¡Kkʼojiʼ na jun kalkʼwal!

Abrahán xuqujeʼ Sara kʼi chi junabʼ e kʼulanik. Kiyaʼom kan ri utzalaj kachoch rech kekʼojiʼ pa ja bʼanom che atzʼyaq. Are kʼu ri Sara kʼo ta kubʼij rumal ukubʼsam ukʼuʼx chrij ri Jehová.

Rumal che ri Sara sibʼalaj kraj kkʼojiʼ jun ral, xubʼij che Abrahán: «We ri Agar kkʼojiʼ jun ral awukʼ, xaq ta neʼ junam che wech in». Chiʼ xqʼax ri tiempo, Agar xkʼojiʼ jun ral xkikoj Ismael che ubʼiʼ.

Chiʼ qʼaxinaq chi kʼi tiempo, are chiʼ ri Abrahán kʼo 99 ujunabʼ, Sara 89, oxibʼ winaq xeʼopan che kichʼabʼexik. Abrahán xubʼij chke che keʼuxlan chuxeʼ jun cheʼ xuqujeʼ che kekunik kkitij kiwa kukʼ. ¿La awetaʼm e jachinoq? E ángeles. E areʼ xkibʼij che ri Abrahán: «Pa ri jun chi junabʼ, at xuqujeʼ ri awixoqil kkʼojiʼ jun iwalkʼwal». Sara tajin kutatabʼej chupam ri ja bʼanom che atzʼyaq, are chiʼ xuta wariʼ, xtzeʼn chbʼil ribʼ xuqujeʼ xuchomaj: «¿La qastzij kkʼojiʼ jun wal are chiʼ nim chi nujunabʼ?».

Chiʼ xqʼax jun junabʼ, Sara xkʼojiʼ jun ral, junam che xutzujuj ri ángel rech ri Jehová. Abrahán xukoj Isaac che ubʼiʼ, che kraj kubʼij «tzeʼnik».

Are chiʼ ri Isaac kʼo jobʼ ujunabʼ, Sara xrilo che Ismael ktzeʼn chrij. Areʼ kraj kutoʼ ri ral, rumal laʼ xchʼaw rukʼ ri Abrahán xuqujeʼ xubʼij che: «Chawesaj bʼi ri Agar waral xuqujeʼ ri Ismael». Nabʼe, Abrahán kraj taj kubʼan wariʼ. Are kʼu ri Jehová xuqujeʼ kraj kutoʼ Isaac, rumal laʼ xubʼij che ri Abrahán: «Chabʼanaʼ ri kubʼij ri Sara. In kinchajij ri Ismael. Are kʼu ri nutzujum kkʼulmataj na rukʼ ri Isaac».