Ri xutzujuj ri Jefté

Ri israelitas jumul chik xkiya kan ri Jehová xuqujeʼ xkimaj kiqʼijilaxik dioses che e qastzij taj. Are kʼu kechajix ta kumal ri e dioses che e qastzij taj are chiʼ ri winaq rech Ammón kkibʼan kʼax chke. Ri tinamit xuriq kʼax kʼi taq junabʼ. Kʼisbʼal re, xkibʼij che ri Jehová: «Oj makunaq. Chabʼanaʼ toqʼobʼ chojakoloʼ pa kiqʼabʼ ri e qakʼulel». Ri israelitas xkisachisaj kiwach ri e tyox xuqujeʼ xkimaj chi jumul uqʼijilaxik ri Jehová. Areʼ xuchʼij ta chi rilik ri kʼax che tajin kkiriqo.

Rumal laʼ ri israelitas xkichaʼ jun ajchʼoj ubʼiʼ Jefté. Areʼ keʼutoʼ rech kux ajkʼamal bʼe pa ri chʼoj chkij ri ammonitas. Jefté xubʼij che ri Jehová: «We kojatoʼ che uchʼakik ri chʼoj, kintzujuj chawe che kinya chawe ri nabʼe winaq che kel lo pa wachoch rech kinukʼulaj are chiʼ kintzalij loq». Jehová xuta ri uchʼawem ri Jefté xuqujeʼ xutoʼ rech kuchʼak ri chʼoj.

Are chiʼ ri Jefté xtzalij lo pa rachoch, ri nabʼe winaq che xel che ukʼulaxik are ri umiʼal. Are ri xa jun umiʼal che kʼolik. Tajin kaxajowik xel loq xuqujeʼ tajin kroqʼisaj ri pandereta. ¿Jas kubʼan ri Jefté kimik? Xnaʼtaj che ri xutzujuj, xubʼij: «¡Ay, numiʼal! Kubʼan kebʼ ri wanimaʼ. Xinbʼan jun tzujunik che ri Jehová tekʼuriʼ rech kinbʼan ri xintzujuj katintaq bʼi pa ri tabernáculo pa Siló». Ri umiʼal xubʼij che: «Tat, we xatzujuj wariʼ che ri Jehová, rajawaxik kabʼano. Xaq xiw kintaʼ chawe che kaya bʼe chwe rech kibʼe kukʼ ri e wachiʼl alitomabʼ rech kinbʼe pa taq ri juyubʼ kebʼ ikʼ. Tekʼuriʼ kinbʼe pa ri tabernáculo». Ri umiʼal ri Jefté xux sukʼ xuqujeʼ xpatanin ronojel ri ukʼaslemal pa ri tabernáculo. Ri rachiʼl alitomabʼ kebʼe ronojel taq junabʼ che rilik pa Siló.