Jehová xuya uchuqʼabʼ ri Elías

Jezabel xretaʼmaj ri xkʼulmataj kukʼ ri ajqʼaxal taq tzij re ri Baal xpe nimalaj royowal. Rumal laʼ xutaq bʼi jun taqoʼn rukʼ Elías rech kubʼij che: «Chweʼq at kaminaq chik, junam kukʼ ri ajqʼaxal taq tzij re Baal». Elías sibʼalaj xuxibʼij ribʼ xanimaj bʼi pa ri chaqiʼj ulew. Chilaʼ xubʼan uchʼawem: «Jehová, kinchʼij ta chik. Kwaj kinkamik». Elías sibʼalaj kosinaq rumal laʼ xwar kan chuxeʼ jun cheʼ.

Are kʼu jun ángel xukʼasuj ri Elías rukʼ chʼuchʼuj alaj taq tzij xubʼij che: «Chatwalijoq chatijaʼ awa». Elías xril jun kaxlanwa puwiʼ jun abʼaj, xuqujeʼ jun xaruʼ joron. Xwaʼik xuqujeʼ xukʼiʼanik, tekʼuriʼ xwar chi jumul. Ri ángel xukʼasuj chi jumul xubʼij che: «Chatwoʼq. Rumal che kajwataj achuqʼabʼ che ri bʼe kabʼan na». Rumal laʼ Elías xwa chi jumul. Tekʼuriʼ xbʼin 40 qʼij rukʼ 40 chaqʼabʼ xopan pa ri juyubʼ Horeb. Chilaʼ xok pa jun jul rech kwarik. Tekʼuriʼ Jehová xubʼij che: «¿Elías, jas tajin kabʼan waral?». Elías xubʼij: «Ri israelitas tajin ta kkibʼan ri kitzujum chawe. Xkiwulij ri altares xekikamisaj ri ajqʼaxal taq atzij. Kimik xuqujeʼ kkaj kinkikamisaj in».

Jehová xubʼij che Elías: «Chatel loq tekʼuriʼ chattakʼal pa uwiʼ ri juyubʼ». Tekʼuriʼ, xpe jun nimalaj kaqiqʼ, tekʼuriʼ jun kabʼraqan xuqujeʼ jun qʼaqʼ. Kʼisbʼal re, Elías xuta jun chʼabʼal che nojim kchʼawik. Rumal laʼ xuchʼuq ri upalaj rukʼ ri ratzʼyaq tekʼuriʼ xtakʼiʼ chuwach ri jul. Jehová xutaʼ che jasche xanimajik. Elías xubʼij: «Xaq xiw chi in ri ajqʼaxal tzij kʼolik». Are kʼu Jehová xubʼij: «Xaq ta atukel. E kʼo na 7.000 winaq pa Israel che kinkiqʼijilaj. Jat chabʼij che Eliseo che are ri ajqʼaxal tzij chaʼom che kkanaj kan pa akʼaxel». Elías chanim xbʼek xubʼan ri xubʼij Jehová che. ¿La kabʼij che Jehová xuqujeʼ katutoʼ at we katniman che? Qastzij che katutoʼ. Tekʼuriʼ kqil na ri xkʼulmatajik are chiʼ xubʼan ta jabʼ.