Kʼamal taq bʼe che kekichajij ri cristianos

ARE chiʼ ri Jesús xkʼojiʼ pa ri uwach Ulew, xukʼutu che are ri «utzalaj ajyuqʼ» (Juan 10:11). Are chiʼ xeril ri e kʼi winaq che e teren chrij, xutoqʼobʼisaj kiwach rumal che «kkiriq kʼax e je jas ri chij ri man kʼo ta kajyuqʼ, e jabʼuninaq» (Mat. 9:36). Ri Jesús junam ta ubʼanik kukʼ ri e nikʼaj chik kʼamal bʼe re taq ri kojonem re Israel, che sibʼalaj e itzel taq kʼamal bʼe. E kiwonobʼam kan ri winaq, rumal laʼ kiriqom kʼax y kʼo ta ri kajwataj chke pa ri kikojonik (Ezeq. 34:7, 8). Are kʼu, ri Jesús xukʼut kʼi jastaq chkiwach ri e winaq che kejunamataj rukʼ chij, y xel ukʼuʼx chke rumal laʼ xuya ri ukʼaslemal pa kamikal rech keʼukolo. Ri Pedro y ri e nikʼaj chi apóstoles xkilo che ri Jesús sibʼalaj xeʼuloqʼoqʼej ri winaq, y ri utz ukʼutbʼal xukʼut chkiwach che rajawaxik kekitoʼ ri e winaq rech keqebʼ rukʼ ri Jehová, ri «ajyuqʼ xuqujeʼ ri chajinel re ri [k]animaʼ» (1 Ped. 2:25).

² Jun mul, ri Jesús xunaʼtasaj che ri Pedro che sibʼalaj nim ubʼanik che keʼilix ri cristianos y che kechajix pa ri kikojonik (Juan 21:15-17). Ri Pedro xsach ta che ri xukʼut ri Jesús chuwach. Are chiʼ xqʼax ri tiempo, ri areʼ xunaʼtasaj wariʼ chke ri kʼamal taq bʼe: «Cheʼiyuqʼuj ri jumulaj chij re ri Dios ri kʼo chixoʼl. Chichajij man xa ta rumal rech chi kixchʼij che ubʼanik, xaneʼ chichajij rukʼ ronojel iwanimaʼ jas ri kubʼij ri Dios. Mitzukuj kʼixbʼalalaj chʼakoj, xaneʼ chichajij ri jumulaj chij rukʼ jun utzalaj iwanimaʼ. Mibʼan chke jetaneʼ kʼo itaqanik pa kiwiʼ, xaneʼ chixux jun kʼutbʼal chkiwach ri chij, rech ri e areʼ kkibʼan ke jas ri kibʼan ix» (1 Ped. 5:1-3). Ri e kʼamal taq bʼe re ri qaqʼij xuqujeʼ kkibʼan waʼ taq pixabʼ riʼ. Junam rukʼ ri Jesús, rukʼ ronojel kanimaʼ kekichajij ri cristianos che kejunamataj rukʼ chij y kkikʼam kibʼe che upatanixik ri Dios (Heb. 13:7).

³ Kʼo kʼi rumal che kqamaltyoxij che ri Jehová che e ukojom kʼamal taq bʼe pa taq ri congregaciones rukʼ ri ruxlabʼixel. Jun chke are che kkiya qachuqʼabʼ y kojkilij chqajujunal. Jun chik are che kojkitijoj pa taq ri riqbʼal ibʼ, ri kqakowirisaj wi ri qakojonik (Rom. 12:8). Jun urox rumal are che kojkichajij chuwach taq ri jastaq o ri winaq che kkaj kkibʼan kʼax chqe (Is. 32:2; Tito 1:9-11). Xuqujeʼ, kkiya qachuqʼabʼ rech amaqʼel kqatzijoj ri utzij ri Dios rumal che e areʼ kkiya jun utz kʼutbʼal chqawach (Heb. 13:15-17). Qastzij wi che waʼ taq achijabʼ e jun sipanik che uyaʼom ri Jehová rech kkowir ri qakojonik (Efes. 4:8, 11, 12).

RI E TAQANIK Y RI E PIXABʼ RE RI BIBLIA

⁴ Ri Jehová kraj che qas utz kbʼan che uchajixik ri congregación, rumal laʼ xuya kan pa ri uTzij ri e taqanik y ri e pixabʼ che rajawaxik kkibʼan ri e kʼamal bʼe. Ri achijabʼ che kkibʼan waʼ taq taqanik pa kikʼaslemal kojkunik kqabʼij che are ri uxlabʼixel kechowik rech keʼux e kʼamal bʼe (Hech. 20:28). Sibʼalaj nim kibʼanik ri taqanik y ri pixabʼ re ri Biblia che rajawaxik kkibʼan ri e kʼamal bʼe rumal che are jun eqeleʼn nim ubʼanik. Are kʼu ri e taqanik, e jastaq taj che sibʼalaj kʼax ubʼanik y che mat ne kekun ri cristianos kkibʼano. Rumal che we jun cristiano sibʼalaj kuloqʼoqʼej ri Dios, rukʼ ronojel ranimaʼ riʼ kunimaj ri kbʼix che. Ri más rajawaxik kilik are che waʼ taq achijabʼ kkaj kkibʼan pa kikʼaslemal ri e pixabʼ re ri Biblia.

⁵ Ri Biblia kukʼut chqawach jas taq ri taqanik re ri Biblia che rajawaxik kubʼan jun kʼamal bʼe. Kriqitaj pa ri nabʼe carta che xutaq ri Pablo che ri Timoteo y ri xutaq bʼi che ri Tito. Pa 1 Timoteo 3:1-7 kubʼij: «We kʼo jun ri kraj kkoj che solinel ke ri komon kojonelabʼ [kʼamal bʼe], utzalaj chak riʼ kraj. Rajawaxik bʼaʼ chi ri solinel man kʼo ta ktzujux wi, xa jun ri rixoqil, kuchomaj jas ri kubʼano, utz ri uchomanik, sukʼumam, kuya oqxanibʼal chke ri winaq, knaw che kitijoxik ri winaq, man unaqʼatisam ta ribʼ che qʼabʼarik mawi yakal chʼoj, xaneʼ bʼanal utzil, aj jamaril xuqujeʼ man bʼenaq ta ranimaʼ che uloqʼoxik pwaq. Utz kubʼano ktaqan pa kiwiʼ ri e aj uwo rachoch, knimax kumal ri e ralkʼwal, nim kil wi kumal. We kʼu kʼo jun man retaʼm ta rukʼaxik ri rachoch, ¿jas ta kʼu lo kubʼan che rilixik ri ukomon kojonelabʼ ri Dios? Rajawaxik chi man kʼakʼ kojonel taj, rech munimarisaj ribʼ, maqaj ne ri kʼoqonik puwiʼ jas ri xqaj puwiʼ ri itzel. Xuqujeʼ rajawaxik chi utz kil wi kumal ri winaq rech man kʼo ta yoqʼbʼal re, rech man kchap ta rumal ri itzel».

