Ri ukamikal ri Cristo

RI Jesús oxibʼ junabʼ rukʼ nikʼaj tajin chi kutzijoj ri utzij ri Dios xuqujeʼ retaʼm che naqaj chik kʼo wi ri ukamikal waral cho ri uwach Ulew. Ri ajkʼamal bʼe rech ri kojonik judío kkaj kkikamisaj, tekʼuriʼ kkixibʼij kibʼ chkiwach ri winaq, rumal che ri winaq kkibʼij che areʼ ajqʼaxal tzij. Tekʼuriʼ, ri Satanás xukoj pa ranimaʼ ri Judas —jun chike ri kabʼlajuj apóstoles— che kukʼayij ri Jesús. Ri ajkʼamal bʼe re ri kojonik xkitoj 30 raqan saq pwaq che ri Judas.

Are ri chaqʼabʼ rech ri Pascua, ri Jesús xkimulij kibʼ rukʼ ri apóstoles rech kkibʼan wajun nimaqʼij riʼ. Chiʼ resam chi bʼi ri Judas, ri Cristo xumaj jun kʼakʼ nimaqʼij: ri Uwaʼim ri Jesús. Xukʼam jun chʼaqap kaxlanwa, xubʼan jun chʼawem xuqujeʼ xuqʼaxej chkiwach ri julajuj apóstoles. Tekʼuriʼ xubʼij: «Are nucuerpo waʼ ri jachom umak iwech. Chitijaʼ waʼ che natabʼal wech». Tekʼuriʼ xuqʼaxej ri vino xuqujeʼ xubʼij: «We qumubʼal riʼ are ri kʼakʼ kʼulwachinik pa ri nukikʼel, ri xchʼetow umak iwech» (Lucas 22:19, 20).

Pa wajun kʼisbʼal aqʼabʼ riʼ, ri Jesús xukʼut kʼi jastaq chkiwach ri apóstoles. Xuya jun kʼakʼ taqanik chike: che qas kkiloqʼoqʼej kibʼ. Xuqujeʼ, xubʼij: «Konojel kaketamaj na chi ix nutijoxelabʼ, we kiloqʼoqʼelaʼ iwibʼ» (Juan 13:34, 35). Xubʼij chike che kebʼison taj rumal ri kbʼan na, xuqujeʼ xubʼan chʼawem pa kiwiʼ. Kʼisbʼal re, xkibʼan jun bʼixonem che ri Ajawaxel tekʼuriʼ xebʼe pa Getsemaní.

Chilaʼ ri Jesús xukeʼik xuqujeʼ pa chʼawem xubʼij che ri Jehová ronojel ri kʼo pa ranimaʼ. Tekʼuriʼ, xaq kʼateʼ, xeʼopan kʼi achijabʼ che kikʼamom bʼi kamisabʼal xuqujeʼ ri ajkojol tabʼal toqʼobʼ che kkaj kkichap bʼi ri Jesús. Rech kkichʼobʼo jachin laʼ ri Jesús, ri Judas xubʼan ri etal che kibʼim chik: xutzʼumaj. Ri ajchʼojabʼ xkichap ri Cristo, are kʼu ri ajtijoxelabʼ xeʼanimaj bʼik.

Ri Jesús xubʼij chuwach ri nim qʼatbʼal tzij ke ri judíos che ri Utat areʼ ri Dios. Ri ajqʼatal tzij xkilo che ri xubʼij are jun yoqʼonik che ri Dios, jun mak che kukʼam bʼi pa kamikal. Rumal laʼ xkikʼam bʼi chuwach ri Poncio Pilato, jun ajqʼatal tzij rech Roma. Areʼ xrilo che Jesús kʼo ta umak, tekʼuriʼ xubʼan ri kkaj ri winaq, che kkitaʼ che kkamisaxik.

Ri Cristo xkʼam bʼi pa jun lugar ubʼiʼ Gólgota, chilaʼ ri ajchʼojabʼ rech Roma xkibʼajij chuwach jun cheʼ. Xaq kʼateʼ, ri qʼequʼm xuchʼuq ri usaqil ri qʼij. Pa wajun bʼenaqʼij riʼ, chiʼ xkam ri Jesús, xubʼan jun nim kabʼraqan. Ri ubʼaqil xmuq pa jun muqbʼal bʼanom che abʼaj, che ukabʼ qʼij, ri ajkojol tabʼal toqʼobʼ xekilaʼ ri muqbʼal xuqujeʼ xkitaq achijabʼ rech kkichajij. ¿La chilaʼ riʼ xkanaj wi kanoq? Chilaʼ taj, rumal che xbʼan ri nimalaj milagro.

(Esam chupam ri capítulo 26 xuqujeʼ 27 rech Mateo, ri capítulo 14 xuqujeʼ 15 rech Marcos, ri capítulo 22 xuqujeʼ 23 rech Lucas xuqujeʼ ri capítulo 12 kopan 19 rech Juan.)