Jehová xutoʼ ri Jehosafat chkiwach ri e ukʼulel

Jehosafat are jun ajawinel re Judá che xusachisaj ri altares re ri dios Baal xuqujeʼ ri e tyox che e kʼo pa ri tinamit. Areʼ kraj che ri winaq kketaʼmaj ri utaqanik ri Jehová. Rumal laʼ, xeʼutaq bʼi ri e ukʼojol ri ajawinel xuqujeʼ ri levitas pa ronojel ri Judá rech kkikʼut ri utaqanik ri Jehová chkiwach ri tinamit.

Ri e tinamit che e kʼo naqaj kkixibʼij kibʼ kkibʼan kʼax che Judá rumal che ketaʼm che Jehová kutoʼ ri utinamit. Xuqujeʼ kkikʼam bʼi sipanik che ri ajawinel Jehosafat. Are kʼu ri e winaq re Ammón, Moab xuqujeʼ nikʼaj chi tinamit re Seír xebʼe che chʼoj rukʼ Judá. Jehosafat retaʼm che kajwataj ri utobʼanik ri Jehová che. Rumal laʼ xeʼumulij pa Jerusalén konojel ri achijabʼ, ixoqibʼ xuqujeʼ ri akʼalabʼ. Chkiwach xubʼan jun chʼawem, xubʼij: «Jehová, we at kʼo ta qukʼ kojkun taj kqachʼak ri chʼoj. Chabʼanaʼ toqʼobʼ, chabʼij chqe ri kqabʼano».

Jehová xuta ri uchʼawem ri Jehosafat xuqujeʼ xubʼij che: «Kaxibʼij ta awibʼ, in kixintoʼ. Jix pa ri ikʼolbʼal, chixkʼol chilaʼ kixsalabʼ taj rech kiwil ri kinbʼan che ikolik». ¿Jas kubʼan ri Jehová che kikolik?

Chukabʼ qʼij, Jehosafat xuchaʼ ajbʼixonelabʼ xuqujeʼ xubʼij chke che kebʼe chkiwach ri ajchʼojabʼ. E areʼ xeʼel bʼi pa Jerusalén cho ri uwosaq re chʼojinik, che xkʼojiʼ pa ri lugar ubʼiʼ Tecoa.

Ri ajbʼixonelabʼ sibʼalaj xekikotik xkibʼixoj bʼix rukʼ koʼalaj chʼabʼal. Are chiʼ ri Jehová tajin kchʼojin pa uwiʼ ri utinamit. Xeʼusach ri e ammonitas xuqujeʼ ri e moabitas, xuqujeʼ xkimaj uchʼayik kibʼ. Konojel xekamik. Are kʼu Jehová xeʼutoʼ ri winaq re Judá, ri e ajchʼojabʼ xuqujeʼ ri e ajkojol tabʼal toqʼobʼ. Konojel ri e tinamit che e kʼo chkinaqaj xketaʼmaj ri xubʼan ri Jehová xuqujeʼ xkichʼobʼo che tajin keʼutoʼ ri utinamit chkiwach ri kikʼulel. ¿Jas kubʼan ri Jehová che ukolik ri utinamit? Rukʼ jalajoj taq jastaq. Che Jehová kajwataj ta ri kitobʼanik ri winaq.