⁶ Ri Pablo xutzʼibʼaj bʼi wariʼ che ri Tito: «Xatinya kan pa Creta rech kasukʼumaj ri kʼa kraj na, rech keʼakoj ri tatayibʼ [kʼamal bʼe] ri ketaqan pa ri komon kojonelabʼ re taq ri tinamit, jas ri xatintaq wi. Rajawaxik chi ri jun ri ktaqan pa ri komon kojonelabʼ, man kʼo ta etzelal kariqitaj chrij xuqujeʼ xa jun rixoqil. Rajawaxik chi ri e ralkʼwal e kojonelabʼ, ri man ktataj ta etzelal chkij, xuqujeʼ man kewalij ta chkij ri e kʼo pa kiwiʼ. Rajawaxik chi ri solinel kech ri komon kojonelabʼ: jikom ri ukʼaslemal, rumal rech chi kchakun pa ri jastaq re ri Dios. Rajawaxik man xuwi ta kubʼan jas ri kqaj chuwach, man koyowar taj chanim, man kqʼabʼar taj, man chʼayanel taj, man kurayij ta kibʼanik tʼorinel taq chʼakoj, xaneʼ kuyaʼ oqxanibʼal chke nikʼiʼaj chik, kuloqʼoqʼej ronojel ri utz, utz uchomanik, kubʼan ri sukʼ, are tastalik winaq, ktaqan puwiʼ ri ukʼaslemal. Rajawaxik chi kunimaj ri jikalaj tzij, jas ri kubʼij ri tijonik, rech kkuʼinik keʼupixbʼej ri winaq rukʼ ri utzalaj tijonik ri man kʼo ta etzelal che, xuqujeʼ kkuʼin che kichʼakik ri winaq ri kkibʼan kikʼulel che ri tijonik» (Tito 1:5-9).

⁷ Jujun cristianos weneʼ kkichomaj che waʼ taq taqanik y ri e pixabʼ sibʼalaj kʼax kibʼanik. Are kʼu rajawaxik che kubʼan ta kebʼ kikʼuʼx y kkikoj kichuqʼabʼ che ubʼanik. Xuqujeʼ are chiʼ kkikʼut utz taq bʼantajik pa ri kikʼaslemal, ri e nikʼaj chi qachalal pa ri congregación xuqujeʼ kkaj kkesaj kiwach. Waʼ taq achijabʼ e jun sipanik uyaʼom ri Jehová che ri congregación, rumal laʼ ri Pablo xubʼij che xyaʼ wajun sipanik rumal ri Dios rech «xuya chke ri kojonelabʼ ronojel ri rajawaxik chke rech kechakunik xuqujeʼ kepataninik, rech kkʼiy ri ucuerpo ri Cristo. Kʼa qonojel kqariq na ri junamil pa ri kojonik xuqujeʼ che ri uqʼoxomaxik ri uKʼojol ri Dios kujopan kʼut pa ri tzʼaqatil kqariq kʼut ri tzʼaqatalaj etabʼalil re ri tzʼaqatil ri kqariq pa ri Cristo Jesús» (Efes. 4:8, 12, 13).

⁸ Ri e kʼamal bʼe man e alaj taq alabʼom taj y e kʼakʼ kojonelabʼ taj o kʼateʼ ta xeʼok pa ri utinamit ri Jehová, xaneʼ kʼo chi ketaʼmabʼal chrij ri jastaq che uqʼijilaxik ri Jehová. Kʼo ketaʼmabʼal chrij ri uTzij ri Dios y kkichʼobʼ ronojel ri kkikʼutu, y kekiloqʼoqʼej konojel ri e kʼo pa ri congregación. Ko ketakʼiʼk y kkixeʼj ta kibʼ che usukʼumaxik jun winaq che kubʼan jun mak pa ri congregación, jeriʼ kekichajij konojel ri e qachalal chuwach taq ri kʼax (Is. 32:2). Konojel ri e qachalal qas kkilo che ri e kʼamal bʼe ko ri kikojonik y che qas kel kikʼuʼx che kichajixik pa ri congregación.

⁹ Ri cristianos che kkaj keʼux kʼamal bʼe rajawaxik kkikʼutu che utz ri kikʼaslemal. Ri e kʼulan chik kkinimaj ri taqanik che uyaʼom ri Jehová chrij ri kʼulanem, kraj kubʼij, xa jun kixoqil y utz kkibʼano ketaqan pa kiwiʼ ri e aj uwo kachoch. We e kʼo kalkʼwal e kojonelabʼ, kenimaxik y nim keʼil wi kumal, ktataj ta itzelal chkij, xuqujeʼ man kewalij ta chkij ri e kʼo pa kiwiʼ, ri congregación kkikubʼsaj kikʼuʼx rech kkita pixabʼ chke chrij ri kbʼan pa ri familia y pa ri kikojonik. Ri kʼamal bʼe rajawaxik che man kʼo ta ktzujux wi y man kʼo ta itzelal kriqitaj chrij y utz kil kumal ri winaq rech man kʼo ta yoqʼobʼal re. Kʼo ta jun mak ubʼanom che kutzʼilobʼisaj ri ubʼantajik ri congregación. Xuqujeʼ rajawaxik che bʼanom ta censurar rumal jun nimalaj makaj. Rumal laʼ ri e qachalal re ri congregación kkixeʼj ta kibʼ, rumal che ri e kʼamal taq bʼe utz ri kikʼaslemal y jeriʼ kkaj kkibʼan ke (1 Cor. 11:1; 16:15, 16).

¹⁰ Ri e kʼamal bʼe kimik kjunamataj ri chak kkibʼano rukʼ ri xkibʼan ri e kʼamal bʼe re ri ojer tinamit Israel. E «ajnoʼjabʼ, ri kʼo ketaʼmanik, ri kesam nimaʼq taq kinoʼj» (Deut. 1:13). Ri e kʼamal bʼe xa e ajmakibʼ, are kʼu etaʼmatal kiwach che kʼo utz taq kibʼantajik pa ri kikʼaslemal y kkibʼan ri kubʼij ri Dios, kikʼutum che kkinimaj ri pixabʼ re ri Dios (Rom. 3:23). Ri utz kikʼaslemal keʼutoʼ rech qas rukʼ usaqil kanimaʼ kekitijoj konojel ri e kʼo pa ri congregación.

¹¹ Ri achijabʼ riʼ kkichomaj na rij ri kkibʼano y kkiya ta uwiʼ ri kkaj kkibʼan ri e nikʼaj chik. Kkikoj ta kichuqʼabʼ che utoʼik uwiʼ apachike uwach jastaq rech are kbʼan ri kkibʼij y kkiya ta uwiʼ ri kkibʼan pa ri kikojonik xaneʼ qas kkikoj utz chomanik pa jalajoj taq jastaq y ketaqan puwiʼ ri kikʼaslemal pa taq ri jastaq junam rukʼ ri ubʼanik etzʼanem, ri unaqʼatisaxik ibʼ che jun jastaq, ri waʼim y ri ukʼiʼanik o qumunik. We kkitij tzam rajawaxik kkikoj utz chomanik jeriʼ man e qʼabʼarelabʼ taq winaq taj. Ri winaq che sibʼalaj kʼi tzam kutijo ksach ri uchomanik, y we ksach ri uchomanik kkun ta riʼ krilij ri kikojonik ri e kʼo pa ri congregación.

