Bʼantajik 81

Xkekubʼsaj kikʼuʼx

SIBʼALAJ täq e kʼi winaq xkebʼan bʼi wajun naj bʼe Babilonia rech kebʼe Jerusalén. Chiʼ xeʼopanik, pa Jerusalén xaq xiw chʼaqataq täq tapya kʼo chilaʼ. Nijun winaq kʼo chilaʼ. Rajawaxik che ri täq israelitas xkeyek chi na ri tinamit.

Nabʼe are xkebʼan jun altar. Chilaʼ kkekʼam lo ri täq sipanik rech chiköp kkeya che Jehová. Tekʼuriʼ qʼaxnäq kebʼ oxibʼ ikʼ chiʼ xeʼok ri täq israelitas che uyakik ri loqʼalaj ja. Tekʼuriʼ ri täq kikʼulel e kʼo naqaj xkaj xkexibʼij ri täq israelitas rech kkeyak ta chi ri loqʼalaj ja. Kʼisbʼal re xekunik che ri kʼakʼ ajawinel rech Persia kubʼan jun taqonik rech kuqʼatej ri chak.

Qʼaxnäq chi 17 junabʼ chiʼ ri täq israelitas xeʼel bʼi Babilonia. Ri Ajawaxel xeʼutaq bʼi ri täq ajqʼaxal utzij Ageo xuqujeʼ Zacarías rech kkebʼij che ri winaq che kkemaj chi ri chak. Ri winaq xkekubʼsaj kikʼuʼx che ri Ajawaxel keʼutoʼ, rumal laʼ xenimanik. Xkemaj chi ri chak, patneʼ, o matneʼ ri taqonik kubʼij che kekun täj.

Rumal laʼ, jun ajkʼamal bʼe rech ri täq ajchʼoj rech Persa ubʼiʼ Tatenai xpetik tekʼuriʼ xuta chike jachin xbʼin chike che kekunik kkeyak ri loqʼalaj ja. Ri täq israelitas xkebʼij che, che pa ri tinamit Babilonia ri ajawinel Ciro xubʼij wariʼ chike: ‹Jix Jerusalén tekʼuriʼ chiyekaʼ ri loqʼalaj ja rech ri Ajawaxel Jehová›, xchaʼ.

Tatenai xutaq bʼi jun wuj pa Babilonia rech kuto we qastzij che ri Ciro ri kamnäq chik, are xuya wajun taqonik. Tekʼuriʼ ri kʼakʼ ajawinel ubʼiʼ Darío rech Persia xutaq chi lo jun wuj che kubʼij che jeʼ. Rumal laʼ ri ajawinel xutzʼibʼaj wariʼ: ‹Chiya chike ri täq israelitas che kkeyak ri loqʼalaj ja rech ri kiDios. Xuqujeʼ cheʼitoʼo›. Xkekʼis ubʼanik pa kajibʼ junabʼ, sibʼalaj xekikotik ri täq israelitas.

Majaʼ ktzʼaqat 48 junabʼ che ri loqʼalaj ja xkʼis ubʼanik. Ri winaq rech Jerusalén e mebʼaʼ, o kʼot kipwäq, ri tinamit xuqujeʼ ri loqʼalaj ja rech ri Ajawaxel utz ta kkaʼyik. Pa ri Babilonia ri israelita ubʼiʼ Esdras xretaʼmaj che rajawaxik kbʼan ubʼanik ri loqʼalaj ja rech ri Ajawaxel. Rumal laʼ. ¿La awetaʼm su xubʼano?

Esdras xbʼe che rilik Artajerjes, ri ajawinel rech Persia, wajun utzalaj ajawinel xuya bʼi sibʼalaj kʼi täq sipanik che Esdras rech kukʼam bʼi Jerusalén. Esdras xubʼij chike ri israelitas e kʼo Babilonia che kketoʼ, tekʼuriʼ e 6.000 winaq xebʼe rukʼ. Xkekʼam bʼi sibʼalaj kʼi täq qʼan pwäq, saq pwäq xuqujeʼ nikʼaj chik jastaq e jeʼlik.

Esdras xuxibʼij ribʼ, rumal che e kʼo itzel täq achijabʼ pa ri bʼe. Wa täq achijabʼ weneʼ kkaj kkelqʼaj bʼi ri qʼan pwäq ri saq pwäq kekʼam bʼik, tekʼuriʼ kekamsax kanoq. Rumal laʼ Esdras xeʼumolij ri winaq, chawilampeʼ pa ri wachbʼäl. Tekʼuriʼ xkebʼan kichʼawem rukʼ Jehová rech keʼuchajej pa ri naj bʼe rech kebʼe Jerusalén.

Jehová xeʼuchajej. Chiʼ qʼaxnäq chiʼ kajibʼ ikʼ che ri kibʼe, utz kiwäch xeʼopan Jerusalén. ¿La kukʼut ta wariʼ che ri Jehová keʼuchajej jachin täq kkekubʼsaj kikʼuʼx chirij?

Esdras 2 kʼa kopan 8.