Ri umak ri ajawinel David

Are chiʼ Saúl xkamik, chukabʼ qʼij David xux ajawinel. Kʼo 30 ujunabʼ. Xqʼax kʼi junabʼ, pa jun chaqʼabʼ, are chiʼ kʼo pa uwiʼ ri rachoch, xril jun jeʼlalaj ixoq. David xretaʼmaj che Bat-Seba ubʼiʼ xuqujeʼ che kʼulan rukʼ jun ajchʼoj ubʼiʼ Urías. Tekʼuriʼ David xtaqan che ukʼamik Bat-Seba pa ri rachoch, xqʼoyiʼ rukʼ, ri ixoq xkanaj yawabʼ winaq. David xukoj uchuqʼabʼ che ukʼuʼik ri xubʼano. Rumal laʼ xubʼij che ri kinimal ri ejército che kuya Urías chuwach ri chʼoj, tekʼuriʼ keʼanimajik rech kkiya kan utukel. Urías xkam pa ri chʼoj, tekʼuriʼ David xkʼuliʼ rukʼ Bat-Seba.

Are kʼu Jehová xril ronojel ri itzel taq jastaq che xkʼulmatajik. ¿Jas kubʼan Jehová che? Xutaq ri ajqʼaxal tzij Natán rech ktzijon rukʼ David. Natán xubʼij che: «Kʼo jun achi che e kʼo kʼi uchij, xuqujeʼ jun achi che xa jun uchij kʼolik che sibʼalaj kraj. Ri qʼinom achi xukʼam ri xa jun uchij ri mebʼaʼ». David xpe nimalaj royowal xubʼij: «¡Ri qʼinom achi riʼ taqal che kkamik!». Tekʼuriʼ Natán xubʼij che: «¡At riʼ ri qʼinom achi!». David sibʼalaj xbʼisonik xubʼij che Natán: In makunaq chuwach Jehová». Ri mak riʼ xukʼam lo kʼi kʼax pa ri ukʼaslemal ri David, xuqujeʼ pa ri ufamilia. Jehová xukʼajisaj uwach ri David, are kʼu xuyaʼo che xkʼasiʼ rumal che xubʼij ri qastzij xuqujeʼ xubʼan ta nim che ribʼ.

David kraj kubʼan jun ja che Jehová. Are kʼu Jehová xuchaʼ Salomón, ri ukʼojol David, rech kubʼan ri ja. Rumal laʼ David xumaj rilik ri jastaq che kajwataj che Salomón xuqujeʼ xubʼij: «Ri rachoch Jehová rajawaxik che nim ubʼanik. Salomón kʼa jun ala na, are kʼu in kintoʼ rech utz kel ronojel». David xusipaj nim pwaq rech kbʼan ri rachoch ri Dios. Xeʼutzukuj utz taq ajchakibʼ, xumulij saq pwaq rukʼ qʼan pwaq, xuqujeʼ xukʼam lo tzʼalam re cedro pa Tiro xuqujeʼ pa Sidón. Are chiʼ xa jubʼiqʼ chi kraj kkam David, xuya ri planos che Salomón rech kubʼan ri rachoch Dios xuqujeʼ xubʼij: «Jehová xubʼij ri e jastaq riʼ chwe xuqujeʼ xubʼij che kinya chawe. Areʼ katutoʼ. Kaxibʼij ta awibʼ. Rajawaxik kkʼojiʼ achuqʼabʼ xuqujeʼ kabʼan ri chak».