¹² Rech ri kʼamal bʼe kkunik keʼuchajij ri e kʼo pa ri congregación, rajawaxik sukʼumam o rukʼ cholajil kubʼan ri jastaq. Rajawaxik kʼo utz taq unaqʼatisabʼal, y wariʼ kilitaj pa ri ubʼantajik, pa ri rachoch y pa ri jastaq che kubʼan ronojel taq qʼij. Kkunik kril apan ri kkʼulmataj pa ri petinaq y kuya ta kan ri jastaq kʼa chukʼisbʼal qʼij. Xuqujeʼ nim kril wi ri pixabʼ re ri Biblia.

¹³ Ri kʼamal bʼe rajawaxik bʼanal utzil o kuya ta uwiʼ ri kubʼano. Kchakun pa junamam kukʼ ri e nikʼaj chik kʼamal bʼe re ri congregación. Utz ri uchomanik chbʼil ribʼ y kubʼij ta chke ri e rachiʼl che kkibʼan jastaq che kʼax ubʼanik. Rumal che kuya ta uwiʼ ri kubʼano, kuchomaj taj che are más utz ronojel ri kubʼij chkiwach ri e nikʼaj chi kʼamal bʼe. Kuchʼobʼo che kʼo jujun kibʼantajik ri e rachiʼl che rajawaxik kukʼut areʼ. Pa ri Biblia kresaj wi ronojel ri kuchomaj y kukoj uchuqʼabʼ che resaxik uwach ri ukʼutbʼal ri Jesucristo (Filip. 2:2-8). Ri kʼamal bʼe yakal chʼoj taj, xaneʼ aj jamaril, nim keril wi ri e nikʼaj chik y kuchomaj che más nim kibʼanik e areʼ. Rajawaxik man xuwi ta kubʼan jas ri kqaj chuwach: kukoj ta uchuqʼabʼ che amaqʼel kbʼan ri jastaq che kubʼij. Man koyowar ta chanim, xaneʼ are jun winaq che kutzukuj jamaril.

¹⁴ Ri cristiano che kʼamal bʼe pa ri congregación utz uchomanik o kuchʼobʼ rij ri jastaq. Kʼo upaciencia y aninaq taj kubʼanalaʼ jun jastaq are chiʼ kʼo pa kʼax. Qas kuchʼobʼ ri pixabʼ che kuya ri Dios y retaʼm jas kubʼan che kikojik. Kunimaj ri pixabʼ y ri taqanik che kyaʼ che, y xa ta kebʼ upalaj.

¹⁵ Ri Pablo xunaʼtasaj che ri Tito che ri kʼamal bʼe rajawaxik kuloqʼoqʼej ronojel ri utz, kubʼan ri sukʼ y tastalik winaq. Wariʼ kqʼalajinik rukʼ ri kubʼan che kichʼabʼexik y kilik ri e nikʼaj chik y ri kubʼan che utoʼik uwiʼ ri utz jastaq. Amaqʼel nim kril wi y kunimaj ri sukʼ taq upixabʼ ri Jehová, y kʼo ta jun winaq nijun jastaq kkʼisow uwach ri uloqʼoqʼebʼal che. Kutzijoj ta ri jastaq che kbʼix che. Xuqujeʼ, kuya oqxanibʼal chke nikʼaj chik, kraj kuya ri jastaq re chke ri e nikʼaj chik y ksipanik (Hech. 20:33-35).

¹⁶ Jun utz kʼamal bʼe qas knaw che kitijoxik ri winaq. Pa ri carta che xutaq ri Pablo che ri Tito, xubʼij che «chi kunimaj ri jikalaj tzij, jas ri kubʼij ri tijonik, rech kkunik keʼupixbʼej ri winaq rukʼ ri utzalaj tijonik ri man kʼo ta etzelal che, xuqujeʼ kkun che kichʼakik ri winaq ri kkibʼan kikʼulel che ri tijonik» (Tito 1:9). Retaʼm ktzijon chrij ri jastaq kukʼ nikʼaj chik, kukʼutu jasche je kubʼij y kkunik kuya respuesta che jun winaq che kqʼaten uwach ri utzij. Kukoj ri uTzij ri Dios che kitoʼik y che uyaʼik kichuqʼabʼ ri e nikʼaj chik. Kutzijoj ri utzij ri Dios «are taq kuya ktzijoxik xuqujeʼ are taq man kuya taj» (2 Tim. 4:2). Rukʼ utzilal y paciencia kutoʼ jun cristiano che ubʼanom jun mak o kuya tobʼanik che jun qachalal che ubʼanom kebʼ ukʼuʼx rech kuya ta kan upatanixik ri Jehová. Are jun utzalaj ajtij are chiʼ kuya jun chʼabʼal, rukʼ ri ufamilia o chiʼ kutzijoj ri utzij ri Dios.

¹⁷ Nim ubʼanik che ri e kʼamal bʼe kkesaj uwach ri Jesús che utzijoxik utzij ri Dios rukʼ ronojel kanimaʼ. Ri Jesús sibʼalaj nim xril wi utzijoxik ri utzij ri Dios y xok il che kitoʼik ri utijoxelabʼ rech keʼux utz taq tzijol re ri utzij ri Dios (Mar. 1:38; Luc. 8:1). Junam rukʼ ri Jesús, ri e kʼamal bʼe kkikoj kichuqʼabʼ rech kkitas kitiempo che utzijoxik ri utzij ri Dios paneʼ sibʼalaj latzʼ kiwach y wariʼ kuya kichuqʼabʼ ri e nikʼaj chik rech rukʼ ronojel kanimaʼ je kkibʼano. Y, are chiʼ ri e kʼamal bʼe kebʼe che utzijoxik ri utzij ri Dios rukʼ ri kifamilia y kukʼ nikʼaj chi qachalal, kekunik kkiyalaʼ kichuqʼabʼ chbʼil taq kibʼ (Rom. 1:11, 12).

¹⁸ Weneʼ kqachomaj che sibʼalaj kʼi pixabʼ ktaʼ chke ri e kʼamal bʼe che rajawaxik kkibʼan pa ri kikʼaslemal. Qastzij che kʼo ta jun kkunik keʼubʼan ri taqanik re ri Biblia rukʼ tzʼaqatil, are kʼu rajawaxik che kʼo ta nijun kʼamal bʼe mat ne utz kubʼan che ri reqeleʼn. E jujun kʼamal bʼe sibʼalaj kenaw che ubʼanik jujun taq jastaq y e nikʼaj chik che ubʼanik nikʼaj chi jastaq. Jeriʼ ri jupuq kʼamal bʼe re ri congregación pa junamam kekunik kekichajij ri ucongregación ri Dios rukʼ ri utz taq bʼantajik che kʼo kukʼ.

