Bʼantajik 21
Itzel xil ri José
¡CHAWILAMPEʼ ri nimalaj bʼis kʼo che ri ala xuqujeʼ kawilo che paxnäq ukʼuʼx! Are ri José. Ri täq rachalal xkekʼayij bʼi (xekkʼijbʼe) chike nikʼaj achijabʼ e bʼenaq pa Egipto. Rech kkebʼan jun ajchak che, che tojon ta uqʼij (esclavo). ¿Suche xkebʼan wajun nimalaj kʼäx che ri José ri täq ratz? Rumal che itzel xkil ri José.
Ri kitat, ubʼiʼ Jacob, sibʼalaj kraj ri José. Xukʼut chuwäch che sibʼalaj kraj rumal laʼ xutaq ubʼanik jun jeʼlikalaj (tzʼoʼylaj) ratzʼyaq. Chiʼ ri rachalal xkilo che Jacob sibʼalaj kraj ri José, xeʼok che urilik ri José rukʼ itzelal. Xuqujeʼ kʼo jun chik suche itzel xkil wi.
Ri José xubʼan kebʼ achikʼ. Pa ri kebʼ achikʼ José xrilo che ri rachalal xexukeʼ (xexkeʼ) chuwäch. Chiʼ José xubʼij wariʼ chike, sibʼalaj xnimar ri itzelal pa kanimaʼ.
Xopan jun qʼij, chiʼ ri täq ratz ri José tijan kkechajej ri täq uchij ri kitat, ri Jacob xutaq bʼi ri José rech krilaʼ su tijan kkebʼano. Chiʼ ri täq rachalal ri José xkilo che tijan kopanik, jujun chike xkebʼij: ‹¡Chqakamsaj!›, xechaʼ. Tekʼuriʼ ri nabʼeʼal, Rubén, xubʼij: ‹¡Xaq mibʼan wariʼ!›, xchaʼ chike. Xkebʼan ta wariʼ, are xkeya bʼi pa jun kʼwaʼ chaqijnaq upam. Tekʼuriʼ xeʼok che uchʼobʼik su kkebʼan che ri José.
Tekʼuriʼ xepe nikʼaj ismaelitas. Judá xubʼij wariʼ chike täq rachalal: ‹Chqakʼayij bʼik, o cheqkʼijbʼe, chike ri ismaelitas›, xchaʼ chike. Are wa kʼut xkebʼano. ¡Xkekʼayij ri José rukʼ 20 raqan saq pwäq (plata)! ¡Wariʼ xukʼutu che sibʼalaj itzelal kʼo kukʼ!
¿Su kkebʼij kimik che ri kitat? Xkekamsaj jun kʼisikʼ tekʼuriʼ xkerubʼ ratzʼyaq ri José chupam rukikʼel wajun kʼisikʼ. Tekʼuriʼ xkekʼam bʼi che ri kitat xuqujeʼ xkebʼij wariʼ che: ‹Chawilampeʼ xqariq wariʼ, chawilaʼ we are ratzʼyaq ri José›, xechaʼ.
Ri Jacob xrilo che are ri ratzʼyaq José. ‹Jun itzel chiköp xukamsaj ri José›, xchaʼ ri Jacob. Are waʼ kkaj ri rachalal ri José che kubʼij ri kitat. Tekʼuriʼ ri Jacob sibʼalaj xbʼisonik. Kʼi täq qʼij xubʼan oqʼej chirij rukʼojol. Tekʼuriʼ jet waʼ, ri José kamnäq täj. Chqilampeʼ su xbʼan che José.
Génesis 37:1-35.