Bʼantajik 20

Dina xqaj pa kʼäx

¿LA KAWILO e jachin täq keʼurila ri Dina? Kerila ri alitom, o alitomabʼ, che e kʼo pa ri tinamit Canaán. ¿La kkikot ri Jacob rumal wariʼ tijan kubʼan rumiʼal? Rech katkunik kabʼij wariʼ are ksach ta pa ajolom ri xkebʼij ri Abrahán xuqujeʼ ri Isaac chikij ri ixoqibʼ täq aj Canaán.

¿La xraj ri Abrahán che xkʼuleʼ ri Isaac rukʼ jun ixoq aj Canaán? Xraj täj. ¿La xkaj ri Isaac rukʼ Rebeca che xkʼuleʼ ri kalkʼwal rukʼ jun Cananea? Xkaj täj. ¿Awetaʼm suche?

Rumal che we winaq riʼ rech Canaán tijan kkeya uqʼij ri täq tyox. Wariʼ xa e itzel täq winaq rech kkʼuleʼ jun ajpatanel rech ri Ajawaxel kukʼ xuqujeʼ e utz täj rech kbʼan kachiʼl chike. Rumal laʼ qastzij qetaʼm che ri Jacob utz täj xrilo che ri umiʼal xbʼin kukʼ wa ixoqibʼ cananeas.

Dina xqaj pa nimaq täq kʼäx. Chawilampeʼ wajun achi cananeo tijan kril pan ri Dina, ubʼiʼ Siquem. Pa jun qʼij chiʼ ri Dina bʼenäq che kilik wa ixoqibʼ, ri Siquem xok rukʼ Dina. Wariʼ utz täj, rumal che xiw ri e kʼulnaq kekunik kkebʼan wariʼ. Wajun kʼäx xubʼan ri Siquem che ri Dina xukʼam bʼiʼ pa jun nimalaj chʼoj.

Chiʼ ri täq uxibʼal xkito sulaʼ xbʼantajik, sibʼalaj xpe kiwal. Kebʼ chike uxibʼal kibʼiʼ Simeón xuqujeʼ Leví, sibʼalaj xpe kiwal. Rumal laʼ xkekʼam bʼi nikʼaj nimaq täq chʼichʼ, xaq kʼateʼ xeʼok bʼiʼ pa ri tinamit. Ri Simeón, Leví rukʼ nikʼaj kachalal xkekamsaj ri Siquem xuqujeʼ ri nikʼaj chik achijabʼ. Jacob sibʼalaj xpe riwal rumal wajun nimalaj kʼäx xkebʼan täq ukʼojol.

¿Suche xmajtaj wajun kʼäx? Are rumal che ri Dina xubʼan rachiʼl chike ri winaq che kkenimaj ta ri utaqonik ri Ajawaxel. Xuqujeʼ öj rajawaxik kqabʼan täj sulaʼ xubʼan ri Dina, ¿la je kabʼij at o je täj?

Génesis 34:1-31.