¹⁹ Are chiʼ ri jupuq kʼamal bʼe re ri congregación kkaj che jun qachalal kok che kʼamal bʼe, qas kechoman chrij wajun pixabʼ che xuya ri apóstol Pablo: «Kinbʼij chiwe chijujunal, kʼo jun muchomaj chi nim ubʼanik, xaneʼ xaq jas ri taqal che. Chijujunal chichomaj iwibʼ rukʼ utzalaj chomanik, jas ri kojonik ri xujach ri Dios chiwe chijujunal, we nim o xa jubʼiqʼ» (Rom. 12:3). Ri e kʼamal bʼe rajawaxik kkichomaj che ri e nikʼaj chik más nim kibʼanik chkiwach e areʼ. Kʼo ta nijun kʼamal bʼe más kuya uwiʼ ri kubʼano are chiʼ knikʼox ri ubʼantajik ri qachalal che kkaj kok che kʼamal bʼe (Ecl. 7:16). We ri e kʼamal bʼe qas kkichʼobʼ ri e taqanik y ri e pixabʼ che rajawaxik kubʼan jun qachalal che kok che kʼamal bʼe, kekunik kkil rukʼ utz chomanik we ri qachalal tajin kubʼan chi ri kubʼij ri Biblia. Are chiʼ ri e kʼamal bʼe tajin kkichomaj we kuya kux kʼamal bʼe jun qachalal, kkikʼutu che nim kkil wi ri utaqanik ri Dios y nim kkil wi ri congregación are chiʼ kkichʼobʼo che kʼo ta nijun winaq tzʼaqat ri ukʼaslemal, are chiʼ xa ta kebʼ kiwach che uchaʼik ri qachalal o are ta kkichaʼ ri más utz kkilo che kyaʼ jun eqeleʼn che. Kkitaʼ tobʼanik che ri Jehová rech kkʼam kibʼe rumal ri ruxlabʼixel y qas utz kkibʼan che unikʼoxik we ri qachalal tajin kubʼan pa ri ukʼaslemal ri kukʼut ri Biblia. Are chiʼ ri jupuq kʼamal bʼe pa ri congregación kkaj che jun qachalal kok che kʼamal bʼe are jun jastaq nim ubʼanik ri tajin kkibʼano. Rumal laʼ rajawaxik kkibʼan ri pixabʼ che xuya ri Pablo: «Are taq kaya ri aqʼabʼ puwiʼ jun ri kok che kʼamal kibʼe ri kojonelabʼ, mabʼan waʼ xaq rukʼ aninaqil» (1 Tim. 5:21, 22).

KʼO UTZ TAQ KIBʼANTAJIK RUMAL RI RUXLABʼIXEL RI DIOS

²⁰ Ri e kʼamal bʼe kkikʼut pa ri kikʼaslemal che kʼamom kibʼe rumal ri ruxlabʼixel ri Dios are chiʼ kkibʼan ri bʼelejebʼ bʼantajik che xubʼij ri Pablo: «Loqʼoqʼebʼal kikʼuʼx [...], kekikotik, kʼo jamaril chkixoʼl kukʼ nikʼaj chik, kʼo kikochʼonik, chʼuchʼuj ri kanimaʼ, kkibʼanalaʼ toqʼobʼ, e jik pa ri kitzij, man kkinimarisaj ta kibʼ, xuqujeʼ ketaqan pa kiwiʼ chbʼil kibʼ» (Gál. 5:22, 23). Ri e kʼamal bʼe che kkikoj kichuqʼabʼ che ubʼanik wariʼ pa ri kikʼaslemal kkiya kichuqʼabʼ xuqujeʼ kekitoʼ ri e qachalal pa ri congregación y pa junamam kkipatanij ri Jehová. Rukʼ ri kkibʼano y ri kichak, kkikʼutu che are ri ruxlabʼixel ri Dios yaʼowinaq wajun eqeleʼn riʼ chke (Hech. 20:28).

KKIYA RI KITOBʼANIK RECH JUNAM RI KICHOMANIK PA RI CONGREGACIÓN

²¹ Nim ubʼanik che ri e kʼamal bʼe junam kechakun kukʼ ri e kachiʼl rech kʼo utzilal pa ri congregación. Paneʼ jalajoj ri kibʼantajik, kʼo utzilal riʼ chkixoʼl we nim kkil wi ri kkibʼij ri e nikʼaj chik, paneʼ junam ta ri kkichomaj. We kʼo ta nijun pixabʼ che mat ne tajin kkojik, konojel kkiya ri kitobʼanik che ri kkichaʼ ubʼanik ri jupuq kʼamal bʼe re ri congregación. Ri winaq che nim kril ri kkibʼij ri e nikʼaj chik kukʼutu che kraj kkʼam ubʼe rumal ri unoʼj ri Dios, kutzukuj ri jamaril y utz kukʼ ri winaq (Sant. 3:17, 18). Kʼo ta jun kʼamal bʼe kuchomaj che are más nim ubʼanik chkiwach ri e nikʼaj chik o che kraj ktaqan pa kiwiʼ. Ri e kʼamal taq bʼe pa junamam kechakunik rech kʼo utzilal pa ri congregación. We jeʼ kkibʼano tajin kkiya ri kitobʼanik che ri Jehová (1 Cor., cap. 12; Col. 2:19).

CHAKOJOʼ ACHUQʼABʼ CHE KIBʼANIK RI TAQANIK Y RI E PIXABʼ RE RI BIBLIA

²² Ri kraj kux kʼamal bʼe rajawaxik kukoj uchuqʼabʼ che unimaxik ronojel ri kubʼij ri Biblia. Wariʼ kukʼutu che ko pa ri ukojonik (1 Tim. 3:1). Are kʼu, sibʼalaj kʼi chak kʼo chkiwach ri e kʼamal bʼe. Rajawaxik kkil ri kajwataj chke ri e qachalal pa ri kikʼaslemal y pa ri kikojonik.

ARE CHIʼ KKʼEXTAJ RI JASTAQ

²³ Jun kʼamal bʼe che kʼi chi junabʼ tajin kpatanin pa ri congregación, weneʼ kkun ta chik kril ri reqeleʼn rumal jun yabʼil, ri ujunabʼ o nikʼaj chi jastaq. Are kʼu rajawaxik nim kil wi y kil na junam rukʼ jun kʼamal bʼe. Rajawaxik taj che kuya kan ri reqeleʼn rumal waʼ taq jastaq riʼ. Taqal wi na che che nim kil ri kubʼano junam kukʼ ri e nikʼaj chi kʼamal bʼe che kkikoj kichuqʼabʼ che kichajixik ri e qachalal.

²⁴ Are kʼu, we kuchomaj che rajawaxik kuya kan ri eqeleʼn re kʼamal bʼe rumal che xkʼextaj ri ukʼaslemal, kkunik kubʼano (1 Ped. 5:2). Tekʼuriʼ ri e qachalal rajawaxik nim wi na kkilo, rumal che nim upatan pa ri congregación, paneʼ kubʼan ta chi ri eqeleʼn che kubʼan jun kʼamal bʼe.

