¿La awetaʼm?

Are chiʼ ri romanos kkikamisaj jun winaq chuwach jun cheʼ, junam rukʼ ri xbʼan che ri Jesús, ¿la kkiya bʼe che kmuqik?

E KʼI ketaʼm che ri Jesús xxekebʼax chuwach jun cheʼ chkixoʼl kebʼ elaqʼomabʼ (Mat. 27:35-38). Ri Biblia kubʼij che are chiʼ kaminaq chi ri Jesús, xqasax ri ucuerpo chuwach ri cheʼ y xemuq kanoq (Mar. 15:42-46). Are kʼu e kʼo jujun winaq kkikoj taj che qastzij xmuq ri Jesús.

E jujun winaq che kkinikʼoj ri Evangelios kkikoj taj che ri romanos kkiya bʼe che kmuq jun itzel winaq che xxekebʼax chuwach jun cheʼ. Kkichomaj che weneʼ jalan kbʼan che ri kicuerpo ri winaq riʼ. Y ri periodista Ariel Sabar xuya ubʼixik pa ri wuj Smithsonian jasche e jujun winaq je kkichomaj wariʼ, xutzʼibʼaj: «Ri kʼajisabʼal wachaj che kyaʼ che jun itzel winaq are che kxekebʼax chuwach jun cheʼ, rumal laʼ ri e winaq che kʼo nim ketaʼmabʼal chrij wariʼ kkikoj taj che ri romanos kkiya bʼe che kemuq waʼ taq winaq riʼ». Ri romanos kkaj che ri itzel taq winaq kkiriq jun kʼaxalaj kamikal. Rumal laʼ e kʼi chke ri e winaq riʼ kqasax ta ri kicuerpo chuwach ri cheʼ xaneʼ are ri e chikop ketijowik. Y weneʼ ri kibʼaqil kʼateʼ kekʼaq kan pa jun jul.

Are kʼu ri kibʼaqil ri kaminaqibʼ che riqom kumal ri arqueólogos, ukʼutum che konojel ta ri judíos che xexekebʼax chuwach jun cheʼ je wariʼ xkikʼulmaj. Pa ri junabʼ 1968, xriq ubʼaqil jun achi re ri nabʼe siglo pa jun muqbʼal re jun familia judía, chunaqaj Jerusalén. Ri ubʼaqil ri jun achi riʼ xriqitaj pa jun osario, ri kkʼol wi ri kibʼaqil ri winaq. Y chkixoʼl ri e bʼaq riʼ xriqitaj jun bʼaq re uxeʼ aqanaj che bʼajim chuwach jun cheʼ, ri klawux che kojom che ketan 11,5 centímetros (4,5 pulgadas). Sabar kubʼij: «Ri bʼaq che xriqtajik rech jun achi Jehohanán ubʼiʼ, xtobʼanik rech xchʼobʼotajik che qastzij ri kubʼij ri Evangelios che xmuq ri Jesús». Wariʼ nim ubʼanik, rumal che «ri uxeʼ raqan ri Jehohanán xukʼutu che, pa ri utiempo ri Jesús, ri romanos xkiya bʼe che xemuq e jujun winaq che xexekebʼax cho jun cheʼ».

Ri ubʼaq wajun achi riʼ ubʼanom che jalan ri chomanik chrij jas xbʼan che uxekebʼaxik ri Jesús cho jun cheʼ. Are kʼu ri qastzij are che e jujun itzel taq winaq che xexekebʼax chuwach jun cheʼ qastzij xemuqik y xaq ta xekʼaq kan pa jun jul. Rumal laʼ, qastzij ri kubʼij ri Biblia chrij ri xbʼan che umuqik ri Jesús: che xyaʼ ri ucuerpo pa jun muqbʼal.

Xuqujeʼ ri más nim ubʼanik are che ri Jehová ubʼim kanoq che ri Jesús kmuq pa jun muqbʼal re jun qʼinom achi, y kʼo ta jun winaq kqʼaten ri Dios che ubʼanik ri kubʼij (Is. 53:9; 55:11).