Ri e tapya re Jerusalén

Chojtzalij jujun junabʼ. Nehemías are jun israelita che kʼo pa Susa, jun tinamit re Persia. Rajpatanel ri ajawinel Artajerjes. Jun qʼij, ri rachalal Nehemías xopan pa Judá rukʼam kʼaxalaj taq tzij: «Ri israelitas che xetzalij pa Jerusalén qas ta e chajitalik. Ri e tapya xuqujeʼ ri uchiʼ ri tinamit sukʼumam taj». Nehemías sibʼalaj xbʼisonik. Areʼ kraj ktobʼanik, rumal laʼ xubʼan uchʼawem che Dios rech ri ajawinel kuya che kbʼe pa Jerusalén.

Qʼaxinaq chi ri tiempo, ri ajawinel xrilo che Nehemías sibʼalaj kbʼisonik. Xubʼij: «Kʼo ta jumul at wilom katbʼisonik. ¿Jas xakʼulmaj?». Nehemías xubʼij: «Ri nutinamit, Jerusalén, kʼo pa kʼax, ¿jas ta kʼu che mat kinbʼisonik?». Ri ajawinel xubʼij: «¿Jas katintoʼ wi?». Nehemías xubʼan uchʼawem pa ranimaʼ. Tekʼuriʼ xubʼij: «Chabʼanaʼ toqʼobʼ, chayaʼ chwe che kinbʼe pa Jerusalén rech kinwalajisaj chi jumul ri tapya». Ri ajawinel Artajerjes xuya che rech kbʼek. Xuqujeʼ xuya ri tobʼanik che kajwataj che rech kʼo ta kukʼulmaj pa ri nimalaj bʼe. Xuqujeʼ, xbʼan ajawinel che pa uwiʼ Judá xuqujeʼ xyaʼ tzʼalam che rech kubʼan ri uchiʼ ri tinamit.

Are chiʼ Nehemías xopan pa Jerusalén, xbʼe che rilik ri ubʼanom ri e tapya. Tekʼuriʼ, xeʼumulij ri e ajkojol tabʼal toqʼobʼ xuqujeʼ ri e ajawinelabʼ, xubʼij chke: «Wariʼ sibʼalaj kʼax ubʼanom. Rajawaxik kojchakunik». Ri winaq utz xkito xkimaj usukʼumaxik ri e tapya.

Jujun kikʼulel ri israelitas xkitzeʼj kiwach xkibʼij: «¡Kkun jun par che uwulixik ri tapya ri tajin kiwalajisaj!». Are kʼu ri e ajchakibʼ xkita ta ri tzij riʼ xaneʼ xkikoj más kichuqʼabʼ che ri chak. Qʼij chi qʼij xkibʼan más nim che ri tapya xuqujeʼ xkʼojiʼ más uchuqʼabʼ.

Tekʼuriʼ, e kʼi kʼulel re jalajoj tinamit xkichomaj kkibʼan kʼax che Jerusalén. Ri e judíos che xkita ri xkichomaj, sibʼalaj xkixibʼij kibʼ. Are kʼu Nehemías xubʼij: «Kixibʼij ta iwibʼ. Jehová kʼo qukʼ». Xuqujeʼ xeʼukoj chajil ke ri ajchakibʼ. Rech ri e kʼulel xekun taj xechʼojin kukʼ.

Ri tapya xuqujeʼ ri uchiʼ ri tinamit xkʼis ubʼanik xa pa 52 qʼij. Rech kekikotik, Nehemías xeʼukʼam lo ri e levitas pa Jerusalén. Xubʼan kebʼ jupuq ajbʼixonelabʼ chke. Esdras xbʼe pa jun jupuq Nehemías pa ri jun chik. Xepaqiʼ pa ri qʼaʼm pa uwiʼ ri uchiʼja ubʼiʼ Puerta de la Fuente. Tekʼuriʼ, pa kijujunal ri e jupuq xebʼin pa uwiʼ ri tapya chrij ri tinamit. Tajin kkoqʼisaj ri trompetas, címbalos xuqujeʼ ri arpas, xuqujeʼ kebʼixon che Jehová, xkimulij kibʼ pa ri rachoch Dios. Konojel xkiya tabʼal toqʼobʼ che ri Jehová xuqujeʼ xkibʼan ri nimaqʼij. Sibʼalaj xekikotik ri kichʼabʼal naj ktataj wi.