RI E CHAK CHE KKIBʼAN RI E KʼAMAL BʼE PA RI CONGREGACIÓN

²⁵ Ri e kʼamal bʼe jalajoj ri chak kkibʼan pa ri congregación: ri jachal kichak ri jupuq kʼamal bʼe, ri secretario, ri kʼamal bʼe re servicio, ri kʼamal bʼe pa ri Etaʼmanik re ri wuj Ri Chajinel y ri kʼamal bʼe re ri riqbʼal ibʼ Qachak xuqujeʼ Qakʼaslemal. Xuqujeʼ, e kʼi e kojom che kʼamal bʼe re grupo. Waʼ taq chak riʼ kkibʼan pa ronojel ri tiempo che kekunik kkibʼano. Are kʼu, we jun kʼamal bʼe kukʼex ri ucongregación, kkun ta chik kril ri reqeleʼn rumal jun yabʼil o tajin ta chi kubʼan pa ri ukʼaslemal ri kubʼij ri Biblia, rajawaxik kkoj jun chi kʼamal bʼe rech kubʼan ri uchak. We e kʼi ta ri e kʼamal bʼe e kʼo pa ri congregación, weneʼ jun kʼamal bʼe más kʼi chak kubʼano. Wariʼ kkʼextajik are chiʼ kok chi jun kʼakʼ kʼamal bʼe.

²⁶ Ri jachal kichak ri jupuq kʼamal bʼe are kkʼamow ubʼe ri e riqbʼal ibʼ kech ri e kʼamal bʼe re ri congregación. Rukʼ machʼachʼem kchakun kukʼ ri e rachiʼl che kichajixik ri e qachalal pa ri congregación (Rom. 12:10; 1 Ped. 5:2, 3). Retaʼm jas kubʼan che uyaʼik pa cholajil ri jastaq re ri congregación y qas utz kubʼan che ri reqeleʼn re kʼamal bʼe y re jachal kichak ri e nikʼaj chi kʼamal bʼe (Rom. 12:8).

²⁷ Ri secretario pa uqʼabʼ kʼo wi ri archivos re ri congregación y kubʼij chke ri e nikʼaj chi kʼamal bʼe ri jastaq che nim kibʼanik. We rajawaxik, utz we kbʼix chi che jun kʼamal bʼe o jun tobʼanel che kuya tobʼanik che.

²⁸ Ri kʼamal bʼe re servicio are kril ronojel ri kʼo ubʼanik rukʼ ri utzijoxik ri utzij ri Dios. Xuqujeʼ, kukoj jun fin de semana pa jun ikʼ rech keʼusolij ri grupos re ri congregación. Pa ri congregaciones che kʼi ta grupos e kʼolik, weneʼ kamul keʼusolij pa jun junabʼ. ¿Jas kubʼano are chiʼ keʼusolij? Are kbʼanow ri riqbʼal ibʼ re utzijoxik ri utzij ri Dios, kel kukʼ ri e qachalal y kbʼe kukʼ are chiʼ kekisolij jun winaq che kraj kretaʼmaj más chrij ri Biblia y are chiʼ kekiya etaʼmanik re ri Biblia.

RI E KʼAMAL BʼE RE GRUPO

²⁹ Nim ubʼanik ri eqeleʼn kʼamal bʼe re grupo. Ri rajawaxik kubʼano are wariʼ: 1) krilij ri kajwataj pa ri kikojonik ri e qachalal re ri grupo 2) keʼutoʼ ri e qachalal rech amaqʼel kkitzijoj ri utzij ri Dios rukʼ kikotemal y kekitoʼ más winaq, y 3) keʼutoʼ ri tobʼanelabʼ rech kechoman chrij más eqeleʼn pa ri congregación y rech kekunik kkiriqo. Are ri jupuq kʼamal bʼe re ri congregación keʼilowik jachin kebʼanow wajun chak riʼ.

³⁰ Rumal che nim ubʼanik ri chak che kubʼan jun kʼamal bʼe re grupo, más utz we are jun kʼamal bʼe kbʼanowik. Are kʼu, we e kʼi ta kʼamal bʼe e kʼo pa ri congregación, utz we kyaʼ wajun eqeleʼn riʼ che jun tobʼanel che ko pa ri ukojonik y kʼateʼ kkʼexik we kʼo chi jun kʼamal bʼe che kbʼanow wajun chak riʼ. Kbʼix tobʼanel re grupo che, rumal che are ta jun kʼamal bʼe, xaneʼ rukʼ ri kitobʼanik ri e kʼamal bʼe kubʼan wajun eqeleʼn riʼ.

³¹ Nim ubʼanik che ri kʼamal bʼe re grupo kuya jun utz kʼutbʼal che utzijoxik ri utzij ri Dios. We amaqʼel kutzijoj ri utzij ri Dios y rukʼ kikotemal kubʼano, keʼutoʼ riʼ ri e qachalal re ri grupo rech xuqujeʼ je kkibʼano. We junam kechakunik kkiya kichuqʼabʼ riʼ chbʼil taq kibʼ y kkiriq utzilal, rumal laʼ are utz we ktzukux jun hora are chiʼ konojel kekunik keʼel che utzijoxik ri utzij ri Dios (Luc. 10:1-16). Más na are ri kʼamal bʼe re grupo kkʼamow ubʼe ri riqbʼal ibʼ che utzijoxik ri utzij ri Dios y ri kjachow kiwach ri e qachalal. Xuqujeʼ are kilowik we kʼo territorios ri ktzijox wi ri utzij ri Dios. Y we kʼo jun qʼij kkun taj kukʼam ubʼe ri grupo, kkunik kutaʼ toqʼobʼ che jun chi kʼamal bʼe o jun tobʼanel. We kʼo ta jun chke ri e qachalal riʼ kkunik, kuyaʼ kubʼij che apachike qachalal che ko pa ri ukojonik.

³² Ri kʼamal bʼe re grupo keʼutoʼ ri e qachalal rech kekunik kekʼojiʼ are chiʼ kubʼan ri solinik ri kʼamal bʼe re servicio. Kuya ubʼixik chke ri e qachalal che e kʼo pa ri grupo y kubʼij chke ri utzilal kkiriq rumal ri solinik. Konojel rajawaxik kkiya ri kitobʼanik y kkikoj kichuqʼabʼ rech keʼel che utzijoxik utzij ri Dios are chiʼ kubʼan ri solinik ri kʼamal bʼe re servicio.

