Chqakojoʼ qachuqʼabʼ rech kojbʼeyetaj taj
1. ¿Jas kubʼan ri Jehová che ukʼutik che kbʼeyetaj taj?
1 Jehová kbʼeyetaj taj. Jun kʼutbʼal, kuya ri utobʼanik chke ri rajpatanelabʼ chiʼ qas kajwataj chke (Heb. 4:16). Xuqujeʼ kuya ri kajwataj chqe pa ri qakojonik qas pa ri qʼij (Mat. 24:45). Rumal laʼ, qas qetaʼm che ri qʼij re ri royowal kopan pa «ri qʼijol ri rajawaxik» (Hab. 2:3). ¡Sibʼalaj kuya utzilal chqe che Jehová kbʼeyetaj taj! (Sal. 70:5.) Are kʼu, rumal che oj ajmakibʼ xuqujeʼ kʼo kʼi jastaq kqabʼano, kʼo jujun mul kojkun taj kqakowij. ¿Jasche rajawaxik kqakoj qachuqʼabʼ rech kojbʼeyetaj taj?
2. ¿Jasche kuya uqʼij ri Jehová we chanim kojopanik?
2 Pa we kʼisbʼal taq qʼij riʼ, ri winaq xaq xiw kkichomaj kibʼ xuqujeʼ kkijikʼ ta kibʼ, keʼok ta il rech chanim keʼopanik (2 Tim. 3:1-3). Rumal laʼ chiʼ chanim kojopan pa ri qachak, pa qataqkil xuqujeʼ pa ri riqbʼal ibʼ, ri winaq kkilo, xuqujeʼ kuya uqʼij ri Jehová (1 Ped. 2:12). ¿La chanim kojopan pa ri qachak are kʼu matam kojopan che ubʼanik ri jastaq che kʼo ubʼanik rukʼ ri qakojonik? Chiʼ chanim kojopan pa ri riqbʼal ibʼ, chiʼ majaʼ kbʼan ri bʼixonem xuqujeʼ ri chʼawem, kqakʼutu che kqaj kqabʼan qe ri kubʼan ri Qatat che kʼo pa ri kaj (1 Cor. 14:33, 40).
3. ¿Jasche kqakʼutu che nim kqil wi ri nikʼaj chik chiʼ kojbʼeyetaj taj?
3 Chiʼ kojbʼeyetaj taj xuqujeʼ kqakʼutu che nim keqil wi ri qachalal (Filip. 2:3, 4). Chiʼ chanim kojopan pa ri riqbʼal ibʼ, xuqujeʼ ri riqbʼal ibʼ rech utzijoxik ri utzij ri Dios, kubʼano che ri qachalal kekunik qas kkitatabʼej ri kbʼixik. We amaqʼel matam kojopanik, weneʼ kqabʼano che ri e qachalal kkilo che kqachomaj che ri qatiempo are más nim ubʼanik chuwach ri kitiempo e areʼ. We kojbʼeyetaj taj kqakʼutu che oj ajchakibʼ, utz ubʼanik ri jastaq kqabʼano xuqujeʼ kekun ri winaq kkikubʼsaj kikʼuʼx chqij, ri nikʼaj chi winaq nim kkil wi ri bʼantajik riʼ.
4. We amaqʼel matam kojopanik, ¿jas kojkunik kqabʼano?
4 We amaqʼel matam katopan pa taq ri lugares, chachomaj jasche. We utz uchomaxik ri jastaq kabʼano, katkun riʼ kabʼan ri achak qas pa ri utiempo (Ecl. 3:1; Filip. 1:10). Chataʼ che ri Jehová che katutoʼ (1 Juan 5:14). Chiʼ kojbʼeyetaj taj kqakʼutu che nim kqil wi ri kebʼ taqanik che más nim ubʼanik rech ri Taqanik: are uloqʼoqʼexik ri Jehová xuqujeʼ ri qajil qatzʼaqat (Mat. 22:37-39).