Bʼantajik 115

Jun kʼakʼ uwäch Ulew

CHAWILAMPEʼ ri nimaʼq täq cheʼ, ri jeʼlikalaj täq kotzʼiʼj xuqujeʼ ri nimaʼq täq juyubʼ. Wariʼ sibʼalaj utz. Chawilampeʼ, ri masat tijan kutij uwa pa uqʼabʼ ri akʼal. Xuqujeʼ ri täq köj rukʼ täq kej e takʼal chilaʼ chuwäch ri räx. ¿La kawaj katkʼejeʼ pa jun ja o pa jun lugar junam rukʼ wariʼ?

Ri Ajawaxel kraj che kʼo jun akʼaslemal che kʼot ukʼisik pa jun kotzʼiʼjalaj uwäch Ulew, kqariq ta ri kʼäx junam rukʼ ri kkeriq ri winaq kimik. Are laʼ kubʼij, o kutzujuj, ri Loqʼalaj Pixabʼ chike ri kekʼejeʼ pa ri kʼakʼ kotzʼiʼjalaj uwäch Ulew. ‹Ri Ajawaxel kkʼejeʼ na kukʼ. Kʼo ta chi na kamikal, kʼo ta chi oqʼej, kʼo ta chi kʼaxkʼolil. Ri ojer täq jastaq qʼaxnäq chik.›

Are Jesús kubʼan na ronojel ri utzilal riʼ. ¿La awetaʼm jumpaʼ kubʼano? Jeʼ, chiʼ kresaj ri itzelal xuqujeʼ ri itzel täq winaq cho ruwäch Ulew. Masach pa ajolom, chiʼ Jesús xkʼejeʼ cho ruwäch Ulew xeʼukunaj ri winaq, xuqujeʼ xeʼuwalsaj nikʼaj täq kamnäq. Rukʼ wariʼ xukʼut ri kubʼan na cho ruwäch Ulew chiʼ kubʼan Ajawinel.

¡Chomajampeʼ che sibʼalaj utz kojkʼejeʼ pa jun kʼakʼ kotzʼiʼjalaj uwäch Ulew! Jesús, xuqujeʼ rukʼ nikʼaj chik xeʼuchaʼo, kkebʼan qʼatbʼaltzij pa ri kaj. Kkechajej ronojel kʼo cho ruwäch Ulew xuqujeʼ kkilo che konojel kekikotik. Kqil na su rajawaxik kqabʼano rech ri Ajawaxel kuya jun qakʼaslemal che kʼot ukʼisik pa ri ukʼakʼ kotzʼiʼjalaj uwäch Ulew.

Apocalipsis 21:3, 4; 5:9, 10; 14:1-3.