Ana xutaʼ jun ral che Jehová

Elcaná are jun israelita che e kʼo kebʼ rixoqil: Ana xuqujeʼ Peniná. Are kʼu areʼ kuloqʼoqʼej más Ana. Peniná e kʼo kʼi ral, Ana kʼo ta nijun. Rumal laʼ, Peniná kutzʼeʼj uwach ri Ana. Ronojel taq junabʼ, Elcaná keʼukʼam bʼi ri ufamilia pa Siló, rech kuqʼijilaj Jehová pa ri tabernáculo. Are kʼu, are chiʼ e kʼo chilaʼ, Elcaná xrilo che Ana ri loqʼalaj rixoqil sibʼalaj kbʼisonik. Rumal laʼ xubʼij che: «Chabʼanaʼ toqʼobʼ, katoqʼ taj, Ana. In kʼo in awukʼ, in sibʼalaj katwaj».

Qʼaxinaq chi jubʼiqʼ tiempo, Ana xbʼe che ubʼanik uchʼawem. Kuya ta kan oqʼej, kutaʼ toqʼobʼ che Jehová che kutoʼ. Xubʼij che: «Jehová, we kaya jun wal ala, kinjach chawe rech katupatanij pa ronojel ri ukʼaslemal».

Ri kinimal ri kojol tabʼal toqʼobʼ Elí xril ri Ana che tajin koqʼik xuqujeʼ xaq xiw ksilabʼ ri uchiʼ kchʼaw taj, xuchomaj che xa qʼabʼarel. Ana xubʼij che: «Jeʼ taj, wajaw, in qʼabʼarel taj. Kʼo jun nimalaj kʼax pa wanimaʼ tajin kintzijon rukʼ Jehová». Elí xrilo che qastzij qʼabʼarel taj xubʼij che Ana: «Are bʼaʼ Jehová kyaʼow ri xataʼ che». Xjoror ri ranimaʼ Ana tekʼuriʼ xel bʼi chilaʼ. Kʼa majaʼ kqʼax jun junabʼ, xalax jun ral ala xukoj Samuel che ubʼiʼ. ¿La kachomaj ri kikotemal xunaʼ Ana?

Xsach ta che Ana ri xutzujuj che Jehová. Are chiʼ xuya kan uyaʼik utuʼ ri Samuel, xukʼam bʼi pa ri tabernáculo rech kupatanij ri Dios. Ana xubʼij che Elí: «Xinbʼan nuchʼawem che Jehová rech kuya jun wal ala. Kimik kinya rech kupatanij Jehová pa ronojel ukʼaslemal». Elcaná rukʼ Ana kekichʼabʼej ronojel taq junabʼ xuqujeʼ kkikʼam bʼi jun ratzʼyaq che kʼo ta uqʼabʼ. Are chiʼ xeqʼax más ri junabʼ, Ana xekʼojiʼ chi oxibʼ ral alabʼom xuqujeʼ kebʼ alitomabʼ, rumal ri utobʼanik ri Jehová.