Utz chqabʼanaʼ che ukojik ri revistas che ojer chik elinaq
Kʼo ta upatan ri revista we xa kqakʼolo o we kqakʼaq bʼik, rumal laʼ utz che kqaya chke ri winaq. Weneʼ xa jun revista kubʼano che ri winaq kraj kretaʼmaj chirij ri qastzij xuqujeʼ kutaʼ ri utobʼanik ri Jehová (Rom. 10:13, 14). Waral kʼo jujun jastaq che kojutoʼ rech utz kqabʼan che ukojik ri revistas che qas ta e kʼakʼ.
Are chiʼ kojbʼe che utzijoxik ri utzij ri Dios pa lugares che amaqʼel taj kojbʼek, kojkunik kqaya kan ri revistas pa taq ri ja che e kʼo ta winaq chupam, jachiʼ kilitaj ta wi.
Are chiʼ kqatzijoj ri Utzij ri Dios pa taq bʼe o ri ketakʼiʼ wi ri chʼichʼ, kojkunik kqataʼ chke ri winaq tajin kkeyaj ri chʼichʼ we kkaj kkisikʼij uwach ri wuj xuqujeʼ kqakʼut jujun revista chkiwach rech e areʼ kkichaʼo.
Are chiʼ kojbʼe che uchʼajik ri qatzʼyaq, che uqupixik qawiʼ, rukʼ jun ajkunanel o pa jun chi lugar, che e kʼo pa ri territorio rech ri congregación, kojkunik kqaya kan jujun revistas jachiʼ keʼeyen wi ri winaq. Kʼi taq mul, we kʼo ri rajaw ri lugar, utz che kojchʼaw rukʼ rech kqataʼ che we utz kqaya kan ri revistas. We kʼo chi jujun revistas chilaʼ, are utz che kqayaʼ ta chi kan nikʼaj.
Are chiʼ majaʼ kojbʼe che kisolixik ri winaq, chojchoman chrij ri kkaj. ¿La e kʼo kalkʼwal? ¿La utz kkilo kewakatik? ¿La utz kkil ri e kotzʼiʼj? Utz che kqil ri kʼutunem che kʼo chupam ri revistas weneʼ kʼo jun kʼutunem che utz kqaya kan chke.
Are chiʼ kojtzijon chi jumul rukʼ ri winaq che qʼaxinaq chi kebʼ oxibʼ ikʼ che qariqom ta pa rachoch, kojkunik kqakʼut jujun chke ri revistas che qayaʼom ta kan chke.