Jun ja che Jehová

Are chiʼ Salomón xumaj ajawinik pa Israel, Jehová xuta che: «¿Jas kawaj kinya chawe?». Salomón xubʼij che: «In jun alaj ala na kʼa majaʼ kwetaʼmaj ubʼanik ri jastaq. Chabʼanaʼ toqʼobʼ, chayaʼ nojibʼal chwe rech kinkun che uchajixik ri atinamit». Jehová xubʼij che: «Kinya anojibʼal junam che xataʼ chwe. Xaq xiw ta laʼ, katux ri más ajnojalaj achi pa ronojel ri uwach Ulew. Xuqujeʼ kinya aqʼinomal, xuqujeʼ sibʼalaj kʼi junabʼ katkʼasiʼ we katniman chwe».

Salomón xumaj ubʼanik ri rachoch Dios. Xukoj saq pwaq, qʼan pwaq, tzʼalam xuqujeʼ abʼaj. Konojel ri jastaq riʼ nim kajil. E miles ajnojabʼ taq achijabʼ ixoqibʼ xechakunik. Ri ja xtzʼaqat ubʼanik pa wuqubʼ junabʼ. Tekʼuriʼ xopan ri qʼij rech kjach ri ja che Jehová, rumal laʼ xkiya sipanik pa uwiʼ ri altar. Salomón xxukiʼ chuwach ri altar xubʼan uchʼawem: «Oh, Jehová, at taqal chawe jun ja más nim xuqujeʼ más utz chuwach wariʼ. Are kʼu, chabʼanaʼ toqʼobʼ, chakʼamaʼ ri qʼijilanik xuqujeʼ ri qachʼawem». ¿Jas kachomaj? ¿La utz xril Jehová ri ja riʼ? ¿La xuta ri uchʼawem ri Salomón? Are chiʼ Salomón xukʼis ri uchʼawem, xqaj lo qʼaqʼ chikaj xuqujeʼ xuporoj ri tabʼal toqʼobʼ. Rukʼ waʼ Jehová xukʼutu che utz xril ri ja. Are chi ri israelitas xkil waʼ, sibʼalaj xekikotik.

Ri ajawinel Salomón xtatajik che sibʼalaj kʼo nim unojibʼal pa ronojel Israel xuqujeʼ pa taq ri lugares che naj e kʼo wi. Ri e winaq kebʼe che utzukuxik rech ketoʼ che rilik ri kʼax kkiriqo. Xuqujeʼ ri ajawinel ixoq rech Seba xopan che utaʼik kʼax taq jastaq che. Are chiʼ xuta ri kubʼij Salomón, xubʼij: «Xinkoj ta ri kbʼix chawij, are kʼu kimik kwilo che más nim ri anojibʼal chuwach ri bʼim chwe. Ri aDios Jehová atutewchim». Sibʼalaj utz ri kʼaslemal pa Israel, xuqujeʼ ri winaq kekikotik. Are kʼu naj taj xuchʼijo.