Ri e kʼolbʼal che kqaya wi uqʼij ri Dios

RI JEHOVÁ keʼutaq ri upatanelabʼ che rajawaxik kkimulij kibʼ rech kkiya uqʼij y kkiya kichuqʼabʼ chbʼil taq kibʼ (Heb. 10:23-25). Ri tabernáculo o ri likʼom rachoch Dios are ri nabʼe lugar jawiʼ xqʼijilax wi ri Dios kumal ri israelitas, ri utinamit che uchaʼom (Éx. 39:32, 40). Are chiʼ xqʼax ri tiempo, ri Salomón ri ukʼojol ri qʼatal tzij David, xuyak ri templo, jun ja ri kyaʼ wi uqʼij ri Dios (1 Rey. 9:3). Are chiʼ xtukix wajun templo riʼ, pa ri junabʼ 607 nabʼe chuwach ri qaqʼij, ri judíos xkimajij umulixik kibʼ pa nikʼaj chi lugares che kbʼix sinagogas chke. Are chiʼ xeqʼax ri junabʼ xnukʼ chi jun mul ri templo y xkoj chi jun mul che uyaʼik uqʼij ri Dios. Ri Jesús xeʼutijoj ri winaq pa ri templo, pa taq ri sinagogas y pa jun juyubʼ (Mat. 5:1-7:29; Luc. 4:16; Juan 18:20).

² Are chiʼ kaminaq chi ri Jesús, ri cristianos xkimulij kibʼ jawiʼ e kʼo wi kʼi winaq y pa jujun taq ja rech kkinikʼoj ri uTzij ri Dios y rech kekachilaj nikʼaj chi cristianos (Hech. 19:8, 9; Rom. 16:3, 5; Col. 4:15; Filem. 2). Jujun taq mul, chelaqʼal xkimulij kibʼ o xkikʼut ta kibʼ rech keʼil ta kumal ri kikʼulel. Qastzij wi che ri ojer upatanelabʼ ri Dios rukʼ ronojel kanimaʼ xkaj xkimulij kibʼ rech ketijox rumal ri Jehová (Is. 54:13).

³ Ri oj cristianos kimik xuqujeʼ kqamulij qibʼ pa jalajoj taq lugares y pa taq kachoch ri e qachalal. Pa waʼ taq kʼolbʼal riʼ kqabʼan ri riqbʼal ibʼ re utzijoxik ri utzij ri Dios. Ri e qachalal nim ubʼanik chkiwach are chiʼ kkiya ri kachoch rech kbʼan ri e riqbʼal ibʼ re utzijoxik ri utzij ri Dios chupam, xuqujeʼ kilom ri utzilal che kuya chke pa ri kikojonik.

RI E JA RECH AJAWBʼAL

⁴ Ri oj testigos rech Jehová, más na kqamulij qibʼ pa ri e Ja rech Ajawbʼal o pa nikʼaj chi kʼolbʼal che e sukʼumam. Jujun taq mul, rajawaxik ktzukux jun ja che kqajik y ktojik. Pa jun Ja rech Ajawbʼal kuyaʼ kkimulij kibʼ jalajoj taq congregaciones, rech qas utz kbʼan che ukojik y kʼi ta pwaq ksachik. Are chiʼ kʼateʼ xyak jun Ja rech Ajawbʼal o kʼateʼ xsukʼumaxik, rajawaxik kbʼan jun riqbʼal ibʼ rech kjach che ri Jehová. Are kʼu rajawaxik taj kbʼan wariʼ we xa jubʼiqʼ xsukʼumax chupam.

⁵ Ri e Ja rech Ajawbʼal kebʼanik xa ta rumal che kqaj kyaʼ qaqʼij, xaneʼ rech utz kojkʼojiʼ wi y kojkitoʼ che kibʼanik ri e riqbʼal ibʼ (Hech. 17:24). Are kʼu rumal che jalajoj kibʼanik ri e tinamit che kebʼan wi, jalajoj ri kbʼan che kiyakik.

⁶ Are ri e qachalal ri kekojow ri e Ja rech Ajawbʼal keyaʼow ri pwaq y keʼilow ri chak che kajwataj che. Kbʼix taj jampaʼ pwaq rajawaxik kyaʼik. Xaneʼ ri keʼopan pa ri e riqbʼal ibʼ kekunik kkiya kan pa ri kaxon re kuchuj ri pwaq «jas ri kpe pa [k]animaʼ» (2 Cor. 9:7).

