Jupaj tzij cho ri tapya

Chiʼ xqʼax ri tiempo, Belsasar xux ri ajawinel rech Babilonia. Jun chaqʼabʼ, xubʼan jun nimalaj nimaqʼij chke e mil winaq. Areʼ ri winaq che más nim kibʼanik pa ri tinamit. Xutaq ri rajchakibʼ che resaxik ri laq re qʼan pwaq che Nabucodonosor xukʼam lo pa ri loqʼalaj ja re ri Jehová. Belsasar xuqujeʼ ri e winaq e kʼo rukʼ xkikoj ri laq rech kkitij ri vino chupam xuqujeʼ xkiya kiqʼij ri dioses. Xaq kʼateʼ, xilitaj uqʼabʼ jun achi che xumaj utzʼibʼaxik nikʼaj tzij che kchʼobʼtaj ta ri kubʼij pa ri tapya jachiʼ tajin kbʼan wi ri nimaqʼij.

Belsasar sibʼalaj xuxibʼij ribʼ, xeʼuchʼabʼej ri ajqʼijabʼ tekʼuriʼ xutzujuj chke: «Apachin taneʼ ri kubʼij chwe ri kraj kubʼij ri e tzij riʼ, kinbʼano che kux ri urox winaq más nim ubʼanik pa uwiʼ ri Babilonia». Xkikoj kichuqʼabʼ che uchʼobʼik, are kʼu kʼo ta nijun xkunik. Xopan ri ajawinel ixoq xubʼij: «Jun achi Daniel ubʼiʼ are ri xbʼin che ri Nabucodonosor ri kraj kubʼij ri e achikʼ xuqujeʼ ri jastaq che qas ta kchʼobʼtajik. Areʼ kkunik kubʼij chawe ri kraj kubʼij ri e tzij riʼ».

Daniel xbʼe che rilik ri ajawinel. Are chiʼ xopanik, ri Belsasar xubʼij che: «We katkunik kasikʼij uwach xuqujeʼ kabʼij ri kraj kubʼij ri e tzij riʼ, kinya chawe jun collar re qʼan pwaq xuqujeʼ kinbʼano che katux ri urox winaq más nim ubʼanik pa Babilonia». Daniel xubʼij che: «Kwaj ta sipanik. Are kʼu kinbʼij chawe ri kraj kubʼij ri e tzij. Ri atat, Nabucodonosor, xubʼan nim che ribʼ, rumal laʼ Jehová xuya jun kʼutunem re machʼachʼem che. At awetaʼm chik ronojel ri xukʼulmaj ri atat, pa neʼ awetaʼm chik xanimaj ta ri Jehová. Xakoj ri ulaq re qʼan pwaq re ri loqʼalaj ja rech katij vino chupam. Rumal laʼ ri Dios utzʼibʼam wa e tzij riʼ: MENÉ, MENÉ, TEQUEL xuqujeʼ PARSÍN. Wariʼ kraj kubʼij che ri medos xuqujeʼ ri persas kkichʼak na Babilonia, e ri at katux ta chi ajawinel».

Kqʼalajinik che kʼo ta nijun kkunik kuchʼak Babilonia. Ri tinamit chajital rumal nimaʼq taq tapya xuqujeʼ rumal jun nimalaj nimaʼ. Are kʼu pa ri chaqʼabʼ riʼ, ri medos xuqujeʼ ri persas xechʼojin rukʼ Babilonia. Ciro, ri ajawinel persa, xubʼan chi jun ubʼe ri nimaʼ rech ri ajchʼojabʼ kekunik keʼopan chuchiʼ ri tinamit. Are chiʼ xeʼopan chilaʼ, ¡tel ri uchiʼja! Chanim xechʼojin ri ajchʼojabʼ, xkichʼak ri tinamit xuqujeʼ xkikamisaj ri ajawinel. Kimik Ciro are chi ri kqʼatow tzij pa uwiʼ Babilonia.

Pa ri nabʼe junabʼ re ri uqʼatoj tzij, Ciro xubʼij: «Jehová ubʼim chwe che kinyak chi jumul ri loqʼalaj ja pa Jerusalén. Ri Judíos che kkaj kebʼe che tobʼanik, kuya kebʼek». Rumal laʼ, kʼi xetzalij pa ri kulew 70 junabʼ qʼaxinaq chik are chiʼ xsachisax uwach Jerusalén. Jeʼ wariʼ xbʼan ri utzujum ri Jehová. Xuqujeʼ, Ciro xutzalij ri laq re qʼan pwaq xuqujeʼ saq pwaq, xuqujeʼ ri nikʼaj chik jastaq che Nabucodonosor xukʼam bʼi pa ri loqʼalaj ja. ¿La xawilo che Jehová xukoj ri Ciro che utoʼik ri utinamit?