Ri arca re Noé

Are chiʼ xeqʼax ri tiempo, xekʼiyar ri e winaq cho ri uwach Ulew. E kʼi chke e itzel. E kʼo jujun ángeles xeʼux e itzel. Xkiya kan ri kaj, ri e kʼo wi, rech xeqaj lo cho ri uwach Ulew xuqujeʼ xekʼuliʼ kukʼ ixoqibʼ.

Ri e ángeles xekʼojiʼ kalkʼwal kukʼ ri ixoqibʼ. Ri akʼalabʼ riʼ xkʼojiʼ nim kichuqʼabʼ xuqujeʼ e itzel are chiʼ xeʼux nimaʼq, xkibʼan kʼax chke ri e winaq. Jehová xuya taj che je kubʼan waʼ. Rumal laʼ xuchomaj che keʼukamisaj ri e itzel rukʼ jun nimalaj jabʼ che xunojisaj ronojel ri uwach Ulew che jaʼ.

Are kʼu kʼo jun achi che junam ta kukʼ rumal che kuloqʼoqʼej ri Jehová. Ubʼiʼ Noé. Kʼo rixoqil xuqujeʼ oxibʼ ralkʼwal: Sem, Cam xuqujeʼ Jafet. Ri e ralkʼwal e kʼo kixoqil. Jehová xubʼij che Noé che kubʼan jun arca, che are jun nimalaj kaxon re tzʼalam che kpaqiʼ pa uwiʼ ri jaʼ. Rukʼ waʼ, Noé rukʼ ri ufamilia kekam ta pa ri nimalaj jabʼ. Xuqujeʼ, Jehová xutaq che kikojik e kʼi chikop pa ri arca, rech xuqujeʼ kekam taj.

Noé chanim xumaj ubʼanik ri arca. Areʼ xuqujeʼ ri ufamilia xkikoj 50 junabʼ che ubʼanik. Xkibʼan junam ri xubʼij ri Jehová chke. Pa ronojel ri e junabʼ riʼ, Noé xubʼij chke ri winaq che kpe na jun nimalaj jabʼ, are kʼu kʼo ta jun xubʼan ri xutzijoj.

Kʼisbʼal re xopan ri qʼij che keʼok pa ri arca. ¿La kawaj kawetaʼmaj ri xkʼulmatajik?