³³ Rajawaxik che e kʼi ta qachalal e kʼo pa ri grupos rech ri kʼamal bʼe re grupo kretaʼmaj kiwach konojel. Areʼ keʼuloqʼoqʼej ri e qachalal y kel ukʼuʼx chke chkijujunal. Kukoj uchuqʼabʼ rech keʼutoʼ pa ri kikojonik, kkitzijoj ri utzij ri Dios, kekʼojiʼ pa ronojel taq ri riqbʼal ibʼ y kkibʼan ri chak che kyaʼ chke y ri kicomentarios. Konojel ri e qachalal kkiriq utzilal y kkowir ri kikojonik rumal che ri kʼamal bʼe re grupo kukoj chuqʼabʼ che kitoʼik: e jujun qachalal che e yawabʼ o qajinaq kichuqʼabʼ pa ri kikojonik kyaʼ kichuqʼabʼ rumal; e nikʼaj chik kekunik kechoman chrij más eqeleʼn pa ri congregación rumal ri pixabʼ che kuya chke. Qastzij che ri kʼamal bʼe re grupo are más kerilij ri e kʼo pa ri ugrupo, are kʼu rumal che kʼamal bʼe, rajawaxik kel ukʼuʼx chke konojel ri e qachalal che e kʼo pa ri congregación y kuya ri utobʼanik chke are chiʼ kajwatajik (Hech. 20:17, 28).

³⁴ Che ri kʼamal bʼe re grupo kkiya wi ri kinforme ri qachalal tekʼuriʼ ri areʼ kujach che ri secretario. Ri e qachalal kkiya ri kitobʼanik che ri kʼamal bʼe re grupo are chiʼ aninaq kkiya ri kinforme che ronojel kʼisbʼal taq ikʼ. Kekunik kkiya che ri areʼ o pa ri kaxon che chaʼom ri kyaʼ wi kan ri informes pa ri Ja rech Ajawbʼal.

RI COMITÉ RE SERVICIO RE RI CONGREGACIÓN

³⁵ Pa ri comité re servicio kʼo ri jachal kichak ri kʼamal bʼe, ri secretario y ri kʼamal bʼe re servicio. Wajun comité are kilowik we kuya kkoj ri Ja rech Ajawbʼal are chiʼ kyaʼ jun chʼabʼal re jun kʼulanem o jun chʼabʼal rumal che xkam jun qachalal, y are kyaʼow ri e qachalal pa jalajoj taq grupos re utzijoxik ri utzij ri Dios. Xuqujeʼ are kilowik we jun qachalal kuya kux precursor auxiliar y regular. Ri comité re servicio kubʼan waʼ taq chak riʼ chuxeʼ ri kitaqanik ri jupuq kʼamal bʼe re ri congregación.

³⁶ Are ri sucursal kbʼinik jas chak kubʼan ri comité re servicio, ri kʼamal bʼe re ri Etaʼmanik re Ri Chajinel, ri kʼamal bʼe re ri riqbʼal ibʼ Qachak xuqujeʼ Qakʼaslemal y ri kkibʼan ri e nikʼaj chi kʼamal bʼe.

³⁷ Ri jupuq kʼamal bʼe re ri congregación kkimulij kibʼ kajibʼ mul pa jun junabʼ rech kkilo jas ri kajwataj chke ri e qachalal pa ri kikojonik. Kamul kkimulij kibʼ pa jun junabʼ rukʼ ri solinel re circuito, y are chiʼ qʼaxinaq chi oxibʼ ikʼ che ri solinel re circuito xeʼusolij, kkimulij chi jumul kibʼ. Are kʼu kekunik kkimulij kibʼ pa nikʼaj chi qʼij we kkilo che rajawaxik.

UNIMAXIK RI CHOLAJIL CHE UKOJOM RI DIOS PA RI CONGREGACIÓN

³⁸ Junam rukʼ ri qilom chik, ri e kʼamal bʼe xa e ajmakibʼ. Are kʼu ri Jehová kraj che kojniman chke rumal che are ri cholajil che ukojom pa ri congregación. Ri e kʼamal bʼe yaʼom taqanik chke rumal ri Jehová, y areʼ kril na we utz o utz ta ri tajin kkibʼano. Pa Hebreos 13:17 kubʼij: «Chixniman chke ri kʼamal taq ibʼe, chiyaʼ iwibʼ pa taqik chke. Ri e areʼ kekichajij ri iwanimaʼ, ketaʼm kʼut chi rajawaxik kkibʼij na che ri Dios jas ri kibʼanom. Chixniman chke rech kkibʼan ri kichak rukʼ kikotemal, man rukʼ ta bʼis. We ta kʼu rukʼ bʼis kkibʼano, ma ta kʼo kiwechbʼej riʼ che». Ri Jehová kukoj ri uxlabʼixel rech keʼuchaʼ e jachin keʼux kʼamal bʼe, y kukojo rech kresaj ri eqeleʼn chke we man kkibʼan ta chi pa kikʼaslemal ri kubʼij ri Biblia y ri rajawaxik kubʼan jun kʼamal bʼe.

³⁹ ¿La mat qastzij che nim keqil wi ri e kʼamal bʼe pa ri congregación rumal ri utzalaj kikʼutbʼal y ri utzalaj chak che kkibʼano? Ri chak che kkibʼan pa ri congregación kojutoʼ rech kʼax ta kqabʼan che upatanexik ri Dios y rukʼ kikotemal kqabʼano. Ri apóstol Pablo xuya wajun pixabʼ riʼ chke ri cristianos re Tesalónica: «Wachalal, kixqabʼochiʼj chi nimaʼq cheʼiwilaʼ wi ri kechakun taq chixoʼl, ri kekʼamow ibʼe xuqujeʼ keyoʼw inoʼj pa ri Ajawaxel. Sibʼalaj cheʼiloqʼoqʼej, rumal rech ri kichak» (1 Tes. 5:12, 13). Xuqujeʼ, pa ri nabʼe carta che xutaq bʼi ri Pablo che ri Timoteo, xubʼij ri rajawaxik kkibʼan ri e kʼo pa ri congregación che kilik ri e kʼamal bʼe: «Ri tatayibʼ [e kʼamal bʼe] ri ketaqan pa ri komon kojonelabʼ ri utz rukʼaxik ri kichak kkibʼano, taqal chke chi sibʼalaj nim keʼiwil wi, puwiʼ ronojel ri kkitzijoj ri utzij ri Dios xuqujeʼ ri ketijonik» (1 Tim. 5:17).

NIKʼAJ CHI EQELEʼN CHE KKIBʼAN PA RI UTINAMIT RI JEHOVÁ

⁴⁰ E jujun taq kʼamal bʼe kechaʼik rech kepatanin pa taq ri Grupos re Solinik chke Yawabʼibʼ. E nikʼaj chik rech kekʼojiʼ pa ri Comités che Ketzijon kukʼ ri Hospitales. Ri e qachalal che e kʼo pa waʼ taq comités kekisolij ri hospitales y ketzijon kukʼ ri kunanelabʼ chrij taq ri tratamientos che kkoj ta kikʼ chupam che kkikoj ri testigos rech Jehová. E nikʼaj chi kʼamal bʼe ketobʼan che uyakik y rilik ri kajwataj che taq ri Ja rech Ajawbʼal, y ri e Ja re nim riqbʼal ibʼ o kepatanin pa taq comités re nim riqbʼal ibʼ. Qonojel nim keqil waʼ taq qachalal che sibʼalaj kechakunik, che rukʼ ronojel kanimaʼ kkiya ri kitiempo y ri kichuqʼabʼ rech kekipatanij ri e nikʼaj chik (Filip. 2:29).