⁷ Are jun nim eqeleʼn ri uyaʼik kuchuj rech kʼo ri pwaq che kajwataj che ri Ja rech Ajawbʼal, xuqujeʼ chiʼ kojtobʼan che ubʼanik ri chak che rajawaxik chupam y che uchʼajchʼobʼisaxik. Jun kʼamal bʼe o jun tobʼanel kilowik jas kbʼan che ubʼanik waʼ taq chak riʼ. Ri grupos che e bʼanom pa ri congregación are ri kechʼajchʼobʼisan ri Ja rech Ajawbʼal, y ri kʼamal bʼe re grupo o ri tobʼanel re ri kʼamal bʼe re grupo are kmajin ubʼanik. Rajawaxik che ri uwach y ri upam ri Ja rech Ajawbʼal qas chʼajchʼoj, rumal che kuyaʼ uqʼij ri Jehová y ri utinamit.

⁸ Ri congregaciones che xa jun Ja rech Ajawbʼal kkikojo kkibʼan jun Comité re Mantenimiento. Ri e jupuq kʼamal bʼe re ri congregaciones kkil ri rajawaxik kbʼanik y kkichaʼ jun coordinador. Wajun comité riʼ are kilow ronojel ri kajwataj che ri Ja rech Ajawbʼal, krilo che amaqʼel chʼajchʼoj, we kʼo ta kʼax uriqom, y che kʼo ronojel ri jastaq re chʼajchʼojil y ri kkoj che ubʼanik nikʼaj chi chak. Rech kbʼan wariʼ, rajawaxik ri kitobʼanik konojel ri congregaciones che kkimulij kibʼ chupam.

⁹ Are chiʼ kebʼ o más congregaciones kekojow ri Ja rech Ajawbʼal kuya kkʼex ri hora re ri riqbʼal ibʼ are chiʼ kqʼax ri tiempo. Are chiʼ kchomaxik jas hora kebʼan ri e riqbʼal ibʼ re jun congregación, rajawaxik che ri e kʼamal bʼe kkikʼut loqʼoqʼebʼal y are kechoman chrij ri más utz chke ri e nikʼaj chik (Filip. 2:2-4; 1 Ped. 3:8). Kʼo ta jun congregación kchaʼowik jas hora kkibʼan ri kiriqbʼal ibʼ ri nikʼaj chi congregaciones. Jun chi jastaq, are chiʼ kopan ri solinel re circuito pa jun chke ri congregaciones, weneʼ ri e nikʼaj chik rajawaxik kkikʼex ri kihorario pa wajun semana riʼ.

¹⁰ Are ri Comité re Servicio re ri Congregación kilowik we utz kkoj ri Ja rech Ajawbʼal che jun chʼabʼal re kʼulanem o jun chʼabʼal re jun qachalal che xkamik. Ri e kʼamal bʼe qas kkichomaj na are chiʼ jun qachalal kraj kukoj ri Ja rech Ajawbʼal y kkinikʼoj ri e pixabʼ che uyaʼom ri sucursal tekʼuriʼ kkibʼij we utz o utz taj kkojik.

¹¹ Are chiʼ kyaʼ bʼe che jun qachalal kukoj ri Ja rech Ajawbʼal, rajawaxik kukʼut utz taq bʼantajik. Utz taj che kbʼan jastaq che kuyak koyowal ri e qachalal o che kutzʼilobʼisaj ri ubʼiʼ ri Jehová o ri congregación (Filip. 2:14, 15). Xuqujeʼ, ri sucursal jujun taq mul kubʼij che kkoj ri Ja rech Ajawbʼal pa nikʼaj chi jastaq, junam rukʼ ri Tijobʼal chke ri e kʼamal bʼe o ri tobʼanelabʼ o ri Tijobʼal re ri Chak re Precursor.

¹² Ri e kʼo pa ri congregación rajawaxik amaqʼel kkikʼutu che nim kkil wi ri kʼolbʼal jawiʼ kebʼan wi ri e riqbʼal ibʼ. Ri qabʼantajik, ri qatzʼyaq che kqakojo y ri kqabʼan che usukʼumaxik qibʼ, rajawaxik kukʼutu che qas oj upatanelabʼ ri Jehová y che kqanimaj ri utaqanik (Ecl. 5:1; 1 Tim. 2:9, 10). Kqakʼutu che nim kqil wi ri e riqbʼal ibʼ are chiʼ kqanimaj ri e pixabʼ che kuya ri Biblia chrij waʼ taq jastaq riʼ.

