QAKʼASLEMAL RI OJ CRISTIANOS

Jun kʼakʼ ubʼanik ri riqbʼal ibʼ pa ri semana

Kumaj pa 1 rech enero re ri junabʼ 2018, pa ri riqbʼal ibʼ pa ri semana kkil jujun notas, wachbʼal xuqujeʼ videos re etaʼmanik rech ri Traducción del Nuevo Mundo de las Santas Escrituras (nwtsty), che kʼo pa Internet, pa neʼ wajun etaʼmanik riʼ majaʼ kʼo pa qachʼabʼal. Qastzij wi, che wajun tobʼanik riʼ ktobʼan chqe are chiʼ kqatijoj qibʼ che ri riqbʼal ibʼ. Are kʼu ri más nim ubʼanik kubʼano che kojqebʼ más rukʼ ri Jehová, ri utzalaj Qatat.

NOTAS RE ETAʼMANIK

Ri e notas re etaʼmanik ktzijon chrij ri kibʼanom ri winaq ojer, ri lugar e kʼo wi xuqujeʼ ri kichʼabʼal ri winaq che kuya ubʼixik ri versículos rech ri Bilia.

Mateo 12:20

Utzaʼm chaj che kbʼuquwik: Ri e chaj che kekoj pa taq ri ja ojer e kʼo pa lameʼt re xaqʼoʼl yaʼom aceite re oliva chupam. Ri aceite kpaqiʼ pa utzaʼm ri mechaʼ rumal laʼ kuya saqil. Ri tzij che qʼaxem pa griega areʼ «ri utzaʼm chaj ri kbʼuquwik» kuya kubʼij jun mechaʼ kbʼuqʼuwik rumal che kkanaj kan ri uqʼaqʼil che pa neʼ tajin kchup ri chaj o ya xchupik. Junam kubʼij pa ri bʼim kanoq pa ri Isaías 42:3, Jesús kel na ukʼuʼx; areʼ kresaj ta kubʼsal kʼuʼx chke ri winaq che kkibʼan ta nim che kibʼ xuqujeʼ ri kiriqom kʼax.

Mateo 26:13

Qastzij; qastzij wi: Ri tzij amén pa griego, are ri e tzij re ri amén hebreo, che kraj kubʼij «jeʼ chbʼanoq» o «qastzij wi». Jesús amaqʼel xukoj ri tzij riʼ are chiʼ xuya ubʼixik chrij jun jastaq, tzujunik o jun bʼim kanoq. Rukʼ wariʼ kukʼutu che ri xubʼij e qastzij xuqujeʼ kuya kkubʼsax kʼuʼx chrij. Kbʼixik che ri ukojik xubʼan ri Jesús che ri tzij «qastzij wi» o «amén» xaq xiw kriqitaj pa ri loqʼalaj wuj. Are chiʼ kriqitaj kamul ri tzij (amén amén), junam che kriqitaj pa ri Evangelio rech Juan, ri tzij riʼ che Jesús xukojo kraj kubʼij «qastzij qastzij» (Jn 1:51).

WACHBʼAL XUQUJEʼ VIDEOS

Wachbʼal, ilustraciones, videos che kchʼaw taj xuqujeʼ videos re animación che kʼo pa ri computadora kukʼut ri jastaq che kʼo pa ri Biblia.

Betfagué, ri juyubʼ re Olivos xuqujeʼ Jerusalén

Wajun alaj video riʼ kukʼut ri bʼe che kopan pa Jerusalén pa ri este, kumaj pa ri et-Tur che kʼo kimik —che, kchomaxik che, are ri Betfagué che kubʼij ri Biblia— kopan kʼa sibʼalaj pa uwiʼ ri juyubʼ re Olivos. Betania kʼo pa ri este re Betfagué, pa ri oriente che kʼo chuxeʼ ri juyubʼ Olivos. Are chiʼ kebʼe pa Jerusalén, Jesús xuqujeʼ ri rajtijoxelabʼ chiʼ kok ri aqʼabʼ amaqʼel kekanaj kan pa Betania. Kimik kriqitaj pa wajun lugar riʼ ri tinamit riʼ-Ázariyeh (Riʼ Éizariya), bʼiʼaj árabe che kraj kubʼij «Ri ulugar ri Lázaro». Qetaʼm che Jesús xkʼojiʼ pa kachoch ri Marta, María xuqujeʼ Lázaro (Mt 21:17; Mr 11:11; Lu 21:37; Jn 11:1). Are chiʼ Jesús kel bʼi pa kachoch ri e rachiʼl kbʼe pa Jerusalen, weneʼ kukʼam bʼi ri bʼe che kqil pa ri video. Pa ri 9 rech Nisán rech ri junabʼ 33, are chiʼ ri Jesús xqʼax pa ri juyubʼ rech Olivos kʼo pa uwiʼ jun alaj bʼur xebʼe pa Jerusalén weneʼ are chiʼ xubʼan wajun viaje riʼ xumaj lo ri bʼe pa Betfagué, kʼa kopan pa Jerusalén.

Bʼe re Betania kopan Betfagué
Betfagué
Juyubʼ re Olivos
Bʼeyaʼ re Cedrón
Juyubʼ rech ri Loqʼalaj ja

Klawux kojom pa ri bʼaq

Wajun wachbʼal riʼ are jun kʼutbʼal re ri bʼaq re uxeʼ aqanaj che teqʼom rumal jun klawux re chʼichʼ re 11,5 centímetros (4,5 pulgadas) unimal. Ri jastaq riʼ xriqitaj pa ri junabʼ 1968 rumal che xkʼot ri kʼolbʼal rech norte re Jerusalén pa ri época kech ri romanos. Ri e jastaq riʼ arqueológico kukʼutu che xekoj klawux are chiʼ kxikibʼax jun winaq cho jun cheʼ. Weneʼ xaq junam rukʼ ri klawux che xkikoj ri ajchʼojabʼ romanos che utzeyebʼaxik ri Jesús cho ri cheʼ. Xriqitaj pa jun koxon re abʼaj (urna) jawiʼ xkʼol kan ri chaqiʼj taq ubʼaq jun winaq. Wajun bʼantajik riʼ kukʼutu che jun winaq tzeyebʼam che jun cheʼ kuya kmuqik (Mt 27:35).