Ri nimalaj uʼejército ri Jehová

Ri ajawinel Ben-Hadad re Siria kʼi mul xraj xubʼan kʼax che ri tinamit Israel. Are kʼu ri ajqʼaxal tzij Eliseo amaqʼel xubʼij che ri ajawinel re Israel rech kekunik keʼanimajik. Rumal laʼ Ben-Hadad xuchomaj che krelaqʼaj bʼi Eliseo. Xretaʼmaj che kʼo pa ri tinamit Dotán xutaq bʼi ri ejército sirio rech kekichapaʼ loq.

Ri sirios chaqʼabʼ xeʼopan pa Dotán. Chukabʼ qʼij, ri toʼl rech Eliseo xel loq xrilo che chrij ri tinamit e kʼo sibʼalaj kʼi ejércitos. Sibʼalaj xuxibʼij ribʼ xuqujeʼ xuraq uchiʼ: «Eliseo, ¿jas kqabʼano?». Eliseo xubʼij che: «E kʼo más qukʼ oj chuwach ri e kʼo kukʼ e areʼ». Tekʼuriʼ, Jehová xubʼano che ri toʼl rech Eliseo kril ri e juyubʼ che kʼo chrij ri tinamit e nojinaq che kej xuqujeʼ carros re chʼoj rukʼ qʼaqʼ.

Are chiʼ ri soldados sirios xkaj xkichap Eliseo, areʼ xubʼan uchʼawem, xubʼij: «Jehová, chabʼanaʼ toqʼobʼ, chabʼanaʼ che kemoyirik». Xaq kʼateʼ, ri e soldados kkichʼobʼ ta chik jachiʼ e kʼo wi pa neʼ kekun na kekaʼyik. Tekʼuriʼ Eliseo xubʼij chke: «Are ta tinamit waʼ ri kitzukuj. Chiniterneʼj, kixinkʼam bʼi rukʼ ri achi che kitzukuj». Ri achijabʼ xkiterneʼj bʼi Eliseo kʼa xeʼopan pa Samaria. Chilaʼ kʼo wi ri ajawinel re Israel.

Kʼisbʼal re ri sirios xkichʼobʼo jachiʼ qas e kʼo wi, are kʼu sibʼalaj matam chik. Ri ajawinel re Israel xutaʼ che Eliseo: «¿La keʼinkamisaj?». Ri e sirios kitzukum ubʼanik kʼax che Eliseo; ¿la kukoj ri tiempo riʼ che ubʼanik kʼax chke? Kukoj taj. Eliseo xubʼij che ri ajawinel: «Keʼakamisaj taj. Chayaʼ kiwa tekʼuriʼ chayaʼ bʼe chke ketzalijik». Rumal laʼ ri ajawinel xubʼan jun nimalaj waʼim kukʼ tekʼuriʼ xeʼutaq bʼik rech ketzalij pa kachoch.