Ri Ajawaxel kojusikʼij che ubʼanik urachiʼl

Ri Ajawaxel kraj che kqabʼan urachiʼl. ¿La awetaʼm che katkunik kabʼan urachiʼl ri winaq sibʼalaj nim uqʼij chupam ri kajulew? Ri Abrahán, jachinlaʼ xkʼaseʼ ojer, xbʼix urachiʼl ri Ajawaxel che (Santiago 2:23). Ri Loqʼalaj Pixabʼ (la Biblia) kubʼij che e kʼo jujun chik täq winaq xekikotik rumal ri achiʼlanik xuyaʼ chike, rukʼ laʼ xkekʼam loqʼalaj täq tewchibʼäl. Kimik, e kʼi winaq cho ronojel uwäch ulew e kuʼnaq che ubʼanik urachiʼl ri Ajawaxel. Xuqujeʼ katkunik kabʼan wariʼ.

Rachiʼlaxik ri Ajawaxel are sibʼalaj utz chuwäch urachiʼlaxik ri winaq. Ri Ajawaxel keʼuyaʼ ta kan ri urachiʼl (Salmo 18:25). Rachiʼlaxik ri Ajawaxel are sibʼalaj utz chuwäch e kʼo nim täq pwäq awukʼ. Chiʼ kekam ri e kʼo nim täq pwäq kukʼ, nikʼaj chik winaq kekanaj rukʼ kipwäq. Jetwaʼ jachin täq kachilaj ri Ajawaxel, kʼo jun utzil kukʼ, che kʼot jun kkunik kresaj chike (Mateo 6:19).

Weneʼ e kʼo jachin täq kekaj täj che kawetamaj chike täq kukʼut ri Ajawaxel. Weneʼ are täq awachiʼl xuqujeʼ awachilal (Mateo 10:36, 37). We kʼo jachin ktzeʼn chawij xuqujeʼ itzel kchʼaw chawe, chomajampeʼ: « ¿ Jachinoq kwaj kinkikotemaj, are ri winaq we are ri Ajawaxel? ». Chomajampeʼ: we kʼo jun winaq che kubʼij chawe che katwaʼ ta chik, ¿la kabʼano? kabʼan täj, rumal che rajawaxij kojwaʼik rech ojkʼaslik. Jewaʼ riʼ, ri Ajawaxel kkunik kuyaʼ jun qakʼaslemal che kʼot ukʼisik. Rumal laʼ, rajawaxik kawetamaj urachiʼlaxik ri Ajawaxel xuqujeʼ xamayaʼo che kʼo jun katuqʼatij (Juan 17:3).