Kixeʼj ta iwibʼ are chiʼ ksachisax kiwach ri itzel taq winaq

Xa jubʼiqʼ chi kraj che kkʼis ri upaciencia ri Jehová. Are chiʼ kopan ri qʼij ri e kojonem che e qastzij taj ksachisax na kiwach, jun jupuq winaq kkimaj ubʼanik kʼax che ri utinamit ri Dios y ri Jehová kusachisaj na kiwach ri itzel taq winaq pa ri chʼoj Armagedón. Qonojel kqaj che kopan wajun qʼij riʼ che ni jumul kʼulmatajinaq.

Qastzij che qetaʼm taj ri kkʼulmatajik are chiʼ kpe ri nimalaj kʼaxkʼolil. Jun kʼutbʼal, qetaʼm ta ri qʼij che kumajij. Xuqujeʼ qetaʼm taj jasche ri e qʼatal taq tzij kkimajij ubʼanik kʼax chke ri e kojonem. ¿Jampaʼ tiempo kbʼan kʼax chke ri upatanelabʼ ri Dios y jas kʼax kbʼan chke? ¿Y jas kubʼan ri Jehová che usachisaxik kiwach ri itzel taq winaq pa ri chʼoj Armagedón? Qetaʼm taj.

Are kʼu, kqaxeʼj ta qibʼ chrij ri kkʼulmataj na pa ri petinaq, rumal che ri Biblia kubʼij chqe ri rajawaxik kqetaʼmaj rech kqaxeʼj ta qibʼ. Jun kʼutbʼal, qetaʼm che oj kʼo pa ri ukʼisbʼalil ri «kʼisbʼal taq qʼijol» (2Ti 3:1). Xuqujeʼ qetaʼm che ri kʼax che kkibʼan ri e kojonem kqʼatexik rech ksach ta uwach ri qastzij kojonem (Mt 24:22). Qetaʼm che ri Jehová kutoʼ na ri utinamit (2Pe 2:9). Y qetaʼm che ri uchaʼom are jun qʼatal tzij che sukʼ y kʼo uchuqʼabʼ rech kusachisaj kiwach ri itzel taq winaq y keʼukol kan ri e kʼiʼalaj winaq pa ri chʼoj Armagedón (Ap 19:11, 15, 16).   

Are chiʼ kkʼulmataj ronojel wariʼ, ri winaq «kkixeʼj kibʼ» (Lu 21:26). Are kʼu ri oj kqaxibʼij ta qibʼ. We kojchoman chrij ri xubʼan ri Jehová ojer che ukolik ri utinamit y ri kubʼan na pa ri petinaq, wariʼ kukubʼsaj qakʼuʼx rech kqabʼan ri kubʼij Lucas 21:28: «Ko chixkʼoloq, chiwalijisaj ri ijolom, rumal rech chi chanim kixkolotaj na».