Ri xkitzʼibʼaj lo ri Jupuq Ajkʼamal bʼe cho ronojel uwach Ulew

Loqʼalaj taq qachalal:

«Amaqʼel kujmaltyoxin che ri Dios rumal iwech iwonojel. Kixqanataj pa taq ri qachʼawem rukʼ Dios. Chuwach ri Dios qaTat, kanataj chqe chi ix chakuninaq rukʼ kojonik, ibʼanom kʼaxalaj chak rukʼ loqʼoqʼebʼal kʼuʼx. Kanataj chqe chi man kiyaʼ ta kan ri kuʼlbʼal ikʼuʼx chrij ri Qajaw Jesucristo, puneʼ kiriq kʼax.» (1 Tes. 1:2, 3.) ¡Ri e tzij riʼ qas kkikʼut ri kqanaʼ chiwe! Sibʼalaj kqamaltyoxij che ri Jehová che ix kʼo qukʼ pa ri utinamit xuqujeʼ ri utzalaj chak che tajin kibʼano.

Pa ronojel ri junabʼ che xqʼaxik «ix chakuninaq rukʼ kojonik» xuqujeʼ ibʼanom «chak rukʼ loqʼoqʼebʼal kʼuʼx» pa ri uchak ri Ajawbʼal. Kʼi chiwe iwilom ri unimarisaxik ri ichak. Jun kʼutbʼal, jujun e bʼenaq pa taq lugares jachiʼ kʼo wi más rajawaxik, weneʼ pa ri kitinamit o pa jun chik. Nikʼaj chik kiyaʼom ubʼixik ri utzalaj taq tzij rukʼ jun mesa o jun carreta. Xuqujeʼ kʼi chke xkibʼan ri precursorado auxiliar pa taq ri ikʼ rech ri Unaʼtabʼalil ri ukamikal ri Jesús, pa ri ikʼ che xopan ri ajsolinel pa ri congregación o pa ri chak che nim ubʼanik che xbʼan pa ri agosto 2014. Kqabʼij chiwe che sibʼalaj utz ri tajin kibʼano rumal che rukʼ ronojel ri iwanimaʼ kipatanij ri Jehová rukʼ ri kixkunik kibʼano (Col. 3:23, 24). Sibʼalaj kqamaltyoxij che ri Dios rumal che «ix chakuninaq rukʼ kojonik».

Xuqujeʼ sibʼalaj nim kqil wi ri «chak rukʼ loqʼoqʼebʼal kʼuʼx» che kibʼan che uyakik ja che kkoj che uqʼijilaxik ri Dios. Rumal che ri utinamit ri Jehová tajin kkʼiyik, ri e ja riʼ sibʼalaj kajwatajik (Is. 60:22). Xaq xiw junabʼir ri kajilabʼal ri ketzijon ri utzij ri Dios xopan pa 8.201.545, xuqujeʼ ronojel taq ikʼ xyaʼ 9.499.933 etaʼmanik chrij ri Biblia. Rumal che sibʼalaj e kʼiynaq ri kajilabʼal ri winaq che e kʼo pa ri utinamit ri Jehová, rajawaxik knimarisaxik o ksukʼumax kʼi sucursales. Xuqujeʼ wariʼ kraj kubʼij che are rajawaxik kbʼan más ja rech Ajawbʼal. Xuqujeʼ pa kʼi chke ri tinamit rajawaxik kbʼan ja rech traducción rech ri e qachalal che kkiqʼaxej tzij pa nikʼaj chik chʼabʼal kekʼojiʼ jachiʼ e kʼo wi ri winaq che kechʼaw pa kichʼabʼal.

Rumal ri qilom chik, ¿jas kojkunik kqabʼano rech kojtobʼan pa ri e chak riʼ? Weneʼ jujun chqe kojkunik kqaya ri qatiempo rech kojtobʼan che wa chak riʼ. Are kʼu, pa neʼ qetaʼm chrij uyakik ja o qetaʼm taj, qonojel kojkunik kojtobʼan rukʼ ri jastaq qe che nim ubʼanik (Prov. 3:9, 10). Chiʼ majaʼ kbʼan ri tabernáculo, ri israelitas xkikʼam bʼi sibʼalaj kʼi jastaq che kkoj che ri chak rumal laʼ xbʼixik che kkikʼam ta chi loq (Éx. 36:5-7). Kʼutbʼal che e kʼo pa ri Biblia che e junam rukʼ wariʼ kubʼano che kopan pa ri qanimaʼ xuqujeʼ kubʼano che kqabʼan qe. Loqʼalaj taq qachalal, rumal ri toʼnik kiya che wajun loqʼalaj chak riʼ are chi jun rumal che kqamaltyoxij che ri Jehová.

Jun jastaq che sibʼalaj kopan pa qanimaʼ are che ri qachalal kichʼijom kʼi kʼax xuqujeʼ kiyaʼom ta kan upatanixik ri Dios. Jun kʼutbʼal, xumaj lo pa ri junabʼ 1950, ri alabʼom Testigos rech Corea del Sur e tzʼapim pa cheʼ pa kʼi junabʼ o pa kebʼ oxibʼ qʼij rumal ri kinimanik che ri utaqanik ri Dios. Qʼaxinaq chi kʼi taq junabʼ kichʼijom wajun kʼax riʼ are kʼu kiyaʼom ta kan ubʼanik sukʼilal. Rumal che kichʼijom ri kʼax sibʼalaj kuya uchuqʼabʼ ri qakojonik.

Pa Eritrea, oxibʼ chke ri qachalal qʼaxinaq chi juwinaq junabʼ che e tzʼapal pa cheʼ. Xuqujeʼ e kʼo qachalal ixoqibʼ rukʼ ri kal e yaʼom pa cheʼ pa kebʼ oxibʼ qʼij. Pa neʼ sibʼalaj kojom chuqʼabʼ che kitoʼik are kʼu kimik e kʼo na pa wajun kʼax riʼ. Pa neʼ tajin kkiriq ri kʼax riʼ, ri e loqʼalaj taq qachalal kiyaʼom ta kan ukʼutik sukʼilal. Kikʼutum sukʼilal pa neʼ kiriqom sibʼalaj kʼax. Oj kqabʼan chʼawem pa kiwiʼ (Rom. 1:8, 9).

Kʼi chiwe ix kʼo ta pa cheʼ rumal ri ikojonik. Are kʼu kiriq kʼax rumal ri rijobʼik, ri yabʼil, ri kkibʼan ri familia che e kojonel taj xuqujeʼ nikʼaj chik kʼax che kʼot nijun chik retaʼm. Are kʼu, kiya ta kan upatanixik ri Jehová (Sant. 1:12). ¡Utz ri tajin kibʼano! Rumal che ichʼijom rukʼ sukʼilal ri kʼax iriqom are chi jun rumal che kqamaltyoxij che ri Jehová.

Qastzij wi: ix chakuninaq rukʼ kojonik, ibʼanom chak rukʼ loqʼoqʼebʼal kʼuʼx xuqujeʼ ichʼijom ri kʼax rumal ri jastaq riʼ sibʼalaj kqamaltyoxij che ri Jehová rumal che ri areʼ sibʼalaj utz (Sal. 106:1). Sibʼalaj kixqaj xuqujeʼ kqataʼ che ri Jehová pa chʼawem che kuya ichuqʼabʼ, kixutoʼ xuqujeʼ kixutewchij rech kixkunik kipatanij pa jun kʼaslemal che kʼot ukʼisik.

Ri iwachalal,

Jupuq Ajkʼamal bʼe cho ronojel uwach Ulew kech ri Testigos rech Jehová