Daniel pa kijul ri e koj

Darío ri medo xux ri jun chik ajawinel re Babilonia. Xrilo che nim ubʼanik ri Daniel, rumal laʼ xukoj che ajkʼamal bʼe pa kiwiʼ ri nikʼaj chik achijabʼ nim kibʼanik pa ri tinamit. Ri achijabʼ riʼ itzel kkil Daniel xuqujeʼ kkaj kkisachisaj uwach. Ketaʼm che Daniel kubʼan uchʼawem che ri Jehová oxmul pa jun qʼij, rumal laʼ xkibʼij che Darío: «Oh, ajawinel, utz riʼ we kʼo jun taqanik che kubʼij che konojel winaq xaq xiw chawe at kkibʼan wi ri kichʼawem. We kʼo jun winaq che kunimaj ta ri taqanik, kkʼaq bʼi pa kijul ri e koj». Darío utz xril wajun nojibʼal riʼ rumal la xujuchʼ ri taqanik.

Are chiʼ ri Daniel xuta ri kʼakʼ taqanik, xbʼe pa rachoch. Are chiʼ kʼo chilaʼ, xxukiʼ xubʼan uchʼawem che Jehová chuwach jun ventana jaqom uwach. Ri achijabʼ che itzel kkilo xaq kʼateʼ xeʼok bʼi pa rachoch, xkilo che tajin kubʼan uchʼawem. Chanim xebʼe che ubʼixik che Darío: «Daniel atuniman taj. Oxmul kubʼan uchʼawem pa jun qʼij che ri uDios». Daniel kqaj chuwach ri Darío rumal laʼ kraj taj che kkamisaxik. Ronojel ri qʼij xuchomaj ri kubʼano rech kukol ri Daniel, xuqujeʼ areʼ kkun taj kukʼex jun taqanik che kojom chik. Rumal laʼ kʼo ta chi xkunik jas xubʼano are xtaqan che ukʼaqik ri Daniel pa kijul ri e kʼanalaj taq koj.

Chaqʼabʼ, Darío sibʼalaj kbʼison che Daniel rumal laʼ kkun taj kwarik. Aqʼabʼil, chanim xbʼe chuchiʼ ri jul, xkaʼy panoq xuqujeʼ xuraq uchiʼ xubʼij: «¡Daniel! ¿La xatukol ri aDios?».

Darío xuta jun chʼabʼal. Are ri Daniel, xubʼij: «Ri uʼángel ri Jehová xutzʼapij kichiʼ ri e koj, rumal laʼ kʼo ta xkibʼan chwe». Darío sibʼalaj kkikotik, xtaqan che resaxik. Are chiʼ xel lo ri Daniel kʼo ta kʼax bʼanom che. Tekʼuriʼ, ri ajawinel xubʼij: «¡Cheʼikʼaqaʼ bʼi ri achijabʼ che xkimol tzij chrij ri Daniel!». Are chiʼ xekʼaq bʼi, chanim xetijow kumal ri e koj.

Darío xuya wajun taqanik riʼ che ri tinamit: «Rajawaxik che konojel kkinimaj ri uDios ri Daniel. Areʼ xukol chkiwach ri e koj».

¿E ri at? ¿La xuqujeʼ kabʼan ronojel taq qʼij ri achʼawem che ri Jehová, junam che xubʼan Daniel?