¹³ Nim ubʼanik che kʼo cholajil pa ri e riqbʼal ibʼ. Rumal laʼ, kbʼix chke ri e tat nan che kekitʼuyubʼa ri kalkʼwal kukʼ. Y, we ri kalkʼwal kʼa alaj taq e nitzʼaq na, kuya kbʼix chke ri e tat nan che ketʼuyiʼ kan pa jun lugar jawiʼ kkiya ta wi latzʼ chkiwach ri e qachalal are chiʼ rajawaxik kewalij bʼi che kiqʼilik ri kalkʼwal o rilik ri kajwataj chke.

¹⁴ Ri chak che kkibʼan ri acomodadores ktobʼanik rech utz kel ri riqbʼal ibʼ. Rumal laʼ nim ubʼanik che ri acomodadores qas kkichomaj na ri kkibʼano, keloqʼoqʼenik y kkalawachij we kʼo kajwatajik. Más utz we are kekoj ri e kʼamal bʼe y ri tobʼanelabʼ che ubʼanik wariʼ. Jujun jastaq che rajawaxik kkibʼano are che utz kkibʼan che kikʼulaxik ri winaq che kʼateʼ nabʼe mul keʼopanik y kekitoʼ rech kkixibʼij ta kibʼ, kkiya tobʼanik chke ri matam keʼopanik rech kkiriqo jawiʼ ketʼuyiʼ wi, kkajilaj jampaʼ keʼopan pa ri e riqbʼal ibʼ y kkitzukuj ri kkibʼano rech kkinaʼ ta tew ni qʼaqʼ ri qachalal. We rajawaxik, utz we kkibʼij chke ri e tat nan che kekil ri kalkʼwal rech kkitij ta anim are chiʼ majaʼ kumajij ri riqbʼal ibʼ o are chiʼ kkʼisik y che keʼetzʼan ta pa ri plataforma. Xuqujeʼ kuya kkibʼij rukʼ utzilal che jun tat o jun nan che kkesaj bʼi ri kalkʼwal we tajin kutij anim, kuraq uchiʼ o kuta ta chʼabʼexik.

RI UYAKIK JA RECH AJAWBʼAL

¹⁵ Pa ri nabʼe siglo, jujun cristianos kʼo más kirajil y jastaq ke chkiwach ri e nikʼaj chik, rumal laʼ ri Pablo xutzʼibʼaj wariʼ: «Xaneʼ chixkʼol junam. Kamik ri ix, kʼo iwukʼ ri man kʼo ta kukʼ ri e areʼ, pa jun chi kʼu qʼijol ri e areʼ kkʼojiʼ na kukʼ ri man kʼo ta iwukʼ ix, je kʼu riʼ kkʼojiʼ na junamil» (2 Cor. 8:14). Kimik xa junam. Ri kuchuj che kkiya ri congregaciones re ronojel ri uwach Ulew kkoj che usukʼumaxik o che kiyakik e kʼakʼ Ja rech Ajawbʼal jawiʼ keʼajwataj wi. Ri utinamit ri Jehová y ri congregaciones che ketoʼik sibʼalaj kkimaltyoxij ri kuchuj che kkiya ri e qachalal.

¹⁶ Are ri sucursal kilowik jas Ja rech Ajawbʼal kkimulij wi kibʼ ri congregaciones pa jun tinamit. Xuqujeʼ krilo jampaʼ y jawiʼ kyak wi jun kʼakʼ Ja rech Ajawbʼal y jampaʼ kesukʼumax ri kʼo kʼax kiriqom. Are chiʼ qʼaxinaq chi jun kabʼraqan, jun kaqiqʼ jabʼ, jun kʼatik o nikʼaj chi kʼax, ri sucursal kubʼan jun cholajil rech kesukʼumax ri e Ja rech Ajawbʼal che xkiriq kʼax. Jujun taq mul, xuqujeʼ rajawaxik kesukʼumax ri kachoch ri e qachalal che xkiriq kʼax.

