KʼUTUNEM 13

Ri e utz ajawinelabʼ xuqujeʼ ri e utz taj

Xjach ri tinamit Israel pa kiqʼabʼ kebʼ ajawinelabʼ, kʼi chike ri ajawinelabʼ xkiya kan ri Jehová. Ri aj Babilonia xkisach uwach Jerusalén

CHIʼ ri Salomón uxutum chi ri Jehová, ri Israel xjach pa kebʼ, junam rukʼ ri ubʼim kan ri Jehová. Ri xubʼan chi ajawinel, ri Rehoboam, sibʼalaj xubʼan kʼax chike ri tinamit rumal laʼ ri lajuj tribus che e kʼo pa ri relebʼal kaqʼiq xkitas kibʼ chirij. Ri kebʼ chik tribus che xkibʼan sukʼ che ri uqʼatbʼal tzij ri David pa Jerusalén are ri xekʼojiʼ chuxeʼ ri utaqanik ri ajawinel rech Judá che kʼo pa uqajibʼal kaqiqʼ.

Rumal che ri ajawinelabʼ xeniman taj xuqujeʼ xkikubʼsaj ta kikʼuʼx chirij ri Dios, ri e kebʼ naj taj xekʼojiʼ pa utzil xuqujeʼ pa jororibʼal. Ri más itzel are ri ajawinel che kʼo pa ri relebʼal kaqiqʼ, rumal che are ri nabʼe ajawinel che xutaqchiʼj ri winaq rech xkibʼan ri qastzij taj kojonik. Pa neʼ ri Dios xeʼutaq ajqʼaxal tzij jujun chike are ri Elías xuqujeʼ ri Eliseo —che xkiwalajisaj jujun kaminaqibʼ—, ri israelitas xkibʼan taj ri xbʼix chike. Kʼisbʼal re, ri Dios xuya che ri Asiria xuchʼak ri Israel.

Chiʼ qʼaxinaq chi más che 100 junabʼ, ri ajawinel rech Judá xuqujeʼ xkʼajisax uwach rumal ri Dios. Ri ajqʼaxal utzij ri Dios xkibʼij chike ri ajawinelabʼ ri kkʼulmatajik, tekʼuriʼ xa e jujun xkibʼano ri xbʼix chike xuqujeʼ xkikoj kichuqʼabʼ rech ri tinamit xkibʼan ri utz. Jun kʼutbʼal, ri ajawinel Josías xukoj uchuqʼabʼ che usachisaxik uwach ri qʼijilanik chike ri tyox xuqujeʼ xubʼan ubʼanik ri rachoch ri Jehová. Chiʼ tajin kubʼan waʼ, xriq ri tzʼibʼam wi ri taqonik che xyaʼ che ri Moisés. Rumal che ri Josías sibʼalaj xkikotik, más xukoj uchuqʼabʼ che usachisaxik uwach ri kiqʼijilaxik ri e tyox.

Sibʼalaj bʼisobʼal, ri xeʼok che ukʼaxel ri Josías xkibʼan ta ri xubʼan areʼ. Rumal laʼ ri Jehová xuya chike ri aj Babilonia xkichʼak ri Judá xuqujeʼ xkisach uwach ri Jerusalén rukʼ ri Loqʼalaj Ja. Ri winaq che xekʼaseʼ kanoq xekʼam bʼi Babilonia, ri Dios ubʼim chik che kkʼax na 70 junabʼ rech ketzalij chi pa kitinamit. Chiʼ kʼa majaʼ ketzalijik, kʼo ta nijun winaq xkanaj pa Judá.

Chiʼ majaʼ kpe ri Ajawinel che tzʼujum —ri Mesías—, kʼot nijun che ri ufamilia ri David kubʼan ajawinel. Konojel ri e ajawinelabʼ rech ri ufamilia ri David xkikʼut rukʼ ri xkibʼano che taqal ta chike ri winaq kkiqʼat tzij. Ri qastzij, xaq xiw ri Mesías taqal che kubʼan Ajawinel. Rumal laʼ, Jehová xubʼij wariʼ chirij ri Mesías: «Kataqan na puwiʼ ri nim tinimit Israel chbe qʼij saq. Ri utaqanik kʼut man kʼo ta ukʼistajik» (Lucas 1:33).

(Esam chupam 1 Reyes, 2 Reyes, 2 Crónicas capítulo 10 kopan 36 xuqujeʼ Jeremías 25:8-11.)

JONÁS

Chiʼ jachom chi ri Israel pa kebʼ, ri Dios xuya jun uchak ri ajqʼaxal utzij Jonás: rech kbʼe pa ri tinamit Nínive che naj kʼo wi xuqujeʼ kubʼij chike ri itzel taq winaq che e kʼo chilaʼ che ksachisax kiwach. Ri Jonás sibʼalaj xuxibʼij ribʼ, rumal laʼ xbʼe pa jun jukubʼ pa jun chik tinamit. Chiʼ majaʼ kopanik, ri Dios xubʼano che jun nimalaj kar xubʼan ta kʼax che chiʼ xubʼiqʼ bʼik. Ri Jonás xubʼan uchʼawem che ri Dios, ri Dios xubʼano che ri nimalaj kar xuxabʼaj, o xuxawaj, pa chaqiʼj ulew. Rukʼ wajun nimalaj milagro riʼ, Jonás xbʼe pa Nínive rech xubʼan ri xbʼix che.

Pa neʼ ri Jonás xretaʼmaj ri nimanik, rajawaxik kretaʼmaj jun chik bʼantajik: ri toqʼobʼisan wachaj. Rumal che ri aj Nínive xkita ri xubʼij ri Jonás xuqujeʼ xkiya kan ri kimak, ri Dios xusach kimak. Tekʼuriʼ ri Jonás utz ta xrilo. Rumal laʼ ri Jehová xukʼut chuwach rukʼ jun chik milagro che rajawaxik kel ukʼuʼx chike ri winaq. ¿Jas riʼ ri jun chik milagro? Katkunik kawetaʼmaj chiʼ kasikʼij uwach ri wuj ubʼiʼ Jonás.