Ri tobʼanelabʼ kkibʼan jun utzalaj chak pa ri congregación

PA RI wuj che xutzʼibʼaj ri apóstol Pablo chke ri filipenses, xubʼij wariʼ chke: «In Pablo xuqujeʼ ri Timoteo, uj uloqʼom taq pataninelabʼ ri Jesucristo, kqatzʼibʼaj bʼik we wuj riʼ chke konojel ri kojonelabʼ pa Cristo Jesús ri e kʼo chilaʼ pa Filipos, xuqujeʼ chke ri kojonelabʼ ri kesolin konojel ri aj Cristo xuqujeʼ chke ri kojonelabʼ ri kepataninik [tobʼanelabʼ]» (Filip. 1:1). Xqilo che pa ri wuj xutaq bʼi rutzil wachaj che ri congregación xuqujeʼ chke ri tobʼanelabʼ. Ojer kanoq, ri nim chak che xkibʼano are jun tobʼanik chke ri e kʼamal taq bʼe. Kimik xuqujeʼ ri tobʼanelabʼ kkiya jun nim tobʼanik chke ri e kʼamal bʼe y jeriʼ utz kel ri chak pa taq ri congregaciones.

² ¿La qetaʼm jachin ri tobʼanelabʼ re ri qacongregación? ¿La qetaʼm jas chak kkibʼano y jas tobʼanik kkiya chqe? Ri Jehová sibʼalaj nim kril wi ri chak che kkibʼan ri cristianos riʼ, junam rukʼ ri xubʼij ri Pablo: «Ri pataninelabʼ ri utz kkibʼan che ri kichak, nim keʼil wi na pa ri komon kojonelabʼ xuqujeʼ kketaʼmaj utzijoxik ri kikojonik che ri Cristo Jesús, man kkixeʼj ta kibʼ» (1 Tim. 3:​13).

RI E TAQANIK Y RI E PIXABʼ CHE RAJAWAXIK KKIBʼAN RI TOBʼANELABʼ

³ Ri Pablo xubʼij che ri Timoteo ri e taqanik y ri e pixabʼ che rajawaxik kubʼan jun qachalal rech kux tobʼanel. Xutzʼibʼaj wariʼ: «Jeriʼ xuqujeʼ ri pataninelabʼ, rajawaxik chi nim keʼil wi, xa kebʼ metzijonik, man keqʼabʼar taj, man kkitzukuj ta kʼixbʼalalaj chʼakoj. Rajawaxik qas jikom ri kanimaʼ chrij ri qastzij ri uj kojoninaq wi, ri qʼalajisam chqawach. Xuqujeʼ rajawaxik kkinaʼ pa kanimaʼ chi man kʼo ta etzelal kibʼanom. Xuqujeʼ ri kekoj che pataninelabʼ nabʼe chiwetaʼmaj we utz kkibʼano o man utz taj. Kʼateʼ riʼ cheʼikojoʼ che pataninelabʼ we man kʼo tzij tom chkij. Rajawaxik chi ri pataninelabʼ chkijujunal xa jun ri kixoqil, utzalaj kukʼaxik ri kalkʼwal xuqujeʼ chi utz kubʼan che kilixik konojel ri e kʼo pa rachoch» (1 Tim. 3:​8-​10, 12). Junam rukʼ ri xqilo, ri Biblia kubʼij che kʼo taqanik nim ubʼanik che rajawaxik kkibʼan pa ri kikʼaslemal. Rajawaxik che ri achijabʼ riʼ e utz kʼutbʼal pa ri kikʼaslemal, che ri qachalal qas kkikubʼsaj kikʼuʼx chkij y utz kkibʼan che ri kichak pa ri congregación. Je wariʼ, kbʼix ta tzij chrij ri congregación xa rumal che keʼukoj achijabʼ che utz ta kinojibʼal o utz ta ri kikʼaslemal.

⁴ Apastaneʼ ri kijunabʼ, ri tobʼanelabʼ rajawaxik amaqʼel kkitzijoj ri utzij ri Dios rukʼ kikotemal. Je wariʼ kkesaj uwach ri xubʼan ri Jesús che utzijoxik ri utzij ri Dios y ri kubʼan ri Jehová che rilik ri kikolotajem ri winaq (Is. 9:7).