¹⁷ Ri sucursal e uchaʼom qachalal ri keʼilow ri kbʼan che uyakik y usukʼumaxik ri e Ja rech Ajawbʼal. Ri e qachalal riʼ are keʼilowik jas ubʼanik ri e Ja rech Ajawbʼal keyakik, ri kbʼan che kiloqʼik ri ulew y kkesaj ri permisos che rajawaxik. Rajawaxik kitobʼanik kʼi qachalal rech keyak ri e Ja rech Ajawbʼal che rajawaxik pa jalajoj taq lugar. Kqaj kqabʼij chke ri e qachalal che kibʼanom chi kiqasanjaʼ che kkinojisaj ri solicitud y kkiya che ri comité re servicio re ri kicongregación. Ri publicadores no bautizados kuya ketobʼan che uyakik o usukʼumaxik ri Ja rech Ajawbʼal re ri kicongregación.

RI E JA RECH NIMAʼQ TAQ RIQBʼAL IBʼ

¹⁸ Ri cristianos re ri nabʼe siglo xkimulij kibʼ pa alaj taq jupuq, are kʼu jujun taq mul sibʼalaj e kʼi xkimulij kibʼ (Hech. 11:26). Ri oj upatanelabʼ ri Dios kimik xuqujeʼ kqamulij qibʼ pa nimaʼq taq e riqbʼal ibʼ re circuito y ri re oxibʼ qʼij. Rech kojkunik kqamulij qibʼ, kqaj ri kʼolbʼal y ktojik, o we kʼo ta kʼolbʼal jawiʼ kqamulij wi qibʼ, kqayako o kqaloqʼ jun nimalaj ja, che kbʼix Ja rech nimaʼq taq riqbʼal ibʼ che.

¹⁹ Paneʼ jujun taq mul kloqʼ jun kʼolbʼal y ksukʼumaxik rech kbʼan jun Ja re nimaʼq taq riqbʼal ibʼ che, ri más kbʼanik are che kloqʼ ri ulew y kyak jun chuwach. ¿Jas unimal ri Ja rech ri nimaʼq taq riqbʼal ibʼ kbʼanik? Are kil ri rajawaxik chke ri qachalal. Are chiʼ kʼa majaʼ kloqʼik o kyak jun Ja re nimaʼq taq riqbʼal ibʼ, ri sucursal qas kuchomaj jampaʼ pwaq rajawaxik ksach chrij y we amaqʼel kkojik.

²⁰ Ri sucursal keʼuchaʼ jujun qachalal rech kkichajij y kkibʼan ri e chak che rajawaxik pa ri e Ja rech nimaʼq taq riqbʼal ibʼ. Ri congregaciones ketobʼan che ri josqʼinik che kbʼan amaqʼel y ri kbʼan kamul pa jun junabʼ, y ri nikʼaj chi chak che rajawaxik kbʼan chupam. Uyaʼik ri qatobʼanik pa waʼ taq chak riʼ sibʼalaj kuya utzilal, rumal laʼ chojtobʼan rukʼ ronojel qanimaʼ y rukʼ kikotemal (Sal. 110:3; Mal. 1:10).

²¹ Jujun taq mul, ri e Ja rech nimaʼq taq riqbʼal ibʼ kekoj che nikʼaj chi jastaq, junam rukʼ ri e tijobʼal y ri e riqbʼal ibʼ che nim kibʼanik kukʼ ri e solinel re circuito. Waʼ taq kʼolbʼal riʼ xuqujeʼ e jachom che ri Dios; rumal laʼ, rajawaxik che ri qabʼantajik, ri kqabʼan che usukʼumaxik qibʼ y ri qatzʼyaq che kqakojo kukʼutu che oj upatanelabʼ ri Jehová, junam rukʼ ri kqabʼano are chiʼ kojbʼe pa ri Ja rech Ajawbʼal.

²² Rumal ri utewchibʼal ri Jehová, e kʼi winaq tajin keʼok pa ri utinamit pa waʼ kʼisbʼal taq qʼij riʼ (Is. 60:8, 10, 11, 22). Rumal laʼ rajawaxik keyak más kʼolbʼal jawiʼ kqamulij wi qibʼ. Chqayaʼ ri qatobʼanik rech keyakik o keloqʼ más, cheqajosqʼij y cheqachajij ri e kʼo chik. Je wariʼ kqakʼutu che nim keqil wi ri e kʼolbʼal che kqakoj che uqʼijilaxik ri Dios y jawiʼ kqaya wi qachuqʼabʼ chbʼil taq qibʼ, che sibʼalaj rajawaxik pa waʼ kʼisbʼal taq qʼij riʼ.