RI SOLINELABʼ RE CIRCUITO

⁴¹ Ri Jupuq Ajkʼamal bʼe cho ronojel uwach Ulew keʼuchaʼ jujun kʼamal bʼe rech keʼux solinelabʼ re circuito. Are ri sucursal kbʼinik jas taq congregaciones kekisolij ri solinelabʼ, kamul pa jun junabʼ keʼopan pa taq ri congregaciones. Ri solinelabʼ re circuito xuqujeʼ kekisolij jujun taq mul ri e precursores che sibʼalaj naj e kʼo wi. Kkibʼan jun cholajil re solinik y kkibʼij apan chke ri congregaciones are chiʼ kraj na kebʼ oxibʼ ikʼ che keʼopanik rech konojel kkiriq utzilal rumal ri solinik.

⁴² Ri jachal kichak ri e kʼamal bʼe krilo che kʼo chi ronojel ri jastaq che kajwataj pa ri solinik re ri solinel re circuito. Jeriʼ ri solinel kuya kichuqʼabʼ konojel ri e qachalal (Rom. 1:11, 12). Are chiʼ kretaʼmaj chi nikʼaj jastaq che kʼo ubʼanik rukʼ ri solinik y chrij ri kajwataj che ri solinel re circuito y ri rixoqil, ri jachal kichak ri kʼamal bʼe ktzijon kukʼ nikʼaj chi qachalal rech kilik jas ja kekanaj wi kan ri solinel y ri rixoqil, y nikʼaj chi jastaq che kajwataj chke. Are chiʼ krilo che kʼo chi ronojel ri jastaq che kajwatajik, kubʼij chke konojel ri qachalal y che ri solinel re circuito.

⁴³ Ri solinel re circuito ktzijon rukʼ ri jachal kichak ri e kʼamal bʼe rech kkil ri horario re taq ri e riqbʼal ibʼ xuqujeʼ ri e riqbʼal ibʼ re utzijoxik ri utzij ri Dios. Are chiʼ kbʼan ri programa are kkoj ri pixabʼ che kuya ri solinel re circuito y ri sucursal. Konojel rajawaxik aninaq kketaʼmaj jampaʼ y jawiʼ kebʼan wi ri e riqbʼal ibʼ re congregación, xuqujeʼ ri e riqbʼal ibʼ kukʼ ri precursores, ri riqbʼal ibʼ kukʼ ri kʼamal bʼe y ri tobʼanelabʼ, y jawiʼ kebʼe wi che utzijoxik ri utzij ri Dios.

⁴⁴ Ri jachal kichak ri e kʼamal bʼe krilo che qas kyaʼ che ri solinel re circuito ri e wuj Registro de publicador de la congregación, ri wuj che tzʼibʼam wi e jampaʼ xkimulij kibʼ pa taq ri e riqbʼal ibʼ, ri wuj re taq ri territorios y ri tzʼibʼam wi ri bʼanom che ukojik ri pwaq re ri congregación. Pa ri bʼenaqʼij re martes, ri solinel re circuito kunikʼoj ronojel waʼ taq wuj riʼ y krilo we rajawaxik kuya tobʼanik chke ri e qachalal che keʼilow wariʼ. Kinikʼoxik ri e wuj kutoʼ ri solinel rech krilo we kʼo kajwataj che ri congregación.

⁴⁵ Pa ri semana che ri solinel re circuito kusolij ri congregación, kutas utiempo rech ktzijon kukʼ ri e qachalal pa ri e riqbʼal ibʼ, are chiʼ kkitzijoj ri utzij ri Dios, chiʼ kewaʼik y pa nikʼaj chi horas. Are chiʼ kubʼan ri riqbʼal ibʼ kukʼ ri e kʼamal bʼe y ri tobʼanelabʼ, kuya kichuqʼabʼ y kuya pixabʼ re ri Biblia chke rech kekitoʼ konojel ri e qachalal (Prov. 27:23; Hech. 20:26-32; 1 Tim. 4:11-16). Xuqujeʼ kubʼan jun riqbʼal ibʼ kukʼ ri precursores rech kuya kichuqʼabʼ y kuya tobʼanik chke rech kkichʼij ri kʼax.

⁴⁶ Are chiʼ kʼo nikʼaj chi jastaq che rajawaxik kilik, ri solinel re circuito kukoj uchuqʼabʼ che uyaʼik ri tobʼanik pa ri semana re ri solinik, rech ksukʼumax ri jastaq. We kekun ta che usukʼumaxik pa ri semana riʼ, ri solinel re circuito kubʼij kan chke ri e kʼamal bʼe y chke ri e qachalal che kʼo kkil rukʼ ri jastaq che rajawaxik ksukʼumaxik, jas kkibʼan che uriqik pixabʼ re ri Biblia chrij ri tajin kkikʼulmaj. We kajwataj ri utobʼanik ri sucursal che usukʼumaxik ri jastaq, ri solinel re circuito y ri e kʼamal bʼe kkitaq bʼi jun informe jawiʼ kkibʼij wi ronojel ri tajin kkʼulmatajik.

⁴⁷ Ri solinel re circuito kkʼojiʼ pa ri e riqbʼal ibʼ re ri congregación che tajin kusolij. Rukʼ ri pixabʼ uyaʼom ri sucursal, weneʼ kʼo jujun taq jastaq kkʼex che ri e riqbʼal ibʼ. Kuya chʼabʼal rech kuya kichuqʼabʼ konojel, keʼutoʼ ri qachalal rech kechakun más, keʼutijoj y kukowirisaj ri kikojonik. Keʼutoʼo rech knimar más ri kiloqʼoqʼebʼal chrij ri Jesucristo, ri Jehová y ri utinamit.

⁴⁸ Jun chke ri jastaq che kubʼan ri solinel re circuito, are che kuya kichuqʼabʼ ri e qachalal rech rukʼ ronojel kanimaʼ kkitzijoj ri utzij ri Dios y kuya pixabʼ chke rech utz kkibʼan che. Rumal laʼ, kuya utzilal chqe we kqabʼij che ri kʼamal bʼe re servicio che kqaj kojrachilaj ri solinel re circuito o ri rixoqil are chiʼ kqabʼan jun solinik o chiʼ kqaya jun etaʼmanik re ri Biblia. Ri e qachalal kekunik kkisukʼumaj ri kihorario re ri kichak o ri kkibʼano, rech kekunik kkitzijoj más ri utzij ri Dios pa ri semana che kʼo ri solinel xuqujeʼ weneʼ kkibʼan ri precursorado auxiliar. Ronojel ri kbʼan che uyaʼik tobʼanik che utzijoxik ri utzij ri Dios pa ri semana re ri solinik, sibʼalaj nim ubʼanik (Prov. 27:17).

