Rahab xeʼukʼol ri e achijabʼ

Ri e achijabʼ israelitas xebʼe pa ri tinamit re Jericó xuqujeʼ xekʼojiʼ kan pa ri rachoch jun ixoq ubʼiʼ Rahab. Are chiʼ ri ajawinel re Jericó xuchʼobʼo, xutaq bʼi ajchʼojabʼ pa rachoch ri Rahab. Areʼ xeʼukʼuʼ pa uwiʼ ri rachoch ri e kebʼ achijabʼ xuqujeʼ xubʼij chke ri ajchʼojabʼ che kkitzukuj pa jun chi lugar. Tekʼuriʼ Rahab xubʼij chke ri achijabʼ riʼ: «Kixintoʼ rumal che wetaʼm che Jehová kʼo iwukʼ xuqujeʼ che kichʼak na ri ulew riʼ. Chibʼanaʼ toqʼobʼ, chitzujuj chwe che kikol ri nufamilia».

Ri e achijabʼ xkibʼij che ri Rahab: «We kaxim wajun kaq kolobʼ riʼ che ri aventana, kqatzujuj chawe che kʼo ta kʼax kkikʼulmaj ri e winaq che e kʼo pa ri awachoch. Jeʼ wariʼ ri afamilia kekolotaj kanoq».

Rahab xeʼutoʼ ri e achijabʼ riʼ are chiʼ xeʼel lo pa Jericó xeqaj lo pa ri ventana re ri rachoch rukʼ jun kolobʼ. Ri achijabʼ xkikʼuʼ kibʼ oxibʼ qʼij pa ri juyubʼ are chiʼ majaʼ ketzalij rukʼ Josué. Tekʼuriʼ, ri e israelitas xeqʼax pa uwiʼ ri nimaʼ Jordán xuqujeʼ xkil ri kkibʼan che uchʼakik ri ulew. Jericó are ri nabʼe tinamit che kechʼojin rukʼ. Jehová xuya taqanik che kebʼin chrij ri tinamit jumul pa jun qʼij. Waqibʼ qʼij xkibʼan wariʼ qʼij chi qʼij. Ri wuqubʼ qʼij, xebʼin wuqubʼ mul chrij ri tinamit. Tekʼuriʼ ri e kojol tabʼal toqʼobʼ xkoqʼisaj ri rukʼaʼ wakax, xuqujeʼ ri ajchʼojabʼ israelitas xkiraq kichiʼ rukʼ ronojel kichuqʼabʼ. Tekʼuriʼ ri e nimaʼq taq tapya xetzaq loq. Pa neʼ ri rachoch ri Rahab kʼo pa uwiʼ ri tapya, are kʼu xtzaq ta loq. Rahab xuqujeʼ ri ufamilia xekolotaj kanoq rumal che xukubʼsaj ukʼuʼx chrij ri Jehová.