Ri Ajawbʼal che kʼo ta ukʼisik

Jun chaqʼabʼ, ri ajawinel Nabucodonosor xrachikʼaj jun jastaq che kchʼobʼtaj taj. Sibʼalaj kbʼisonik rumal laʼ kkun taj kwarik. Xeʼuchʼabʼej ri ajqʼijabʼ tekʼuriʼ xubʼij chke: «Chibʼij chwe ri kraj kubʼij ri wachikʼ». E areʼ xkibʼij: «Chabʼij chqe ri xawachikʼaj, oh, ajawinel». Are kʼu Nabucodonosor xubʼij chke: «¡Kinbʼij taj! Ix chibʼij chwe, we kibʼij taj, kixinkamisaj». Jumul chik xkitaʼ che: «Are kʼu chabʼij chqe ri xawachikʼaj, e ri oj kqabʼij chawe ri kraj kubʼij». Areʼ xubʼij chke: «Xa kiwaj kinisubʼu. ¡Chibʼij chwe!». E areʼ xkibʼij: «Kʼo ta nijun pa ri uwach ulew che kkunik kubʼan ri kawaj. Kʼo ta nijun kkunik».

Nabucodonosor sibʼalaj xpe royowal che xutaq kikamisaxik konojel ri ajnoʼjabʼ re ri tinamit. Xuqujeʼ kekamisax Daniel, Sadrac, Mesac xuqujeʼ Abednego. Daniel xutaʼ tiempo che ri ajawinel, tekʼuriʼ areʼ xuqujeʼ ri e rachiʼl xkitaʼ tobʼanik pa chʼawem che Jehová. ¿Jas xubʼan Jehová?

Jehová xukʼut chuwach Daniel ri achikʼ xubʼan Nabucodonosor xuqujeʼ xubʼij che ri kraj kubʼij. Che ri ukabʼ qʼij, Daniel xetzijon rukʼ ri rajpatanel ri ajawinel xubʼij che: «Kikamisaj ta nijun chke ri ajnoʼjabʼ, in kinkunik kinbʼij ri kraj kubʼij ri achikʼ». Ri ajpatanel xukʼam bʼi Daniel che rilik ri Nabucodonosor. Daniel xubʼij che ri ajawinel: «Dios ukʼutum chawach ri petinaq. Are waʼ ri xawachikʼaj: xawil jun nimalaj estatua che ri ujolom are qʼan pwaq, ri uwach ukʼuʼx xuqujeʼ ri utelebʼ re saq pwaq, ri upam xuqujeʼ ri uxeʼ upam are cobre, ri e raʼ re hierro e ri e raqan re hierro yujum rukʼ xaqʼoʼl. Tekʼuriʼ jun abʼaj xel lo pa ri juyubʼ che xubʼan kʼax che ri raqan ri estatua. Xpax ri estatua xux ulew, ri kaqiqʼ xukʼam bʼi ri ulew. Ri abʼaj xux jun nimalaj juyubʼ che xunojisaj ronojel ri uwach ulew».

Daniel xubʼij: «Ri achikʼ kraj kubʼij: ri aqʼatoj tzij are ri jolomaj re qʼan pwaq. Ri chʼaqap re saq pwaq are jun qʼatbʼal tzij che kkʼojiʼ are chi qʼaxinaq chi ri awe at. Tekʼuriʼ kkʼojiʼ chi jun che xaq junam rukʼ ri kaq pwaq che kajawin pa uwiʼ ri uwach ulew. Ri jun chik sibʼalaj kʼo uchuqʼabʼ junam rukʼ hierro. Kʼisbʼal re kkʼojiʼ jun che ubʼanom kebʼ uwach, jujun taq mul ri uchuqʼabʼ xaq junam rukʼ ri hierro, jujun chi mul junam xaqʼoʼl. Ri abʼaj che kux jun juyubʼ are ri Rajawbʼal ri Dios, che kusachisaj uwach konojel ri nikʼaj chik qʼatbʼal tzij xuqujeʼ che kʼo ta ukʼisik».

Nabucodonosor xxukiʼ chuwach Daniel tekʼuriʼ xubʼij: «Ri aDios xbʼin chawe ri achikʼ. Kʼo ta chi jun Dios junam rukʼ areʼ». Xkamisax ta chi Daniel, Nabucodonosor xukoj che ajkʼamal bʼe pa kiwiʼ konojel ri ajnoʼjabʼ xuqujeʼ pa uwiʼ Babilonia. ¿La xawil ri kubʼan ri Jehová che uyaʼik ri xutaʼ Daniel?