Josué xuqujeʼ ri e gabaonitas

E nikʼaj chi tinamit re Canaán xketaʼmaj ri xkʼulmataj rukʼ Jericó. Ri ajawinelabʼ re ri e tinamit riʼ xkimulij kibʼ rech xechʼojin kukʼ ri israelitas. Are kʼu ri winaq re Gabaón xkichomaj jun jastaq. Xkikoj qʼeʼl taq katzʼyaq, xebʼe rukʼ Josué rech xkibʼij che: «Naj kojpe wi. Qatom chrij ri Jehová xuqujeʼ ronojel ri xubʼan iwukʼ pa Egipto xuqujeʼ pa Moab. We kibʼij chqe che kibʼan ta kʼax chqe, kojux ajchakibʼ iwech».

Josué xukoj ri xkibʼij che, xubʼij chke che kubʼan ta kʼax chke. Are kʼu qʼaxinaq chi oxibʼ qʼij, Josué xretaʼmaj che ri gabaonitas naj ta kepe wi, e areʼ aj Canaán. Rumal laʼ, Josué xutaʼ chke: «¿Jasche xibʼij ta ri qastzij chqe?». E areʼ xkibʼij che: «Rumal che qaxibʼim qibʼ. Qetaʼm che ri Jehová ri iDios kʼo chuwach ri ichʼoj. Chibʼanaʼ toqʼobʼ, kojikamisaj taj». Josué xubʼan ri xubʼij, kʼo ta kʼax xubʼan chke.

Qʼaxinaq chi jubʼiqʼ tiempo, jobʼ ajawinelabʼ re Canaán kukʼ ri ejércitos xebʼe chkij ri gabaonitas. Josué rukʼ ri ejército xebʼin ronojel jun chaqʼabʼ rech xekitoʼ ri gabaonitas pa kiqʼabʼ. Chukabʼ qʼij xkimaj chʼojinem, sibʼalaj aqʼabʼil. Ri e cananeos xeʼanimaj bʼi pa kʼi taq lugares, are kʼu Jehová xubʼano che xqaj lo nimaʼq taq abʼaj re saqbʼach. Tekʼuriʼ Josué xutaʼ che Jehová che ksilabʼ ta ri qʼij. Ri qʼij kʼo ta jumul jeʼ laʼ ubʼanom. ¿Jasche Josué xutaʼ wariʼ? Rumal che sibʼalaj kukubʼsaj ukʼuʼx chrij Jehová. Qastzij wi che ri qʼij xkanaj kan pa ukʼolbʼal. Pa ri qʼij riʼ xok ta aqʼabʼ kʼa xekun na ri israelitas che kikamisaxik ri ajawinelabʼ cananeos xuqujeʼ ri ejércitos.