⁴⁹ Pa jun junabʼ kebʼan kebʼ nim riqbʼal ibʼ re circuito. Pa jun chke wariʼ, ri sucursal kutaq lo jun representante che kuya chʼabʼal. Ri solinel re circuito are kilowik che kebʼan ri e nim riqbʼal ibʼ. Krilo jachin ri superintendente re nim riqbʼal ibʼ y ri superintendente auxiliar. E areʼ kkiya ri kitobʼanik che ri solinel re circuito, rech kebʼan ri e nim riqbʼal ibʼ. Rech jeriʼ, ri solinel re circuito krilo che qas utz kbʼan che ri programa. Ri solinel re circuito xuqujeʼ keʼukoj e nikʼaj chi qachalal pa jalajoj taq departamentos. Xuqujeʼ, kubʼij chke e jujun qachalal che rajawaxik kkinikʼoj ri bʼanom che ukojik ri pwaq re ri circuito. Jujun taq mul, ri circuitos kepaʼix pa secciones rumal che weneʼ e kʼo jujun congregaciones naj e kʼo wi o che kʼo ta jun kʼolbʼal ri kbʼan wi ri nim riqbʼal ibʼ che kuya keʼopan konojel ri qachalal. Rumal laʼ, chkijujunal ri secciones kkibʼan ri kinim riqbʼal ibʼ.

⁵⁰ Ri solinel re circuito kutaq bʼi ri rinforme re utzijoxik ri utzij ri Dios che ri sucursal. Xuqujeʼ kkunik kutaq bʼi jun informe rech ri pwaq che xukoj pa ri solinik y che ri congregación xkun taj xtobʼan rukʼ wariʼ, junam rukʼ ri upasaje o ri xukoj che ri uchʼichʼ, ri xukoj che ri jastaq re kutijo, ri ja che xkanaj wi kanoq o jun chi jastaq che xajwatajik rech xubʼan ri solinik. Ri Jesús xubʼij che ri winaq che kuya pa nabʼe lugar ri uQʼatbʼal tzij ri Dios, kuriq ronojel ri kajwataj che, y ri solinelabʼ re circuito qas kkikubʼsaj kikʼuʼx chrij wajun tzujunik riʼ (Luc. 12:31). Are kʼu ri congregaciones rajawaxik knaʼtaj chke che yaʼom wajun nimalaj eqeleʼn pa kiqʼabʼ, che rajawaxik kesipanik y kkiya ri kajwataj chke ri solinelabʼ (3 Juan 5-8).

RI COMITÉ RE SUCURSAL

⁵¹ Kʼo jun Comité re Sucursal pa ronojel taq ri sucursales kech ri testigos rech Jehová, chupam wajun comité e kʼo e oxibʼ o más qachalal che ko ri kikojonik. Jun chke are ri jachal kichak. Wajun comité kril ri kbʼan che utzijoxik ri utzij ri Dios pa ronojel ri territorio che kʼo chuxeʼ ri kitaqanik, weneʼ kʼo jun o más países.

⁵² Ri Comité re Sucursal keʼuchajij ri congregaciones che e kʼo pa ri uterritorio. ¿Jas kubʼan che kichajixik? Keʼuya pa cholajil ri congregaciones y ri circuitos rech kkibʼan ri chak che kajwataj pa ri territorio y che ktzijox ri utzij ri Dios pa ronojel taq ri tinamit. Krilij ri chak che kkibʼan ri misioneros, ri precursores especiales, regulares y auxiliares. Are kilowik che kbʼan ri nimaʼq taq riqbʼal ibʼ y krilo jachin taq kebʼanow ri asignaciones chupam, jeriʼ kebʼan ronojel ri chak «rukʼ kolomal xuqujeʼ rukʼ cholajil» (1 Cor. 14:40).

⁵³ Kʼo jujun países, che kʼo ta jun sucursal chupam. ¿Jas kʼu kbʼan che rilik ri chak che kbʼan chupam? Are ri sucursal re jun chi país kilow ri chak. Jujun taq mul kekoj Comité re País chupam waʼ taq lugares riʼ. Ri Comité re País, kkunik kril ri chak re ri lugar ri kʼo wi. Kril ri kʼo ubʼanik rukʼ ri Hogar Betel, ri oficinas, ri e wuj che ktaq bʼi pa taq ri congregaciones, ri informes y ri chak che tajin kbʼan che utzijoxik ri utzij ri Dios. Ri Comité re País y ri Comité re Sucursal junam kechakunik rech utz kel ri uchak ri Jehová.

⁵⁴ Are ri Jupuq Ajkʼamal bʼe cho ronojel uwach Ulew kekojow ri qachalal che kepatanin pa ri kebʼ comités riʼ.

E QACHALAL CHE E TAQOM LO RUMAL RI CENTRAL MUNDIAL

⁵⁵ Jujun taq mul ri Jupuq Ajkʼamal bʼe cho ronojel uwach Ulew keʼutaq bʼi qachalal re ri central mundial pa taq ri sucursales. Ri rumal are che ri e qachalal che ketaq loq kkiya kichuqʼabʼ ri e kʼo pa ri familia Betel y kekitoʼ ri e kʼo pa ri Comité re Sucursal rech kkisukʼumaj jujun taq kʼax che kʼo chkiwach o jujun taq jastaq che kʼo ubʼanik rukʼ ri kbʼan che utzijoxik ri utzij ri Dios. Ri qachalal che taqom loq xuqujeʼ keʼusolij jujun taq solinelabʼ re circuito y jujun taq mul keʼusolij ri misioneros che e kʼo pa ri territorio. Are chiʼ keʼusolij, ktzijon kukʼ chrij ri kʼax che kiriqom y chrij ri kajwataj chke, y keʼutoʼo rech kkikoj más kichuqʼabʼ che ubʼanik ri chak che sibʼalaj nim ubʼanik; ri utzijoxik ri utzalaj taq jastaq re ri uQʼatbʼal tzij ri Dios y kitoʼik ri winaq rech keʼux Testigos.

⁵⁶ Ri qachalal che taqom lo rumal ri central mundial sibʼalaj kok il che ronojel ri chak che tajin kbʼan che utzijoxik ri utzij ri Dios y ri kbʼan pa taq ri congregaciones. We kuya tiempo, keʼusolij ri taq oficinas remotas re traducción. Xuqujeʼ, kukoj uchuqʼabʼ rech kel che utzijoxik ri utzij ri Dios pa waʼ taq solinik riʼ.

WARIʼ KUKʼUT RI ULOQʼOQʼEBʼAL RI JEHOVÁ

⁵⁷ Sibʼalaj kuya utzilal chqe ri nimalaj chak che kkibʼan waʼ taq qachalal riʼ che e ko pa ri kikojonik y rukʼ loqʼoqʼebʼal kojkichajij. Unimaxik ri pixabʼ che kkiya ri e kʼamal bʼe che yaʼom ri eqeleʼn chke che ukʼamik qabʼe kubʼano che kojkunik kojchakun pa junamam rukʼ ri Cristo, ri Kʼamal bʼe re ri congregación (1 Cor. 16:15-18; Efes. 1:22, 23). Rumal wariʼ, ri congregaciones re ronojel uwach Ulew, kkiriq nimaʼq taq tewchibʼal rumal che kkiyaʼo che kkʼam kibʼe rumal ri uTzij ri Dios y ri ruxlabʼixel (Sal. 119:105).