Cheqakʼamaʼ che kʼutbʼal ri e ajqʼaxal tzij: Amós
1. ¿Jasche kojutoʼ ri kʼutbʼal rech ri Amós?
1 ¿La kʼo jumul achomam che katkun taj katzijoj ri utzij ri Dios xa rumal che at mebʼaʼ o xatbʼe ta pa jun nim tijobʼal? We je riʼ, ri kʼutbʼal rech ri Amós kuya achuqʼabʼ. Ri areʼ are jun achi ajyuqʼ che mebʼaʼ xuqujeʼ kchakun jujun ikʼ re ri junabʼ che tikoʼn, are kʼu ri Jehová xuya jun chak che, are che kutzijoj tzij nim ubʼanik (Amós 1:1; 7:14, 15). Xuqujeʼ kimik ri Jehová keʼukoj winaq che e mebʼaʼ che utzijoxik ri utzij (1 Cor. 1:27-29). ¿Jas nikʼaj chik kojutoʼ wi ri xubʼan ri Amós rech kqatzijoj ri utzij ri Dios?
2. ¿Jasche kojkunik ko kojtakʼik chiʼ kbʼan kʼax chaqe rumal utzijoxik ri utzij ri Dios?
2 Pa neʼ xbʼan kʼax che ko xtakʼik. Chiʼ ri Amós xutzijoj ri kbʼan na chike ri lajuj tribus che e kʼo pa relebʼal kaqiqʼ re ri tinamit Israel, ri Amasías —ri kojol tabʼal toqʼobʼ chkiwach ri tyox pachaʼ chikop— xubʼij che, che kbʼek xuqujeʼ kuya kan ri tinamit, rumal che e areʼ kʼo chi ri kikojonik (Amós 7:12, 13). Xuqujeʼ rech ri ajawinel Jeroboán kuqʼatej ri uchak ri Amós, ri Amasías xukʼex ri xubʼij ri qʼaxal tzij (Amós 7:7-11). Are kʼu ri Amós xuxibʼij ta ribʼ. Kimik, jujun winaq rech ri kojonem kkitzukuj tobʼanik kukʼ ri qʼatal taq tzij rech kkibʼan kʼax che ri utinamit ri Dios. Tekʼuriʼ, ri Jehová kujikibʼaʼ ubʼixik che kʼo ta jun kamisabʼal kkunik kubʼan kʼax chaqe (Is. 54:17).
3. Ri kqaya ubʼixik kimik, ¿jas kebʼ jastaq rukʼam?
3 Xuya ubʼixik ri uqʼatoj tzij ri Dios xuqujeʼ ri tewchibʼal che kpe na. Pa neʼ ri Amós xuya ubʼixik ri uqʼatik tzij pa kiwiʼ ri lajuj tribus rech Israel, pa kʼisbʼal re ri wuj che kʼo pa ri Loqʼalaj Pixabʼ che kojom ri ubʼiʼ che xutzʼibʼaj che ri Dios kutewchij na xuqujeʼ kusukʼumaj ri jastaq pa ri utinamit (Amós 9:13-15). Oj xuqujeʼ kqaya ubʼixik ri «qʼij re qʼatoj tzij» re ri Dios, wariʼ xa jun chike ri «utzalaj taq tzij» re ri rajawibʼal che rajawaxik kqaya ubʼixik (2 Ped. 3:7; Mat. 24:14). Are taq chiʼ ri Jehová kusachisaj kiwach ri e itzel pa ri Armagedón, rukʼ wariʼ kumajij usukʼumaxik ri uwach Ulew rech kux chi utz (Sal. 37:34).
4. ¿Jasche qetaʼm che kojkunik kqabʼan ri urayibʼal ri Jehová?
4 Chiʼ kqatzijoj ri utz taq tzij kʼo jujun taq mul kqariq kʼax. Wariʼ kubʼan chaqe che kʼax kqariq che ubʼanik ri xqatzujuj che ri Jehová chiʼ xqajach ri qakʼaslemal xuqujeʼ che kqaj kqabʼan ri kraj (Juan 15:19). Pa neʼ kqariq kʼax, qas qetaʼm che ri Dios kuya ta kan qatoʼik rech kojkunik kqabʼan ri urayibʼal, junam rukʼ ri xubʼan che Amós (2 Cor. 3:5).