Bʼantajik 111
Jun akʼal xwarik
¡UY, CHAWILAMPEʼ! ¿Su tijan kbʼan waral? ¿La xuriq jun nimalaj kʼäx ri akʼal kʼo pulew? ¡Chawilampeʼ, jun chike ri achijabʼ xel loq are ri Pablo! ¿La katkunik kawil ri Timoteo chilaʼ? ¿La xa xtzaq lo che ri ventana ri akʼal?
Jewaʼ, are xbʼantajik. Pablo tijan kuya jun chʼabʼal waral pa Troas. Areʼ retaʼm, che keril ta chi pa kʼi täq junabʼ, rumal laʼ che ukabʼ qʼij rajawaxik kbʼe pa jun jukubʼ. Rumal laʼ tijan kchʼawik, tekʼuriʼ xopan nikʼaj chaqʼabʼ.
Wajun akʼal ubʼiʼ Eutico kuʼl, o tʼuʼl, pa ventana, tekʼuriʼ xwarik. ¡Xtzaq lo che oxibʼ raqan ja! Rumal laʼ chawilaʼ che ri winaq kebʼison rumal wariʼ. Chiʼ ri achijabʼ xkewalasaj ri akʼal, xkilo che xubʼan ri tijan kkechomaj. ¡Xkamik!
Chiʼ Pablo xrilo che ri akʼal kamnäq chik, xqʼoyiʼ puwiʼ tekʼuriʼ xumatzej. Tekʼuriʼ xubʼij wariʼ: ‹Xaq mixbʼisonik. ¡Ri akʼal utz uwäch!› Xchaʼ. ¡Qastzij! ¡Jun milagro! ¡Pablo xubʼan che xkʼastajik! Rumal laʼ sibʼalaj xekikotik ri winaq.
Konojel xepaqiʼ chi jun mul xketijaʼ kiwa. Pablo xuya ta kan uyaʼik ubʼixik ri tzij kʼateʼ xsaqarik. ¡Qetaʼm che ri Eutico xwar ta chik! Tekʼuriʼ Pablo, Timoteo xuqujeʼ ri täq rachiʼl xebʼe pa ri jukubʼ. ¿La awetaʼm jachiʼ kebʼe wi?
Pablo tijan kukʼis ri urox ubʼe rech uyaʼik ubʼixik ri utzalaj täq tzij. Pa ri tinamit rech Éfeso xkanaj kan oxibʼ junabʼ chilaʼ pa uviaje. Rumal laʼ, wariʼ xubʼan naj chi chuwäch ri ukabʼ uviaje.
Chiʼ elinäq chi lo Troas, ri jukubʼ xkanaj kan kebʼ oxibʼ qʼij pa Mileto. Rumal che Éfeso kʼo naqaj, Pablo xeʼusikʼij ri täq achijabʼ nim chi kijunabʼ rech ri congregación kʼo Éfeso rech keʼopan Mileto rech kchʼaw kukʼ che ukʼisbʼal mul. Chiʼ xumaj ubʼe ri jukubʼ, ¡sibʼalaj xebʼisonik chiʼ xbʼe ri Pablo!
Tekʼuriʼ ri jukubʼ xtzalij Cesarea. Chiʼ Pablo xkanaj pa rachoch ri ajtijoxel Felipe, ri ajqʼaxal tzij Ágabo xubʼij che chiʼ Pablo kopan Jerusalén ktzʼapixik. Are laʼ xbʼantajik, ri xubʼij Ágabo. Chiʼ qʼaxnäq chi kebʼ junabʼ tzʼapal Cesarea, xtaq bʼi ri Pablo pa Roma rech kbʼan qʼatbʼaltzij che rumal ri César ri ajqʼatbʼaltzij romano. Chqilaʼ su xbʼantaj pa ri bʼe rech keʼopan Roma.
Hechos 19 kʼa kopan 26.