Bʼantajik 85
Xkʼejeʼ pa rachoch chiköp
¿LA AWETAʼM jachin laʼ wajun alaj neʼ? Jeʼ, are ri Jesús. Xkʼejeʼ pa jun rachoch chiköp. María tijan kuya ri Jesús pa ri jukubʼ, chilaʼ kyaʼ wi ri kiwa ri täq bʼur xuqujeʼ nikʼaj chik chiköp. Tekʼuriʼ, ¿suche e kʼo María rukʼ José waral kukʼ ri täq chiköp? Wariʼ jun kʼolbʼal täj rech kalax akʼal, ¿la qastzij?
Kʼolbʼal täj. E kʼo waral rumal wariʼ: ri achi xubʼan qʼatbʼaltzij pa Roma ubʼiʼ César Augusto xukoj jun taqonik, che ronojel ri winaq ketzalij pa kitinamit rech kebʼe che utzʼibʼaxik ri kibʼiʼ pa jun wuj. Ri José aj Belén. Tekʼuriʼ chiʼ xeʼopan Belén kʼo ta chi ja xkeriqo. Rajawaxik che xekanaj kan kukʼ ri chiköp. ¡Che wajun qʼij riʼ Jesús xkʼejeʼik! Chawilampeʼ che utz uwäch ri Jesús.
Chawilampeʼ ri täq ajyuqʼ tijan kepeʼ che urilik ri Jesús. E kʼo pa ri juyubʼ chaqʼabʼ tekʼuriʼ xkaʼy jun saqil chikij. ¡Are jun ángel! Ri täq ajyuqʼ sibʼalaj xkexibʼij kibʼ. Tekʼuriʼ ri ángel xubʼij chike: ‹¡Xaq mixibʼij iwibʼ! Inkʼamom lo utzalaj täq tzij chiwe. Kimik, pa Belén, xkʼejeʼ ri Cristo Jesús. ¡Wajun neʼ kutoʼ na ri tinamit! Pisom pa täq atzʼyaq xuqujeʼ yaʼom chupam jun jukubʼ›. Tekʼuriʼ, kʼi täq ángeles xepetik xeʼok che uyaʼik uqʼij ri Ajawaxel. Chanim xebʼe ri ajyuqʼ che utzukuxik ri Jesús, tekʼuriʼ xkeriqo.
¿La awetaʼm suche sibʼalaj nim ubʼantajik ri Jesús? ¿La awetaʼm qas jachin laʼ ri Jesús? Musach chawe che pa ri nabʼe bʼantajik rech wajun wuj riʼ xchʼaw chirij ri nabʼe Ukʼojol ri Ajawaxel. Jesús xchakun rukʼ Jehová che ubʼanik ri kaj xuqujeʼ ri Ulew xuqujeʼ ronojel ri nikʼaj chik. ¡Are ri Jesús!
Jeʼ, Jehová xukʼam ri ukʼaslemal ri Ukʼojol kʼo pa ri kaj tekʼuriʼ xuqʼaxej rukʼ ri María. Tekʼuriʼ, xumaj ukʼiyik junam che kkebʼan ri täq neʼ rukʼ kinan chiʼ majaʼ kekʼejeʼik. Tekʼuriʼ wajun alaj neʼ are Ukʼojol ri Ajawaxel. Kʼisbʼal re xkʼejeʼ waral pa jun rachoch chiköp pa ri tinamit Belén. ¿La xawilo suche xekikotik ri täq ángeles chiʼ xkebʼij chike ri winaq che Jesús xkʼejeʼik?