⁵ Ri tobʼanelabʼ e utz kʼutbʼal chkiwach ri e nikʼaj chik: utz kkibʼan che usukʼumaxik kibʼ y ri katzʼyaq che kkikojo, utz ri ketzijonik y ri kibʼantajik. Nim keʼil wi kumal ri nikʼaj chik rumal che qas kkichomaj na ri kkibʼano. Xuqujeʼ, nim kkil wi ri kachilanik rukʼ ri Jehová y ri eqeleʼn che yaʼom chke pa ri congregación (Tito 2:​2, 6-8).

⁶ Junam che xubʼij ri Pablo, ri e achijabʼ riʼ ilom chi ri kkibʼan pa ri kikʼaslemal. Kraj kubʼij che kikʼutum chik che are kiyaʼom nabʼe ri uQʼatbʼal tzij ri Dios pa ri kikʼaslemal y kkikoj kichuqʼabʼ che uyaʼik tobʼanik are chiʼ kajwatajik. E jun utzalaj kʼutbʼal che kojkunik kqesaj kiwach (1 Tim. 3:​10).

RI CHAK CHE KKIBʼANO

⁷ Rumal che ri jupuq kʼamal bʼe re ri congregación ketaʼm jas kekunik kkibʼan chkijujunal ri tobʼanelabʼ y jas rajawaxik che ri congregación, are keyaʼow ri kichak. Rumal ri kichak ri tobʼanelabʼ, ri e kʼamal bʼe kekunik kkikoj más kitiempo che kitijoxik y che kisolixik ri e qachalal re ri congregación.

⁸ Chqilaʼ jujun taq chak che kkibʼano. Jujun chke are kkil we kʼo ri wuj che kqakoj chqajujunal pa qachoch y ri kqakoj che utzijoxik ri utzij ri Dios. Nikʼaj chik, kkil ri micrófonos, kkil ri bʼanom che ukojik ri pwaq re ri congregación, ri territorios, ri sonido y jujun kekoj che acomodadores. Nim chak kukʼam bʼi uchʼajchʼobʼisaxik ri Ja rech Ajawbʼal y rilik ri kajwataj che, y are ri tobʼanelabʼ kebʼanow wariʼ. Y weneʼ kekoj kumal ri e kʼamal bʼe che ubʼanik nikʼaj chi jastaq.

⁹ Pa jujun taq congregaciones, konojel ri tobʼanelabʼ kʼo chak kkibʼano. Pa nikʼaj chik, weneʼ e kʼo kʼi tobʼanelabʼ che ubʼanik xa jun chak. Y kʼo jujun mul che jun tobʼanel kubʼan jalajoj chak pa jun congregación. We kʼo ta más tobʼanelabʼ, ri jupuq kʼamal bʼe kekunik kkikoj jujun qachalal che kibʼanom chi ri kiqasanjaʼ y e utz pa ri kikojonik. Wariʼ ktobʼan chke are chiʼ keʼux tobʼanelabʼ. We kʼo ta jun qachalal achi che kubʼan ri chak re jun tobʼanel, ri e kʼamal bʼe kkitaʼ toqʼobʼ che jun qachalal ixoq che ko pa ri ukojonik rech ktobʼan che jujun taq chak, are kʼu kbʼix ta tobʼanel che. Jun cristiano che are jun utz kʼutbʼal, kubʼan ronojel ri jastaq riʼ: amaqʼel kbʼe pa ri e riqbʼal ibʼ, kel che utzijoxik ri utzij ri Dios, utz kubʼan che rilik ri ufamilia, utz kubʼan che uchaʼik ri taq etzʼanem, utz kubʼan che uchaʼik ri ratzʼyaq che kukojo y ri usukʼumaxik ribʼ.

¹⁰ Pa ri congregaciones che e kʼo ta kʼi kʼamal bʼe, ri tobʼanelabʼ che kenaw che ri kichak kekunik kkibʼan ri preguntas re ri nabʼe taq etaʼmanik re ri Biblia chke ri kkaj kkibʼan kiqasanjaʼ. Wariʼ kʼo pa ri nabʼe uchʼaqapil ri apéndice, «E kʼutunem che kekojon ri cristianos chrij». Ri preguntas re ri ukabʼ uchʼaqapil, «Ri rajawaxik kkibʼan ri cristianos pa kikʼaslemal», rajawaxik che are jun kʼamal bʼe kbʼanowik rumal che kchʼaw chrij ri ubʼanom jun winaq pa ri ukʼaslemal.

