri utzalaj uwach Ulew jachiʼ e kʼo ta chi elaqʼomabʼ (Salmo 37: 10, 11).