KʼUTUNEM 2
Chikojoʼ ichuqʼabʼ rech ix sukʼ chbʼil iwibʼ
«Ri xutunubʼaʼ ri Dios, man yaʼtal ta che ri winaq chi kujacho.» (Marcos 10:9)
Jehová kraj che kqaloqʼoqʼej ri sukʼilal (Miqueas 6:8). Ri sukʼilal sibʼalaj nim ubʼanik pa ri kʼulanem, rumal che we man e sukʼ ri kʼulaj kekun taj kkikubʼsaj kikʼuʼx chbʼil kibʼ. We kkikubʼsaj kikʼuʼx chbʼil kibʼ kubʼano che kkʼiy ri loqʼoqʼenik.
Kimik, tajin ksach uwach ri sukʼilal pa ri kʼulanem. Rech kachajij ri akʼulanem, rajawaxik kakoj achuqʼabʼ che ubʼanik kebʼ jastaq.
1 NIM CHAWILAʼ WI RI AKʼULANEM
RI KUBʼIJ RI BIBLIA: «[Qas chiwilaʼ] ri qas utz na ubʼanik» (Filipenses 1:10). Ri akʼulanem are jun chke ri jastaq che sibʼalaj nim ubʼanik pa ri akʼaslemal. Rumal laʼ rajawaxik che katok il che.
Jehová kraj che xaq xiw ri akʼulaj karayij uwach xuqujeʼ che kixkikot pa ri ikʼaslemal (Eclesiastés 9:9). Dios kubʼij che qas kawilij ri akʼulaj, xuqujeʼ kachomaj ri kuya kikotemal che (1 Corintios 10:24). Rajawaxik che ri akʼulaj kunaʼo che kajwataj chawe xuqujeʼ che nim kawilo.
RI KATKUNIK KABʼANO:
Amaqʼel chatasaʼ aqʼij rech katkʼojiʼ rukʼ ri akʼulaj, chatok il che ri kajwataj che
Chachomaj ri kajwataj chiwe, xaq xiw ta ri kajwataj chawe at
2 CHACHAJIJ RI AWANIMAʼ
RI KUBʼIJ RI BIBLIA: «Chi ronojel jachin kukaʼyej jun ixoq che urayixik uwach, xqaj riʼ pa mak rukʼ pa ranimaʼ» (Mateo 5:28). We kʼo jun winaq kuya ta kan uchomaxik tzʼil taq jastaq, je taneʼ che sukʼ ta chi chuwach ri ukʼulaj.
Ri Jehová kubʼij che rajawaxik kchajix ri animaʼ (Proverbios 4:23; Jeremías 17:9). Rech katkunik kachajij ri awanimaʼ, qas chachaʼ na ri kawilo (Mateo 5:29, 30). Chabʼanaʼ awe ri xubʼan ri sukʼalaj Job, che xubʼij che kralwachij ta chi jun ixoq chik (Job 31:1). Chakojoʼ achuqʼabʼ che uxutuxik ri tzʼil taq wachbʼal. Xuqujeʼ chakojoʼ achuqʼabʼ rech kkʼiy ta arayinik chrij jun winaq che are ta ri akʼulaj.
RI KATKUNIK KABʼANO:
Qas chakʼutuʼ chkiwach nikʼaj winaq chik che xaq xiw ri akʼulaj katok il che
Nim chawilaʼ wi ri kunaʼ ri akʼulaj xuqujeʼ chaxutuj ri achilanik che utz ta kril ri akʼulaj