¹¹ Are más utz che jun tobʼanel kubʼan jun chak pa kʼi tiempo rech más knaw che ubʼanik. Are kʼu, we ri e kʼamal bʼe kkilo che rajawaxik, weneʼ kkikʼex ri reqeleʼn jun o más tobʼanelabʼ.

¹²We kajwataj che ri congregación, utz we kyaʼ nikʼaj chi eqeleʼn chke ri tobʼanelabʼ che qas kkikoj kichuqʼabʼ che ubʼanik ri kbʼix chke (1 Tim. 4:​15). We e kʼi ta kʼamal bʼe e kʼo pa ri congregación, jun tobʼanel kkunik kux tobʼanel re ri kʼamal bʼe re grupo o, jujun taq mul, tobʼanel re grupo, are kʼu kubʼan ri chak riʼ rukʼ ri kitobʼanik ri e kʼamal bʼe. Ri tobʼanelabʼ xuqujeʼ kkiya chʼabʼal pa ri e riqbʼal ibʼ re fin de semana, kkiqʼaxej asignaciones chupam ri riqbʼal ibʼ Qachak xuqujeʼ Qakʼaslemal, y we rajawaxik, kekunik kkiya ri Etaʼmabʼal chrij ri Biblia rech ri congregación. Y we kʼo chi jun jastaq che kajwatajik, kuya kkibʼano (1 Ped. 4:​10). Ri tobʼanelabʼ rajawaxik amaqʼel kkiya ri kitobʼanik chke ri e kʼamal bʼe.

¹³ Ri kichak ri tobʼanelabʼ junam ta rukʼ ri kichak ri e kʼamal bʼe, are kʼu paneʼ junam taj, xuqujeʼ kuya uqʼij ri Dios y ktobʼanik rech utz kel ronojel pa ri congregación. Ri tobʼanelabʼ xuqujeʼ kekunik keʼux kʼamal bʼe we utz kkibʼan che ri kichak y we kekinimaj ri taqanik y ri pixabʼ che kʼo pa ri Biblia rech utz kkibʼan che kichajixik ri e qachalal y e utz taq ajtijabʼ.

¹⁴ Ri alabʼom xuqujeʼ ri qachalal che kʼateʼ xkibʼan ri kiqasanjaʼ utz che kechoman chrij we tajin kkikoj kichuqʼabʼ rech keʼux tobʼanelabʼ (1 Tim. 3:1). Ronojel taq junabʼ keʼok kʼi winaq pa ri utinamit ri Dios, rumal laʼ, rajawaxik achijabʼ che e ko pa ri kikojonik rech kkil ri kajwataj chke ri congregaciones. Rumal laʼ, chakojoʼ achuqʼabʼ rech keʼatoʼ ri qachalal. Ri kattoʼwik che ubʼanik wariʼ are che katchoman chrij ri utzalaj ukʼutbʼal ri Jesús (Mat. 20:​28; Juan 4:​6, 7; 13:​4, 5). Y más kawaj riʼ kaya tobʼanik are chiʼ kawilo che kuya kikotemal kitoʼik ri nikʼaj chik (Hech. 20:​35). Rumal laʼ, amaqʼel cheʼatoʼ ri e nikʼaj chik are chiʼ kajwataj chke, chatopan che ri uchʼajchʼobʼisaxik ri Ja rech Ajawbʼal y we kʼo jun qachalal che kkun taj kuya ri rasignación pa ri riqbʼal ibʼ Qachak xuqujeʼ Qakʼaslemal, chabʼij che kawaj kabʼano. Xuqujeʼ nim ubʼanik che kanimarisaj ri awachilanik rukʼ ri Jehová, katkunik kabʼan wariʼ we kʼo jun aprograma rech kanikʼoj ri Biblia pa atukel (Sal. 1:​1, 2; Gál. 5:​22, 23). Amaqʼel chabʼanaʼ ri chak che kyaʼ chawe pa ri congregación, je wariʼ kuya kkubʼsax kʼuʼx chawij (1 Cor. 4:2).

¹⁵ Rukʼ ri utobʼanik ri uxlabʼixel kyaʼ ri eqeleʼn chke ri tobʼanelabʼ pa ri congregación. Rumal laʼ, chqakʼutuʼ che kqamaltyoxij ri chak che kkibʼano, are chiʼ kqaya ri qatobʼanik chke. Y chiʼ kqabʼan wariʼ kqakʼutu che kqamaltyoxij ronojel ri kubʼan ri Jehová che kichajixik ri congregaciones (Gál. 6:​10).